Bahan pekan-pekan wari 1, minggu 16 january 2022, erbrita seimeriah arah tinepana (mazmur 96:1-3,10-13

Invocatio         : Marilah siberitaken kemulian TUHAN, mari radu ras kita muji gelarNa (Masmur 34 : 4)

Ogen               : Markus 16 : 14 – 18

Kotbah            : Masmur 96 : 1 – 3, 10 – 13

Tema               : Erberita Si Meriah Arah Tinepa

Dibata e eme Kesah ntah Roh, emaka ibas kita rusaha meteh ras nandai ise ras uga Dibata e ibas kemahakuasanNa, kemulianNa, kerejinenNa, kinimbisanNa, biak-biakNa, kekelengenNa, perbahanen-perbahanenNa, ras seterusna, maka sie banci siidah ras sieteh arah ras ibas 2 cara eme Penyataan Umum ras Penyataan Khusus. Penyataan Umum eme arah kerina si enggo ijadiken Dibata si lit i doni bagepe i awang-awang bagi nina pemasmur ibas Mamsur 8:2, “O Tuhan, Tuhan kami, kemulianNdu teridah i belang-belang doni”. Bagepe ibas Masmur 19:2, “Langit encidahken kemulian Dibata, awang-awang erberita kerna perbahanenNa”. Jenari arah Penyataan Khusus eme arah kerehen Dibata ku doni enda si jadi manusia ibas Jesus Kristus bagi tersena ibas Injil Johanes 1:18, “Ise pe labo pernah ngidah Dibata. Tapi Anak Si Tonggal, si bali ras Dibata, dingen rembak ras Bapa, IA me si enggo mpetandaken Dibata”. Tole ibas Johanes 12:45 nina Jesus, “Ise ngidah Aku, idahna pe si nuruh Aku”.

Erkiteken sie me maka sue ras tema umum Pekan Kebaktin Penatalayanenta tahun 2022 enda eme Erberita Si Meriah Arah Tinepa janah e ka me tema-nta paksa enda si mengarahken, mabai kita nehi sasaren tahun pelayanen gerejanta ibas tahun 2022 enda eme Kreatif Merawat Lingkungan, arah e enggo silakoken, sidalanken, siikutken pengajuk siisehken pemasmur eme Daud ibas Masmur 34:4 sijadi invocationta eme siberitaken kemulian Tuhan, radu ras kita muji gelarNa.

Engkai maka siberitaken kemulian Tuhan dingen radu ras kita muji gelarNa ? Guna kai e silakoken ? Erkiteken perbahanenNa si mejin man kerina jelma (Masmur 96:3) si tangkas tuhu-tuhu iidah ras igejapken arah kekeken Jesus ibas si mate nari siibuktikenNa arah IA ncidah-cidahken baNa man ajar-ajarNa (Markus 16:14). Jesus mate guna nebusi manusia perdosa gelahna kerina kalak si tek man baNa dingen iperidiken terkelin ntah pe selamat sabap dosana enggo ialemi, geluhna enggo itebusi ibas kuasa dosa nari (Markus 16:16). Alu bage ia enggo iperembak ras ipersada mulihi ras Dibata. Gelahna Berita kerna Jesus sim aba keterkelinen ntah keselamaten e la ngadi terjeng bas ajar-ajar si pemena e saja, eme sababna Jesus mereken perentah man ajar-ajarNa e gelahna lawes niari doni enda jenari meritaken Berita Si Meriah man kerina manusia (Markus 16:15).

Enggo irancang ras iaturken Tuhan Jesus maka ajar-ajarNa ntah kalak si tek man baNa e meritaken Berita Si Meriah e la terjeng arah cakap, kata-kata, ranan saja tapi pe alu ncidahken tanda-tanda kuasa Jesus si mbelin, emaka man kalak si tek e iberekenNa kuasaNa mahanca kalak e banci ngelakoken si bali ras si ndube ilakokenNa tupung ringan denga i doni enda eme mpelawes setan-setan ibas gelar Jesus, ngerana ia ibas cakap si mbaru (Markus 16:17) eme cakap siipalasi ras ikuasai alu Kesah Si Badia mahanca tep-tep ranan, kata-kata siibelasken kalak si tek eme kesaksin kerna Tuhan Jesus, kata-kata si mpermuliaken Tuhan Jesus, kata-kata ntah cakap si maba guna si mehuli ras pehuliken man si megisa ras ngalokenca. Kuasa Jesus si lit ibas kalak si tek e mahanca ancamen arah rubia-rubia si erbisa enggo bene, racun si banci peturah penakit bahkan penakit si enggo lit pe banci malem (Markus 16:18). Sabap sada kesaksin kerna Dibata jadi kuh adi e isehken ras icidahken arah ranan ntah cakap bagepe tindaken, perbahanen.

Alu reh mbarna Berita Si Meriah e, mahanca reh teremna kalak si tek man Tuhan Jesus jenari geluhna itebusi dingen ipelimbarui, alu bage reh teremna kalak si nggeluhken geluhna ibas kegeluhen si mbaru eme kegeluhen si bali ras kegeluhen ras si enggo ilakoken Tuhan Jesus eme si pekenaken, si maba kiniulin ras kejuah-juahen la saja man manusia tapi pe man kerina tinepa Dibata sidebanna sabap kematen Jesus i kayu persilang bas haakekatna eme guna mperdameken ras mpersadaken manusia ras temanna manusia, manusia ras Dibata bagepe manusia ras doni enda termasuk kerina si ringan ije. Ertina litna pembaharuan ku si terulin. Alu bage tetap me iendeken ende-enden si mbaru, eme ende-enden si iendeken alu pengalamen geluh, nuansa, penghayaten ras penjiwaan si mbaru erkiteken wari ku wari tetap igejapken ras iidah karya penyelamaten Tuhan arah perbahanen-perbahanen siilakokenNa (Masmur 96:1-3).

Arah kegeluhen si pekenaken, si maba kiniulin ras kejuah-juahen man kerina tinepa e me mahanca langit ras doni, lawit ras isina kerina, juma ras isina kerina bagepe batang-batang kayu i kerangen banci ermeriah rikut ersurak muji Tuhan (Masmur 96:11-13) sabap nggejapken ntah ngenanami kiniulin Dibata arah kita manusia. Em siimaksudken tema-nta paksa enda Erberita Arah Kerina Tinepa.