Paskah II, Senen, 18 April 2022, Tek Ia Kerina Man Tuhan (Keluaren 14: 26-31)

Invocatio         : Bagi enggo ialokendu Kristus Jesus jadi Tuhandu, geluh lah kam  ersada ras Ia ( Kol. 2:6)

Ogen               : Roma 6: 3-11

Kotbah            : Keluaren 14: 26-31

Tema               : Tek Ia Kerina Man Tuhan

1. KATA PERLEBE

Ibas mentasi wari-wari kegeluhen enda megati kita jumpa perbeben sierban gulut ukurta. Langa dung perbeben sisada enggo ka reh perbeben sideban derpa kita, si ija tentuna enda erbahansa turah mawen kebiaren, kendelen ate, putus asa rsd. Tempa-tempa sialami kita e lanai lit danci jumpa simehulina. Seh maka ibas ngalaken sibage rupa lit ka turah pinakit, lit ka si gendek ukurna seh maka i ujungina geluhna (bunuh diri) ras lit ka lanai siperiahen ras kalak sideban. Sebagai kalak Keristen labo pernah i janjiken maka lalit persoalen si reh ibas kegeluhen tapi sebagai kalak Kristen amin lit perbeben ngasup ia dalanisa alu tetap mindo gegeh ras kepentaren ibas Dibata nari lako danci dalani ras dungi perbebenta. Sebab tuhan labo ateNa anak-anakna bene/ talu ibas persoalen geluh doni enda. Hanya mawen manusia kurang tek man baNa si erbahansa ia mengandalken dirina ras kuasa doni enda. Ibas renungen Paskah ke II enda ibaba kita ngidah uga luar biasana Tuhan ibas mbela bangsa pilihenNa ras nyelamatkensa ibas perbebenna nari.

1. ISI

Adi si oge mulai ibas keluaren 14 maka teridah uga perdalanen bangsa Israel darat i Mesir nari menuju lawit merah. Janah teridah ka pe penyesalen raja Mesir sebab enggo i pelepasna kalak Israel lawes sebab lanai danci ia jadi budak man kalak Mesir. Emaka i ayakina kalak Israel e alu gereta perang tas tenarana janah teridah e labo sebanding alu kalak si erdalan. Maka labo perlu dekah man tentara Mesir e danci dapeti kalak enda si i ja sangana lit i tepi lawit. Ije turah kebiaren si mesangat man kalak Israel sebab enggo i idahna gereta perang ras ia kerina, emaka derkuh ia kerina mindo penampat man Dibata. Ras ngerana ka bangsa e man Musa janah mejungut/ complain sebab i anggapna Musa enggo nganggu ketenangen geluhna ras maba ia kerinana ibas bahaya. Kebiaren bangsa Israe nuduhken maka kurangna  kinitekenna man Tuhan tapi Musa ijenda mereken pergegeh guna petetap ukur gelah ola mbiar. Sebab Tuhan mereken penampat janah Dibata kap sibakal erperang guna bangsa e ( Kel.14: 13-14). Emaka ilakoken musa bagi kai i suruh Tuhan man bana, lako danci maba bangsa Israel ngepari lawit e. Alu kuasa Dibata simbelin erkelangken Musa maka bangsa Israel danci ngepari lawit e erdalan i babo taneh si kerah janah arah kawes kemuhen lau enggo bagi kawes kemuhen bagi lingling. Teridah malekat si dube erdalan arah miser ku pudi, binangun embun pe miser ku pudi ibas kelang-kelang bangsa Mesir ras Israel. Emaka ibas bahan kotbahta Keluaren 14:26-31 teridah ije uga Tuhan Dibata erbahan perlawanen man kalak Mesir alu kuasana sibelin. Isuruhna Musa guna pepinter tanna alu bage lau dai maler mulihken gedapken kerina tentara Mesir ras gereta perangna, i cubakena kiam kudarat tapi sada pe la danci selamat ibas lau e nari.  Maka teridah uga cara Dibata nyelamatken bangsa Israel ibas kalak Mesir nari tuhu-tuhu mbelin gegeh ras kuasa Tuhan, emaka biar bangsa Israek Kerinaman Tuhan janah tek ia kerina man Tuhan ras man musa suruh-suruhenatentara enggo nangdangi deher guna ngayaki.

Adi si kaitkeen kuaba bahan ogen Roma 6:3-11 maka ibas peridin kalak Kristen ije me kita i persada ibas kematen ras kekeken Keristus. Peridin ibas gereja mula-mula belin hubungena ras pengakun kiniteken. Peridin i bas paksa e eme peridin man kalak dewasa. Emaka ibas lakin peridin sekalak jelam harus muat sada keputusen/ memisahken diri ibas asal usul kekapiran/ kepercayaan: apakah latarbelakang Jahudi tah Yunani. Ibas Lakon peridin memasuki kegeluhen simbaru ibas kiniteken man Yesus Kristus. Peridin i lakoken alu penyelamaten secara total eme i cuci alu lau. Adi sekalak i peridiken eme seolah-olah ia i kuburken/ ersada ras kematen. Janah adi ia ndarat ibas lau nari maka seoleh-olah ia keke ibas kematen. Emaka i peridiken melambangken kematen ras kekeken mulihi. Mate ibas kegeluhen si male i bas dosa nari ras keke guna geluh simbaru si lit ibas lias ate. Ibas iperidiken maka “aku”nta simale enggo ikut mate i kayu persilang, gelah alu bage gegeh “ aku”nta si dem alu dosa e i runtuhken, dingen lanai kita jadi budak dosa (ay.6). ibas gerejanta GBKP lakon periddin i lakoken alu perciken lau labo alu selam. Lakon peridin labo hanya man kalak dewasa tapi pe man anak-anak (Kis. 2:39). Ibas liturgi GBKP maka lakin peridin i kataken bagenda:

1. Ipersada ras Kristus Yesus ibas kematen, kekekena geluh ibas geluh simbaru (Rom.6:3-4)
2. Tanda perkuah ate Dibata man kalak perdosa guna pengalemi dosa, penantangen idur kematen dingen idur si iblis nari gelah kita ndatken kegeluhen sirasa lalap ( 1 Kor.6:11)
3. Jadi perpulungen kalak Kristen ( 1 Kor 12:13)

Tanda peridin si enggo i aloken kita sebagai kalak Kristen e nuduhken salah sada tanda keleng ate Tuhan nangdangi kita. Gelah ula kita kita tetap lit ibas geluh simale tapi menjadi peribadi geluh ibas kegeluhen simbaru ibas Tuhan. Ibas kita ngaloken Yesus Kristus ibas geluhta ras ia jadi Tuahanta maka kita harus tetetap ersada ras Ia ( Kol.2:6).

III. APLIKASI

Seandaina saja ibas paksa enda kita ngenanami situasi bagi bangsa Israel, kita lanjumpai dalan pulah ibas masalah i lebe lit lawit ras i pudi lit musuh. Ula mbiar sebab kebiaren danci melemahken pengharapen ras Kinitekenta. Bagi Musa si erkiniteken ras erpengarapen man Dibata, teklah maka Dibata turun tangan ngantiken kita ngelawan musuhta/ persoalenta seh maka sidat kemalemen ate. Maka harus erlebuh, sidahi Tuhan ras ertoto maka i aloina me kita (Jer.29:12).

Pdt. Fenty Elisa Br Ginting, S.Th

(GBKP Rg Kuta Lepar)

__Klasis Medan Namorambe____