Khotbah minggu, 15 Mei 2022, Rendelah Man Tuhan (Keluaran 15:19-21)

Minggu Kantate (rendelah)

Invocatio            : Ersurak aku dem keriahen janahku ngendeken ende-enden pujin man baNdu. Geluhku rende ersurak, sabab enggo aku ipulahiNdu (Msm. 71:23)

Ogen                   : Ketangkasen 4:8-11 (Tunggal)

Khotbah             : Keluaran 15:19-21 (Tunggal)

Tema                  : Rendelah Man Tuhan

Perlebe

Manusia ibekali Tuhan alu potensi guna rende dalanna mengekspresiken isi pusuhna, baik riah ukur tah ceda ate, rsd. Ertina manusia banci mengkomunikasiken kai si ni alamina, arapenna, ajarenna, rsd alu cara rende. Memang dalanta mpeseh pesan tertentu banci alu beragam cara, saja ibas kesempaten enda focus kita eme alu cara rende. Emaka lit nge sanga ia rende e tawa dingen ngandung, mecek pusuh tah ndatken semangat baru. Hal enda tergantung ku bas ritme ras isi syair laguna bage pe suasana batin kalak singendekenca.

Kentate ertina rendelah. Jadi ibas minggu kentate enda hal menarik siakap eme uga Dibata nepa manusia alu potensi muji ras mpebadiaken gelarNa arah perukuren, pengerana ras perbahanenta. Janah ope lenga terdauhen kita ngerana kerna rende muji Tuhan maka hal si penting eme uga kita lebe nggejapken ras ngidah keleng ate Dibata si jadi ulu keriahenta guna nehken puji-pujin. Sebab kalak si ngidah kiniulin Dibata nge si ngasup muji ras mpermuliaken gelarNa. Kiniulin Tuhan e me dalanta merangkai kata ras nada rikut ras ekspresi jiwa dingen gerak raga jadi sada harmoni simpermuliaken Tuhan Dibata. Guna ndatken pesan minggu kentate enda emaka ibabai me kita ku bas perenungen teks bahan kotbahta.

Pendalamen Teks

Masmur 71 enda ibere judul “Pertoton Kalak Si Enggo Metua”. Kuakap bicara arah judulna e pe enggo sidat pesan maka Pemasmur enda enggo melala mentasi erbage-bage pagit getirna kegeluhen I doni enda. Umur ras dinamika nggeluh ngajari ia maka lanai lit dalan guna mengeluh. Tugas pemasmur nalahken keadaan tapi mengambil pesan Tuhan arah bungkus kesusahen. Manusia labo itepa guna meratap ras tetap berharap. Manusia labo korban keadaan tapi pribadi si ibekali potensi mengubah ras membalikkan keadaan. Ngerenungken ayat 1-21, pemasmur nuri-nuri ibas hebatna perbahanen Dibata e, emaka ibas ayat 22-24 isimpulkenna masmurna alu uji-muji Tuhan. Lanai lit belas-belas si banci ngantiken perbahanen rende muji Tuhan e. Pesan Kantate enda jelas man pemasmur maka hanya man kalak sienggo ngidah ras ngejapken perbahanen ras keleng ae Tuhan e nge singasup rende muji Tuhan.

Ketangkasen 4 enda ibere judul “Cara Ersembah I Surga”. Penekanan kerna cara ersembah i surga jadi standard penembahen I doni. Sengaja pesan enda icidahken Tuhan man Johanes ibas sada ketangkasen (wahyu) guna jadi pelajaren simeherga man gereja Tuhan. I kelewet kursi kinirajan e lit empat mahluk, sidem mata arah lebe ras arah pudi siertina ncidahken kewaspadaan dingen ngidah kerina sinasalit. Ayo 4 mahluk enda bagi singa, jenggi lembu, manusia ras rajawali si mewakili nina erbage bage penafsir, “paling perkasa, paling mulia, paling bijaksana ras paling tangkas bas nggeluh ibas pertibi enda”.

Suari ras berngi la ia erngadi-ngadi rende muji Tuhan si mada kuasa, nai nari, gundari nari seh rasa lalap. Janah sanga 4  mahluk enda rende, 24 kalak pertua-pertua enda erjimpuh I lebe-lebe si kundul ibas kursi kerajaan e janahna menterken mahkotana I lebe-lebe kursi kinirajan e. Enda ncidahken maka kerina ersada, kerina penghuni surga bage pe ras doni arus ersada muji ras mpermuliaken Tuhan sebab IA ngenca layak ngaloken kehamatan ras puji-pujin.

Paduan suara sorgawi enda menggema bahkan patut kita nginget kidung dingen syairna eme guna ningetken gelah banci mengantisipasi ibas doni enda segalah ngasup tetap berpusat man Dibata I Surga. Kita harus ndalani geluh kita gundari ibas hubungen si sadar kempak tahta Dibata.

Keluaren 15 enda ibere judul “Ende-enden Musa”.  Ende-enden enda lahir arah keriahen ukur ija peristiwa bangsa Israel ngepari laut merah. Peristiwa enda njemba Musa ras bangsa Israel ncidahken tanda riah ukurna ras pujinna man Tuhan (ayat 1-18) janah teridah pe Miryam (kakak Musa) ergendang dingen landek ras kerina diberu-diberu singikutken ia. Saja perlu lit catatan tambahen maka kenca kejadin enda keriahen ukur dingen puji-pujin man Tuhan sirna, lenyap erkiteken sada kesusahen (erkiteken muas saja) bangsa enda jungut-jungut man Tuhan bahken nalahken Musa si sengaja mabai ia ku gurun pasir guna munuh ia kerina ije. Mbaru denga ngidah kuasa Tuhan, bene erkiteken perbeben nggeluh. Tapi Tuhan labo kebenen cara ncidahken keleng ateNa. IsuruhNa musa menterken kayu ku bas lau e maka berubah jadi ntebu. Bagem mbelinna keleng ate Tuhan man bangsaNa. Perbahanen Tuhan labo saja ibas mentasi laut merah tapi melala hal geluh enda jadi panggung Tuhan ncidahken keleng ateNa janah enda me njemba bangsaNa rende muji Tuhan setiap wari.

Pengkenaina

Iblis labo morah atena soranta mejile, janah labo mbiar ia bicara siendeken ende-enden rohani. Sebab bas rende enda melala penumpang gelap. Endekenna lagu rohani guna popularitasna pribadi dingen mujiken bana. Rende muji Tuhan e banci jadi pintu masuk iblis adi mahkotata, simeherganta la iendesken guna kemuliaan Tuhan tapi kemuliaan diri.

Rende man Tuhan enda jadi sada tema ibas bentuk perintah siarus silaksanaken labo soal pilihan tapi keharusan. Nembah Tuhan e labo penuh ketegangan tapi seni. Rende e seni, ekspresi jiwa dalam bentuk kata dan nada.  Saat kata dan nada berjumpa dalam irama dia menjelma menjadi sesuatu pesan yang hidup seperti perjumpan jiwa dan raga menyatu dalam diri manusia. Jadiken pesan rende muji Tuhan jadi pengajuk man banta tetap rende perban mbelinna perbahanen Dibata man banta.

Pdt. Daud Sembiring, S.Th

1. (Ketua Klasis Menara)