Bahan PJJ, 20-26 Maret 2022, Ersada Ras Simehuli (Roma 12:9-13)

Bahan PJJ, 20-26 Maret 2022

Ogen : Roma 12:9-13

Tema : Ersada Ras Simehuli

Roma 12:9-13 enda nekanken uga kerna keleng ate ipakeken ibas kegeluhenta tep-tep warina. Sebab keleng ate e eme ciri khas kegeluhen kalak si tek sienggo ialokenna ka pe ibas Dibata nari.  Ogenta enda bagin ibas ajar Paulus kerna lagu langkah kalak kristen si tuhu-tuhu. Dingen adi ngerana kita kerna lagu langkah la banci silepasken ibas kebiasaan sekalak jelma sebab kebiasaan e simembentuk karakterna seh maka em jadi prilaku/lagu langkahna tep-tep wari. Paulus ngingetken ibas pengogen enda maka kalak kristen labo banci ncidahken pola hidup ibas keleng ate si pekulah-kulah (memakai topeng) sebab kalak kristen nggeluh tangkas ukur tangkas kata dingen teridah arah perbahanen. Kristen eme nggeluh ibas terang, emaka ciga atena sijahat siidentik alu kegelapen. Lanai lit ukur/niatna kuje bahken ngukurisa saja pe arusna min la ia nggit nari.

Paulus nekanken maka perayaken kalak kristen eme kerina kerna kiniulin. Iusahakenna tetap geluhna ersada ras kiniulin sienggo ibereken Dibata e man bana. Ersada ngertiken maka lanai terpisahken, menyatu, kai pe sijadi enggo tetap e lit ibas ia. Aminna pe rusur ijumpai ibas kegeluhen kerna pengajuk ntah tawaren simenggiurken gelah nadingken kiniulin (misalna korupsi, mabuk, erjudi, erlua-lua, rangap, rsd) tapi lanai ia ersura guna ngelakokenca. Ajuken Paulus enda itujukenna man kerina perpulungen Roma sebab iangkaina uga situasi Roma tupung e. Pengarapenna maka ula min lit kalak sinilah ibas kinitekenna e nari dingen ula min lit kalak si enggo tek e la ncidahken biak-biak kegeluhen kalak si tek/kristen seh maka e jadi batu antuken man kalak sidebanna ka.

Paulus nuriken maka keleng ate ibas kegeluhen kalak kristen eme keleng ate sibersifat aktif, silebe-leben ibas mpehaga teman, sikeleng-kelengen, ola mekisat (tutus/tekun), penuh semangat (ergiah-giah) ras pe tetap aktif ibas persekutun pribadi ras Dibata. Paulus njemba perpulungen  gelah tuhu-tuhu ncidahken kualitas kegeluhen kalak kristen e alu mehuli seh maka e erguna guna mpeteguhi kiniersadan i tengah-tengahna dingen mabai maka Dibata pe tetap ermulia ibas kerina kegeluhen. Enda pe jadi pengajuk ka nge man banta gelah kita kerina banci min tetap ngusahaken dirinta ersada ras kerina si mehuli sienggo iajarken Dibata man banta seh maka alu bage kita banci makeken kiniulin e bas kerina dampar geluhta seh maka ertambah-tambah tetap kiniersadaan ras kemalemen ateta ibas geluh enda.

Pdt. Perianatalina br Sitepu

GBKP Namo Rambe

Klasis Medan Namorambe