Pekan Penatalayanan wari 3, Tetap Megegeh ras Mejuah-juah (Jes 58:6-12)

Invocatio : “Tapi Aku si nambari kuta ras rayatna dingen Kubereken mulihi man bana kejuah-juahen” (Jer 33:6a)

Ogen        : 1 Tes 2:7-12

Khotbah   : Jes 58:6-12

Tema        : Tetap Megegeh ras Mejuah-juah

1. Perlebe

Kerina tinepa Dibata si lit ibas doni enda, erkawiten sada ras sidebanna. Labo banci teptep tinepa e ngataken maka ia me si mehulina, ulin asangken tinepa sidebanna. Sebab adi lalit tinepa sideban e, labo banci ia nggeluh sisada. Misalna, adi manusia ngataken maka ia me tinepa si mehuli ras simbelinna, seh maka lanai ia perlu sideban, enda labo banci sebab manusia nggeluh ibas sinuan-sinuan ras rubia-rubia nari. Tapi adi iidah kita genduari kerna keadan doni enda, tuhu-tuhu enggo melala perubahen si terjadi. La saja hubungan manusia ras manusia si enggo mulai ceda (hubungen sosial si kurang mehuli, lanai mediate sada ras sidebanna, mulai ngukuri dirina saja), bagepe lingkungenta si lanai bersahabat ras kita. Me siinget denga kita teman sekerja Dibata guna njagai isi doni enda? Bagepe kerna tanggung jawabta ndahiken siiperentahken Tuhan man banta eme mpekena-kena doni enda (band Kej 1:28). Alu bage seh kel pentingna manusia lako njagai kerina tinepa Dibata si lit ibas pertibi enda. Arah si e erbanca maka teindah kiniulin Dibata ibas kerina tinepaNa e.  Enda me si jadi perenungen man banta ibas Pekan Penatalayanen berngi peteluken enda.

2. Isi
3. Invocatio

Sada si jadi pengarapen si mbelin man kalak si kote subuk kerna akibat pinakit, perbeben geluh, ras sidebanna eme tambar gelah dat kesembuhen, ketenangen, ras kejuah-juahen. Aminnn pe mungkin enggo jumpa ras dokter si pas, rikut pe tambar si meherga tapi lalap denga lenga malem ibas sakitta nari. Ije nge teridah kuasa ras peran Dibata man tinepaNa. Ibas invocatiota, ibereken sada pemahaman man banta bahwa Dibata me si nepa langit ras doni, IA si mada kuasa, IA ngenca si banci nambari dingen simereken mulihi kejuah-juahen man bangsaNa. Arah IA mpepalem kerinana maka malem ateta nggeluh ibas inganta tading.

1. Khotbah

Ibas bahan khotbahta,  iidah Jesaya i tengah-tengah bangsa Israel lit pemahaman si la payo kerna puasa. Ija puasa siilakoken bangsa enda hanya sebatas rutinitas, aturen entah pe ritual belaka, seh makana si jadi tujunna erpuasa eme lit unsur tuntuten gelah idengkehken Tuhan pertotonna sebab enggo ilakokenna siiperentahken Dibata. Emakana ituriken Jesaya kerna kai sijadi sura-sura Tuhan nandangi bangsa Israel. Tangkas ijelaskenna bahwa ibas erpuasa e labo hanya la man ras minem. Tapi ibas erpuasa e cidahkenka kerna pertobaten. Eme tegakken kebenaren rasa mediate nandangi kalak si deban (ayat 6-7), la erbahan kejahaten man kalak sideban (ayat 9), nampati kalak si lit ibas kesusahen (ayat 10). Adi e kerina ilakoken bangsa enda, maka isehken Dibata kerina siipadankenNa eme bangsa enda ipasu-pasuNa, itegu-teguNa dingen mesuri bangsa enda alu mehuli ras tetap mereken gegeh ras kejuah-juahen (ayat 11).

1. Ogen

Paulus pe nuriken man perpulungen i Tesalonika kerna kekelengenna man perpulungen e. Icidahkenna la atena mberatken perpulungen e ibas mindo kai-kai pe erkiteken ia sekalak rasul Kristus. Ibas ia mberitaken berita si meriah kerna keselamatan, ibanna ia desken sekalak pernanden si erkeleng ate nandangi anakna. Bagepe perbahanen sekalak perbapan nandangi anakna. Orang tua pasti ipekena-kenana anak-anakna bali bagi Dibata si tetap engkelengi kita salu mpekena-kena kita ras mereken gegeh bagepe kejuah-juahen man manusia gelah banci ka kita mpekena-kena kegeluhen doni enda.

3. Aplikasi

• Arah renungenta enda, tangkas bahwa ijadiken Dibata kita jadi temanNa guna mpekena-kena ras njagai doni enda. Sura-suraNa eme gelah kerina siitepaNa tetap mehuli, sebab melala kel si enggo erban doni enda ceda. Tujuanna gelah kita tetap nggeluh ngenanami kiniulin siisikapken Dibata man banta. Ulihna kita ndatken kesehaten ras kejuah-juahen ibas ndalani kegeluhenta.
• Kita tetap nggeluh alu dem keleng ate, sisampat-sampaten, mediate, gelah doni enda pe mereken kiniulin man banta alu bage lanai kita ngukuri dirita saja.
• Mari sidahiken dahin si mehuli si ngena ate Tuhan gelah kerinana tetap mehuli.
• Temata, tetap megegeh ras mejuah-juah. Enda me padan siibereken Dibata man banta. Sebab pusuh si ngenanami kejuah-juahen pasti nggejabken kemaleman ate, sebab tercukupi kerina keperlunta arah dahin siidahiken kita. Inget kita erdahin i doni siitepa Dibata, adi la mejile inganta erdahin e, maka ulih siialoken kita pe labo ka mehuli. Sijaga ras sirawat e kerina gelah mejuah-juah kita. Amin

Pdt. Melda P. Br. Surbakti, S. Th

(Rg. Simalingkar A)

__Klasis Medan Namorambe___