Khotbah Minggu 09 Januari 2022, Ephipanias I, Jesus Kap Anak Dibata (Lukas 3:15-17, 21-22)

Khotbah Minggu 09 Januari 2022, Ephipanias I, Jesus Kap Anak Dibata (Lukas 3:15-17, 21-22)

Invocatio         : Dibata enggo ncidahken kekelengenNa man banta alu nuruh anakNa Si Tonggal ku doni enda, gelah kita nggeluh arah IA (1 Joh. 4:9)

Ogen               : Jesaya 43:1-7 (A)

Khotbah          : Lukas 3:15-17, 21-22 (T)

Tema              : Jesus Kap Anak Dibata


Perlebe

Berita Si Meriah kerna Jesus Anak Dibata pernah menggoncang  agama Jahudi bahken e jadi sejarah kelam, cataten pahit man bana sebab kehadiren Jesus meluluhlahtahken konsep teologis, tradisi mapan, kenyamanan kaum klerus Rumah Pertoton. Dampak perbahanen ras pengajarenNa e maba IA ku bas ukumen kayu persilang. Konspirasi politik ibalut keselamaten sada bangsa ibungkus konsep teologis si papak e me penghujaten man Tuhan maka Jesus mate ibas kayu persilang. Perbahanen, kepedulian sosial Jesus tuhu-tuhu labo tersimbak mata si natap, cuping si megi. Kalak si sakit ipepalem, kalak mate ipegeluh, kalak si melehe ibere man, kalak si ikuasai setan ibebasken, rsd. Kiniulin ras kehebatenNa e labo ise pe pang mersokenca. PengajarenNa pe tuhu-tuhu erkuasa ras mendalam la bagi ahli taurat (Doktor Teologi). Ise pe la ngasup erdebat ras IA janah kerna hal siniajarkenNa bage pe penungkunen kalak man baNa. Situhuna jelma sinterem tek kerna kebenaren si iturikenNa e tapi la kerina nggit ngaloken ras nggeluhken kebenaren e bas dirina. Perbahanen ras pengajaren Jesus teruji ras tergejap man jelma si nterem tapi la kerina nggit ngalokenca. Ibas Minggu Ephipanias enda berita enda erkusik, erbelas, ngerana mulihi man banta maka Jesus e Anak Dibata ibas paksa gundari.

PEBAGESI BAHAN

Johanes Peridiken menaken dahinna maba misi pertobaten, jera ibas dosa-dosa nari dingen iperidiken alu lau tanda jera. Bentuk pertobaten si nimaksudken Johanes sipemena eme pertobatan moral etis, dalanken si benar ras adil, ‘Cidahkenlah arah perbahanenndu tandana kam enggo jera ibas dosa nari’ (ay 8). Peduaken, Johanes maba ku bas pertobaten spiritual. Pertobatan spiritual ertina pertobatan labo soal tampilan tatapen mata saja tapi kualitas pusuh, cara rukur, pengelako bahken hubungen intensifna ras Tuhan. Identitas anak perjanjian tapi gaya hidup dem perselingkuhan iman. Identitas anak kandung tapi kualitas bagi anak tiri. Nutus beribadah, rajin mereken persepuluhen, mejile ertoto tapi kualitas iman, moral ndauh kal ulin asangken kalak perbegu. Tampilan beradab tapi pengelako biadab. Tempa sibuk urusen agama, ibungkus kesalehen munafik padahal labo pernah sibuk berurusen ras Tuhan. Tabiat enda me iidah Johanes ibas diri kalak Jahudi ibas jamanna. Jadi pertobaten spiritual eme pergaulen intim ras Tuhan mengubah totalitas geluhna. Johanes maba berita pertobaten enda ndauh arah simbol-simbol keagamaan (mimbar, baju jubahrsd).

Geraken pertobaten si ibaba Johanes enda sendalen ras konteks pengarapen Mesianis si niarapken kalak Israel. Ibas masa e pengarapen endae tuhu-tuhu enggo klimaks seh maka melala muncul geraken grilyawan, geraken kerohanian, gerakan social terkadang jadi pusat perhatian tanda si ibereken Tuhan man bangsa Israel sebab enggo piga ratus tahun ia ertima-tima. Uga dekahna ijajah bangsa-bangsa simbelin (Babel, Media-Persia, Romawi) erbahanca semangat enda tuhu-tuhu waktu ertima simberat ras niarap. Maka wajar saja Johanes Peridiken sosok si luar biasa enda ianggapna Mesias si ipadanken e.

Konteks pengarapen Mesianis masih ibas tataren nasionalis, eksklusif (tertutup man bangsa si deban). Keadan harus ibalik, kerehen Mesias e njadiken ia bangsa pilihen, penguasa doni sedangken bangsa si deban jadi budakna. Konsep enda berbeda kal bagi si iberitaken Johanes ras si ibaba Jesus eme Mesianis spiritual, eskatologis dingen terbuka man kerina jelma. Kerajaan siibangunNa tahan rasa lalap. Menang la arus naluken tapi memenangken kerina jelma arah dalan kayu persilang. Emaka wajar saja kalak Jahudi e kecewa total. Arapenna dirina saja, medoni, sempit. Pengarapen dingen ekspektasi kerna konsep er Dibatasi bagenda banci saja ngkenai kerina jelma adi er Dibata hanya sebatas kebutuhen dirina saja, medoni, sura-sura daging ngenca perayaken labo kemuliaan Dibata ras kegeluhen rasa lalap.

Lit telu penekenan berita pertobaten si ipeseh Johanes man jelma sinterem. Pertama, ituntutna jelma si nterem segelah si sampat-sampaten. Injil social enda penting sebab Dibata la mbebasken sekalak si erkelimpahen sedangkan si deban kelsehen. Keseimbangen ras keadilen e perlu kal. Peduaken, perentah segelah ula nadingken pendahin. Seolah-olah adi ertobat lit kelasna. Ku RumahPertoton e kelas eksekutif sedangken erdahin e kelas ekonomi/kelas dua. Alasen Johenas e kritiken sebab ibas jaman e lit dua kelompok si ipandang bermasalah ibas pendahinna eme pemungut cuke simungut cuke sebangsana ras prajurit Jahudi si tugasna njaga perdamen Romawi. Duana enda erdahin guna bangsa penjajah, penguasa asing. Penekanen Johanes maka kerjakenlah keselamatenndu alu ndalanken pendahin alu sikap dingen mehuli. Sekalak jelma hanya banci melayani Dibata alu mehuli erkelang-kelangken pendahinna sekalak-sekalak. Erdahin pe ibadah man Dibata. Peteluken, Johanes tek maka ia hanya perintis dalam. Tandaina ise ia ras tugas si ibereken man bana. Mesias si iarapken e sangana reh maba keterkelinen man kerina manusia. Emaka jelas khotbah Johanes enda labo menguraiken persoalen seluk beluk teologis tapi ngerana kerna kegeluhen.

Pengakunkerna Jesus e Anak Dibata sipertama ndarat arah kesaksin Johanes, “aku mperdiken kam alu lau, tapi reh me sekalak si belinen asa aku. Ngosari nail sepatuna pe aku la metunggung. IA pagi mperidiken kam alu Kesah Si Badia ras api” (ay. 16). Biasana bas kalak Jahudi hanya budak kafir ngenca ibereken kesempaten mbuka nail sepatu tuanna, janah e pe akap Johanesia ia la metunggung padahal ibas panggung nasional ia enggo papan atas. Orientasi Johanes tetap la berubah ibas melalana sanjungen jelma sinterem ia tetap mpeteruk bana janah meritaken Jesus kap Mesias siarapken kita. Penangkapen Johanes ibas raja Herodes nari erbahanca panggung kosong gelah igantiken Jesus panggung simbaru. Aktor utamana enggo masuk ibas cerita keselamaten. Pengakun peduaken ndarat arah kesaksin Bapa i surge nari. Tupung Jesus ertoto maka talang me langit janah Kesah Si Badia nusur kubaboNa bagi nderapati. Terbegi me sora i surge nari nina, “Kam kap AnakKu si Kukelengi. Kam kap singena ateKu” (ay 22). Pernyataan enda ningetken kita kerna Kejadin 22:2; Masmur 2:7;Yesaya 42:1; Jesaya 53, ija arah gabungen melala konteks enda Jesus sebage Anak Dibata igambarken Mesias e Raja si merentah doni ras surge arus menempuh salib sebage dalam kemenangen. Ia hadir sebage sekalak juak-juak si kelsehen nehken tugas ras tanggungjawabna.

PENGKENAINA

Minggu enda bengket me kita ku bas ephipanias 1 ibabai kita ngidah keleng ate Tuhan e teridah arah bahan invocationta “Dibata enggo ncidahken kekelengenNa man banta alu nuruh AnakNa Si Tonggal ku doni enda, gelah kita nggelu harah IA (1 Joh. 4:9). Adi anakNa si Tonggal pe iberekenNa gelah kita nggeluh dingen terkelin apai ka hanya sebatas kebutuhen nggeluh i doni enda. Ula nari raguken keleng ate Tuhan e. Bahken Jesaya pe mpetetap ukur kalak ibas pembuangen segelah ula mbiar ras aru ate mentasi erbage-bage kesusahen reh. Nina Tuhan, “Ola kam mbiar….adi ikeparindu lau si mbages, Aku ras kam, la kam gedap ibas kesusahen si mesangat, adi ibentasindu api si gurlah, la meseng kam, la kam talu ibas percuban si mberat. Sebab Aku kapTuhan Dibatandu…” (Jes 43:1-2). Salah sada perenungen man banta maka keleng ate Tuhan enda hadir ibas setiap dalan si bentasi kita, masalah si hadapi kita. Tuhan e Immanuel.

Pengakun Jesus e Anak Dibata la saja ibas tataren teori, dogmatis tapi seh kubas pengalamen erkiniteken si nggeluh. Pengakun Jesus e Anak Dibata mengubah totalitas kegeluhenta. Adi iandingken handphone kita la saja mengubah cashingna tapi perangkatna pe kerina. La saja pertobatan moral tapi pe pertobatan spiritual. Jadi pemaknaan kerna ephipanias, keleng ate Dibata e arus teridah arah pertobaten. Tanpa pertobaten maka pengakun kerna Jesus Anak  Dibata hanya tahap percaya la seh kubas tahap mpercayaken diri man Tuhan.

Ephipanias enda kesempaten man banta guna tetap meteruk ukur gia seisi doni mujiken kita, janah la kitik ukur gia la lit simperdiateken kita. La lit alasen kita muat bagin si labo sekerajangenta. Mereken kehamaten tetap man Tuhan dingen kalak si ambil bagian ibas dalanta ndatken pujin e. Misalna, kita sukses labo saja perban beluh tatapi dukungen keluarga ras teman-teman. Ia pe layak ndatken pujin ras kehamaten. Ula pernah meganjang ukur ras metuda ngerana.

Bagi Johanes si pang erberita kerna dosa ras ukumen, seharusna ephipanias enda ningetken kita tetap pang ras ngasup menyuarakan suara kenabian ngenehen keboboroken si terjadi isekelewetta. Gia mungkin banci jadi resiko reh ndapeti kita. Tindaken si la mehuli ija pe lit, ibas ingan pendahin, keluarga bahken gereja. Si terpenting labo notoken sie gelah lanai lit ibabo doni enda, saja apakah lit denga kita ambil bagin guna jadi agen perubahan. Panggung Johanes enggo lepus tapi panggunta gundari mpesikap dalan Tuhan mentas, kerehen Tuhan si peduakaliken pedas me reh. Masa Johanes enggo mentas tapi semangat ersaksina tetap lalap lit man kalak singakuken Jesus e Anak Dibata. Mari jadiken ersaksi e jadi gaya hidupta.

Selamat ephipanias

Selamat ncidahken keleng ate labo hanya sebatas kata-kata manis

Selamat bertobat ras berubah.

Selamat ndatken kualitas anak-anak Dibata.

Amin


Pdt. Daud R.T. Sembiring, S.Th

(Ketua Klasis Medan Namorambe)

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba