Khotbah 31 Desember 2021, Dibata Nikapken Wari  Si Pepagi Man Banta (Jeremia 29:10-14)

Invocatio :    Keleng ateNa mbincar tep-tep erpagi-pagi, bali tetapna ras matawari si pultak arah Timur. (Perngandungen 3:23)

Ogen             : Efesus 5:13-16 (T)

Khotbah        : Jeremia 29:10-14 (T)

Tema            : Dibata Nikapken Wari  Si Pepagi Man Banta

KATA PERLEBE

Patut sikataken bujur man Tuhan Dibata sebab  enggo seh kita kubas wari siperpudina ibas tahun enda, piga-piga jam nari sitadingkenme tahun enda. Sedekah tahun 2021 enda mbue pengalamen sialoken subuk sierbanca ukurta meriah ntah sierbanca ndele ukurta,janah singgur pe sipagit dingen sintebu. Tapi ibabo sie kerina arus tetap siakui maka Dibata tetap nge nemani ras mpengasup kita guna ndalani kegeluhen enda. Seh maka banci denga kita ikut bas kebaktin enda guna ngataken bujur man Dibata.

PEBAGESI TEKS

Kata Dibata si jadi palas renungenta I bas Jeremia 29 nari enda eme surat siikirimken Jeremia man kalak Juda si lit I pembuangen i Babel (Babilonia) sedekah 70 tahun mulai tahun 597 SM tupung raja Yoyakhin erkuasa janah Jerusalem iradasken (587-586 SM). Seh maka kegeluhen bangsa enda tuhu-tuhu ngenanami mbue kesusahen.Tapi Tuhan tetap mindo man bangsa enda gelah tetap ngenen kusimehulina ibas situasi sipaksana inanamina e. Eme ngenen arah kacamata kiniteken nari, seh maka  banci kerina e I ertiken mabai ku simehuli nge. Kerina e banci terjadi labo berarti Tuhan balas dendam seh maka iukumNa bangsa enda erkiteken kelapatuhenna man Dibata, Dibata enggo nikapken rencana si mehuli i balik sie kerina. Arah angka 70 tahun bangsa enda ibuang ku Babel. E ngatakenca maka Dibata enggo njamini kebebasan ras masa depan bangsa Juda. Sedekah 70 tahun ngenca bangsa e I bas pembuangen, la banci lebih ras la banci kurang. Kenca sie Dibata maba  bangsa enda mulih ku tanehna, gelah senang labo gelah cilaka (Tuhan yang memberikan hari depan yang penuh harapan). Emaka Dibata tetap mindo man bangsa enda amin gia i taneh pembuangen denga gelah tetap ngelakoken dahin-dahinna bagi tupung ia tading ikutana sendiri (ay 5-7) Sedekah masa pembuangen e mabai bangsa enda gelah nggejabken kelepakenna ras perbahanen si la sentudu ras peraten Tuhan, emaka erlebuh me bangsa e kempak Dibata janah ertoto. I je me teridah keleng ate Tuhan si la ersibar jadi pergegeh ras mpeturah semangat i bas ngalaken situasi perbeben sila tanggung pagitna. Tambahen pengajaren siidatken i bas situasi enda eme kengasupen guna notoken si enggo naluken ia. Banci si bandingken

ajaren Tuhan Jesus ibas ngkelengi imbang (Mat 5:43-48).

Arah Ogen nuriken kerna orat nggeluh anak-anak terang sincidahken kegeluhen kalak si tek, sincidahken terang e ku sekelewetna. Ciga atena kejahaten ras perbahanen-perbahanen si nembah man dibata-dibata sideban. Bagepe semangat guna ngelakoken pencerahen siteridah arah ende-enden (ay 14) “Medakkenlah, o kam si tunduh, janah kekenlah I bas si mate nari! Ersinalsal me Kristus ku babondu.” Teridah  tetap lit semangat kekeken kalak si jera atena I bas dosa nari ku bas persadan  ras Tuhan singgeluh. Tole Paulus ngingetken maka kalak si enggo jera tetaplah erdalan i bas terang Tuhan ras ngelakoken kesaksin alu aktif.

Ibas Invocatio ngerana kerna keleng ate ras perkuah ate Tuhan si la pernah keri. Kesetiaan Tuhan nandangi bangsaNa bagi tetapna matawari pultak erpagi-pagi. Adi tetap erpengarapen man Tuhan maka janji si pasti iberekenNa.

KATA PENDUNGI

Arah kebaktin nutup tahun enda mari sipakeken waktunta guna mengevaluasi diri, seh ja enggo sipakeken wari-wari geluhta alu ndalanken singena ateNa. Ras ku jange tetap pengala pengarapenta guna ndalani wari-wari geluhta ku tahun sireh eme tahun simbaru sinandangi sibengketi me. Kata Dibata si enggo sibegiken arah telu bagin enda mabai kita ndatken gegeh lako ndalani tahun simbaru alu gegeh ras pengarapen I bas  Tuhan saja. Amin gia tahun 2022 enda pe rahasia denga nge kerina man banta lenga bo sieteh kai sijadi pagin,tapi pelciklah ukurta guna ngalo-ngalosa ras ndalanisa. Sebab Tuhan Dibatanta tetap nge mereken rencana simehuli man kalak simalang  man baNa. Ernalem man Dibata saja, eme kunci bas ngaloken  masa depan simehuli ras kemalemen ate si tuhu-tuhu. Emaka sialoken ras sidalani me tahun simbaru alu tetap erpengarapen man Dibata, maka Dibata nikapken wari sipepagi man banta, endame temanta. Siendeskenlah geluhta labo ku bas dugaan ras ramalan tapi kubas  pasu-pasu ras keleng ateNa.

Pdt Agustina Br Peranginangin S.Th, M.Psi.