Minggu, 20 Maret 2022, Jera Tah Mate (Lukas 13:1-9)

Invocatio : Adi nggeluh kita, kita nggeluh guna Tuhan, janah adi mate kita kita mate guna Tuhan. Dage nggeluh ntah mate gia kita, sikerajangen Tuhan kap kita (Roma 14:8).

Ogen : Jesaya 55:6-9 (Responsoria)

Kotbah : Lukas 13:1-9 (Tunggal)

Tema : Jera ntah Mate

1. Perlebe

Ndalani kegeluhen enda, tentu la tersilahken kita maka maun-maun jumpa kita keguluten entah pe perbeben. Janah perbeben e labo milihi kalak siikenaina, entah e kalak sierkiniteken entah kin pe kalak silanandai Tuhan. Kerina jelma si nggeluh i doni enda tentu pernah ngaloken perbeben ibas geluhna.  Nai-nai nari usurkel sibegi perbeben e ikaitken ras perbahanen entahpe dosa. Megati tua-tuanta nai ngataken maka em kap ban dosana mbarenda, me enggo alokenna gundari ulihna, sakit ia la erngadi-ngadi.  Entah pe nina sekalak sipaksana lit perbebenna, entah kai nge dosangku e maka bagenda kel rehna perbeben bangku. Enda nuduhken maka ibas kita pe enggo tertanem nai-nai nari maka adi lit perbeben e erkiteken ulih dosanta man Dibata/Sinepa. La ndauhsa ras pemahamen enda bahan kotbahta wari enda pe bage ka nge, nuriken pemahamen kalak Jahudi maka adi lit kalak nggeluh ibas perbeben entah pe mate ibas bencana e pasti erkiteken dosana.

2. Isi

Lukas 13:1-5

Nas enda nuriken kerna lit piga-piga kalak maba berita man Jesus kerna kalak Galilea si enggo ibunuh Pilatus asum ia mpersembahken persembahen man Dibata (ay.1)[1]. Peristiwa pembunuhen banci sikataken e merupaken bencana siakibatken moral si lanai mehuli.  labo jelaskel pemberitan kerna ise saja si reh ndahi Jesus enda, entah e kalak Farisi, Saduki entah pe pemimpin Yahudi. Saja melala sierpengakap maka situhuna e kalak Jahudi erkiteken berita siibaba ras tanggapen Jesus kerna berita e nuduhken paham kalak Yahudi kerna kematen ras dosa paksa sie. Alasen kalak enda mpeseh berita e man Yesus guna nuduhken maka kalak sila ikenai perbeben ibas bentuk bencana e nge situhuna kalak si ipasu-pasu. Janah kalak singaloken bencana e eme kalak sierdosa.  Alu la langsung e ngataken maka kalak Gallilea si ije nari asalna Jesus e labo kalak si ipasu-pasu. Sekaligus enda nangsiken karya Dibata pe ibas pelayanen si ilakoken Yesus. Alasen sidebanna  ate kalak enda mbegiken  jabapen Yesus kerna kai sinilakoken Pilatus e. Alu bage adi lit komentar simeser sinibereken Yesus kerna Pilatus arapenna maka e jadi semangat man kalak Yahudi guna ngelawan pemerintahen Romawi tupung e. Dingen alasen sidebanna ka banci jadi kalak enda guna atena njebak Yesus gelah banci itangkap.

Tapi kai pe tujun kalak enda, Yesus mereken jabapen si la bagi iarapken kalak enda. Yesus nambahken cerita sidebanna kerna bencana siialoken 18 kalak mate siitindih menara Siloam.[2] Enda banci sikataken sebagai bencana alam sijadi tupung e.  Dingen ayat 3 ras 5 Yesus nekanken maka enda labo lit kaitenna ras dosa dingen labo jadi sada pembuktien maka kalak simate ibas bencana baik bencana moral ras bencana alam e erkiteken dosana simbelin. Yesus negasken maka labo lit kaiten dosa ras cara kematen sekalak jelma tapi dosa e nentuken kai sijadi kenca kematen. Siipertegas Yesus ibas enda maka kai pe sijadi ibas kegeluhen mabai manusia gelah tetap nulih ku Dibata ibas pengertin tetap nggeluhken geluhna mulihken man Tuhan. Proses jera/pertobaten nge si paling ipentingken ijenda gelah dosa e la ngikut2 kegeluhen manusia.

Lukas 13:6-9

Bagin enda penegasen Yesus kerna sangsi kalak si  la jera ibas ayat 5.  Batang ara ijenda nggambarken bangsa/kalak sienggo ipilih Dibata jadi sikerajangenna dingen enggo ngaloken melala kel erbage-bage pemere kiniulin.[3]  Kerina enda tentu lit tujunna dingen mbelin kel pengarapen siempu batang ara e gelah banci ngaloken buah simehuli. Tapi la kepe bage sijadi. Batang ara e la erbuah. Nuduhken maka kalak sienggo ngaloken kiniulin Dibata e la ngasup/nggit mereken ullih kiniulin ka ibas geluhna. Enda tentu mabai kekecewaan man empu kebun anggur (Dibata) e. Sebab labo terjeng la erbuah saja tapi situhuna batang ara e pe enggo muat bagin batang anggur sideban sibanci situhuna ije isuanken dingen mereken buah simeramis.[4] Alu bage siarus ilakoken eme nabah batang ara e gelah banci ka igantiken sidebanna. Ay. 8 enda bali ertina ras ayat 3,5. Ay 8 negasken maka aminna pe jelas ijenda salah batang ara la erbuah tapi tetap ibere kesempaten ngaloken kiniulin si tetap (itama pupuk) dingen ibereken waktu siistimewa (1 Tahun) gelah ia banci erbuah. Enda nuduhken maka siniarapken ibas kalak sinilah ibas Dibata nari eme proses jera/pertobaten gelah banci ncidahken kiniulin sienggo ialokenna sedekah enda. Tapi adi e pe lang maka nina ayat 9 tabah saja. Enda nuriken maka ibas kesempaten sinibereken Dibata arus ipakeken alu mehuli, sebab aminna pe Dibata dem kesabaren tapi ia pe dem kadilen ka nge.

3. Pengkenaina

Erbage-bage corak kegeluhen si lit ibas doni enda. Dingen kerina e banci jadi melala si langasup kita ngukurisa. Bahan kotbahta jelas nuriken erbage kerna kegeluhenta. Lit sikena perbeben erkiteken perbahanen kalak sideban (bencana moral), lit erkiteken situasi alam (bencana alam)dingen enda labo nuduhken maka kegeluhenta sipaksana lalit ibas perbeben ras bencana hulin asangken kalak enda. Labo banci ninta ibas zaman gundari enda maka kalak si mate ras terpapar covid buen dosana asangken kalak si la pernah terpapar kerna covid 9 enda. Ibas dampar sideban lit ka pe singenanami melala kiniulin tapi la ietehna nggeluh alu mehuli (batang ara i kebun anggur sierbuah). Ibas kerina kecibal enda ate bahan enda mabai kita gelah tetap min nggeluhken geluhta ibas Tuhan. Dingen ibas kerina bencana/perbeben sijadi rikutken kiniulin sinialoken kita pe tetap min kita natap kempak Dibata (Okuli : matangku tetap nare ku Jahwe), janah bahan enda negasken pe man banta maka sipenting kel ibas kegeluhenta enda labo ngkacai kerna kegeluhen kalak sideban tapi tetap min fokus geluhta makeken kata Dibata jadi kaca lebe man banta seh maka tuhu lit ije proses koreksi diri dingen mabai kita nggeluh ibas kinijeran/pertobaten ibas kerina si la mehuli iakap Dibata ibas geluhta. Sebab ibas kita jera ije kita ngaloken kegeluhen tapi ibas kita la nggit jera ije kita ngaloken kematen. Emaka  pilihenta nge jera ntah mate, sebab kesempaten labo reh dua kali.

[1] Thn 26M kaisar Romawi Tiberius mengangkat Pontius Pilatus jadi gubernur provinsi Yudea seh tahun 37 M. Ia ertugas njaga ketertiban/keamanan (tugas militer), mpepulung pajak (tugas keuangan) ras pe ngadili kerna rakyat Yudea (tugas hukum). Pembunuhen siilakoken Pilatus iperkiraken tupung wari raya Paskah erkiteken ibas wari raya e biasana ilakoken penyembelihen korban man Dibata.  Lenga lit idat jabapen si pasti kerna alasen Pilatus ngelakoken enda.

Ibas Alkitab Bahasa Indonesia ituriken maka dareh kalak enda icampurken Pilatus ras dareh korban siipersembahken (ay.1)

[2] Dr. Lightfoot nuriken maka kemungkinen menara Siloam enda berdampingen ras kolam Siloam (Betesda). Dingen ije me melala kalak sakit nimai lau e erburak. (Joh 5:3).

[3] Teridah arah batang ara si turah ibas kebun anggur, ibas taneh simehumur, irawat ras ijaga alu mehuli beda ras batang ara sidebanna sibiasana turah i tepi dalan saja (Mat 21:19).

[4] Enda nuduhken maka kalak si la ngasup nggeluh alu mehuli biasa jadi pengaruh buruk man sekitarna.  La terjenng ia ngenca la mehuli tapi pe jadi virus simabai maka sekelewetna e terbaba ka lau kinilaulinna e.

Pdt. Perianatalina br Sitepu

GBKP Namo Rambe

Klasis Medan Namorambe