Bahan Sermon Kamis Si Badia 14 April 2022, Mperingeti Kiniseran Jesus ( 1 Korinti 11:23-34 )

Invocatio         : Ngaloi Jesus, Aku kap roti simereken kegeluhen, ise reh ndahi aku, lanai ia melihe, ise tek man bangku lanai ia muas (Joh 6:35)

Ogen               : Keluaren 12:1-14 (Tunggal)

Kotbah            : 1 Korinti 11:23-34 (Tunggal)

Tema               : Mperingeti Kiniseran Jesus

Kenca kita mentasi minggu-minggu Passion/minggu prapaskah seh me kita ibas sada wari si cukup penting sope Jumat simbelin eme wari kamis si Badia. Ija ibas wari kamis si Badia enda mpeturah ingeten kerna uga kin arusna kita ersikap ngalo-ngalo Jumat si Mbelin bagepe Paskah. Melala ije peristiwa si ngingetken kita kerna Uga Jesus ngalaken kiniseran/kematenNa bagepe encidahken persadanNa ras ajar-ajarna ngalaken kerina peristiwa e. Pembentuken karakter ajar-ajar pe ibenai ije nari ija berngi e me ibahan Lakon Persadan si perpudina ras ajar-ajar, Jesus murihi nahe ajar-ajar bagepe Jesus ngingetken kerna penghianaten ajar-ajar bagepe uga Petrus mersoken Ia. proses perdalanen Jesus ngalaken kematen labo menukah erkiteken proses e mpeturah aru ate ras kebiaren.

Keluaren 12:1-14

Ibas kitab keluaren enda ituriken kerna uga bangsa Israel arus ngerayaken paskah. Eme wari peringeten bagsa enda ndarat I taneh Mesir nari, bebas ibas perbudaken nari. Cara nginget kerna kerina perbahanen Tuhan e eme alu man roti si la itama ragi. Banci sibayangken maka adi roti la itama ragi seh kel piherna labo trepan pe. Enda ngingetkenca maka tupung ipanken roti e iinget bangsa enda maka sehkel piherna ras suina nggeluh ibas perbudaken Mesir. Bagepe dareh siitamaken I pintun jadi penginget uga Dibata mereken keselamaten nandangi bangsa e janah kerina enda teridah arah kepatuhen bangsa enda ibas megiken kerina perentah-perentah Dibata. Janah nina Tuhan man bangsa enda kerina enda arus ipestaken jadi pesta agama guna peringet-ingeten man bandu maka Tuhan nge si nggo ngelakokenca kerina enda, maka patut nge irayaken.

1 Korinti 11:23-34

Guna mpebagesi bahan khotbah enda arus lebe si ertiken arah ayat silebena eme ayat 17-22 erkiteken ijenda me bena-benana kai si ate Paulus iturikenna ibas bahan khotbah enda. Lakon persadan si Badia si ilakoken ibas pemenana eme lakon si mbelin si ilakoken radu ras dingen  ermeriah ukur. Ibas pelaksananna it arus si ijabab Paulus erkiteken banci mpeturah perpecahen ibas perpulungen e. Masalah utamana emekap erkiteken kinilangasupen ngukuasai diri kerna urusen perpanganen (urusen beltek). Piga-piga kalak nggo leben man lanai itimaina temanna (21-22) janah lit ka deba nggo pe ia man irumah empetkenna kel man ibas lakon e. Emaka nina Paulus deba lit si man seh mabuk ras besur tapi lit deba la kenan seh kelihen.

Emaka ibas bahan khotbah enda ituriken Paulus kerna erti Lakon persadan Sibadia eme pengajaren si rehna ibas Dibata nari guna mpegegehi kiniteken perpulungen. Roti ras anggur ibas lakon e eme symbol guna mperingeti kerna perbahanen ras pengorbanen yesus I kayu Persilang guna mereken keselamaten man manusia. gelah ula min lit persoalen ibas ngelakoken lakon persadan si Badia e arus kepe ilakoken alu kehamaten nandangi pengorbanen Dibata. Sebab arah minem tare calung e ras man roti e iberitaken me berita kematen Kristus she ngayak Ia reh mulihken. Kerina e iakoken guna peringet-ingetten nandangi perbahanen Dibata ibas kegeluhen manusia.

Emaka ijelasken Paulus mulihi uga arusna sikap perpulungen en guna tetap mpehaga Lakon persadan si badia tupung e eme : adi pulung erbahan Lakon  Si Badia e, Sitimanlah kam..arah enda itekanken Paulus makna Persadan ibas ngelakoken lakon e, labo mpeturah biak egois ras mementingken diri sendiri. Bagepe adi lit kalak melihe man lah ia lebe irumah nari gelah ula erkiteken kepulungen e mpeturah perubaten bagepe ngerehken ukumen Dibata. Kai situriken Paulus enda tentuna mereken kesadaren man banta maka sikapta ibas perpulungen e nentuken ka nge ku sikapta nandangi sekelewetta.

Invocatio

Perkatan Yesus enda nuriken alu tangkas maka ise si ersada ras Ia ndatken kegeluhen situhu-tuhu, kegeluhen si rasa lalap. kegeluhen si rasa lalap enda idatken arah sikapta reh ndahi Yesus ibas kiniteken. Alu bage persadanta Ras Dibata tentuna erbanca lit kemalemem ate.

Refleksi

1. Tema ta Mperingeti Kiniseran Jesus enda mereken pengertin man banta maka selaku perpulungen Tuhan arus kepe tetap ukurta ras ngataken bujur man Dibata ibas pengorbanen Jesus man banta. ibas lako persadan si Badia I kataken man perpulungen lakoken lah bage lako peringet-ingetten. Kata enda nurikenca maka tupung siinget perbahanen Tuhan mpeturah ukurta guna ngelakoken simehuli ibas kegeluhenta. Sebab adi labo si inget perbahanen Tuhan e ras kiniseran si man bentasenNa e labo siakap tempa meherga pe perbahanenNa e.
2. Arah persoalen perpulungen Korinti pe kita elajar guna banci menguasai diri. La egois ras mementingkan kepentingan sendiri. Sebab megati ka nge jadi ibas perpulungenta enda lanai siangkan erkiteken persoalen pangan (urusen beltek). Sementara si e eme masalah pribadi si arusna idungi secara pribadi gelah ula encedai kubas perpulungen e. Arah peringetten kerna pengorbanen Jesus ibas kerina peristiwa paskah enda pe ngingetken kita guna banci nggit berkorban nandangi sekelewetta.
3. Ibas kita ngelakoken kerina rangkaian paskah ibas tahun enda mari silaoken alu penginget kerna perbahanen Dibata ras alu pusuh si dem pengataken bujur ibas penemani ras pengkawali Dibata ibas kerina kiniseran siibentasi kita.

Pdt Siska Febriani Br Tarigan S.Th, MM

Kayu Embun Simalem