Malam Natal, 24 Desember 2021, IpepalemNa Pusuh Si Getem (Masmur 147:1-11)

Invocatio        : Ia pagi jadi kalak si mbelin dingen i gelari pe Anak Dibata si Meganjangna kal. Tuhan Dibata pagi njadiken Ia jadi Raja bagi ninina Daud. (Lukas 1:32)

Ogen               : Matius 1:18-23 (Tunggal)

Kotbah           : Masmur 147:1-11 (Responsoria)

Tema              : IpepalemNa Pusuh Si Getem

Teks kotbahta Masmur 147 :1-11 sinuriken kerna pendilo guna muji Dibata. Masmur enda i tulis kenca bangsa Jahudi mulih ibas tanah pembuangen nari, sebagai penulis eme Daud. Janah Masmur enda selaras ras Masmur 145 si nuriken kerna ende-enden pengataken bujur Daud man Dibata. kitab Masmur 147:1-11 enda banci ibagi kubas dua bagin penting :

1. Kita i dilo guna muji Dibata (1,7)
2. Alasen Dibata harus ipuji : a. Dibata si nepa doni ras isina (4, 5, 8, 9), b. Dibata si mereken pengapul man bangsaNa (3, 6, 10, 11), c. Dibata si milih bangsa Israel jadi bangsa pilihenNa ras i pantekina mulihi Jerusalem (2).

Masmur Daud muji Dibata erkiteken i gejapna perbahanen Tuhan si mbelin ibas geluhna, si pertama ibas ayat 1 i turiken “Pujilah TUHAN! andiko ulina rende muji Dibata, andiko senangna ras bujurna muji Ia”. Emaka mulihi i turiken pemasmur ibas ayat 7, “Endekenlah ende-enden pujin man Tuhan, rendelah muji Tuhan alu kulcapi.” Si menekanken maka puji-pujin e terarah ras berpusat man Dibata. Pujin man Dibata e me sada tanggung jawabta, emaka silakokenlah alu meriah ukur ula alu paksaan. Pujin man Dibata e me sada perbahanen si ngena ateNa ras e jadi tujun Dibata nandangi tinepaNa.

Alasen Dibata harus i puji erkiteken Ia layak ngaloken pujin si meganjangna, hal enda bagi ituriken ibas ayat 2, “Jerusalem i panteki TUHAN kap mulihi, kalak buangen i babaNa ka mulihi”. Perhatin Dibata nandangi bangsa pilihenNa. Bangsa si i buang selama 70 tahun mulihi i bawa mulih ku Jerusalem, Jerusalem si enggo runtuh mulihi i bangun. Bagepe pengapul i bereken man bangsana si tuhu-tuhu jera ibas dosana nari. Ibas ayat 3, “IpepalemNa kalak si getem pusuhna, dingen i balutiN a ugahna.” Dibata tetap mereken kesempaten man bangsaNa, pembuangen ku Babel labo sepenuhna e hukuman man bangsa pilihenNa, tapi e terjadi segelah Bangsa pilihenNa tuhu-tuhu nandai Dibata alu payo. Dibata mereken kedamen,  pengalemi dosa man bangsaNa si git jera ras kesempatan guna mengalami pembebasan ibas pembuangen nari.

Perbahanen Dibata tole si jadi alasan Masmur Daud muji Ia eme teridah arah kekuasanNa nandangi benda-benda penerang i langit. Dibata nentuken beligan bintang-bintang i langit dingen ibahanNa pe gelarna sada-sadai. Enda salah sada ibas sekian juta lebih perbahanen Dibata si ituriken Daud, maka Dibata e mbelin dingen mbisa kal kap Ia ras kepentarenNa pe la tersipati (ayat 4-5). Enda nandaken maka Dibata eme pencipta si erkuasa nandangi ciptanenNa ras Dibata banci nelakoken hal si mehuli nandangi tinepeNa. Pemeteh manusia terbatas ras banci keri, tapi pemeteh Dibata lalit batasna ras la terjangkau kita. Janah kalak simeteruk i peganjangNa, tapi kalak jahat i dampeskenNa (ayat 6). KeadilenNa guna membela kalak si tertindas, alu keleng atena i sampatina manusia. Man kalak jahat nembeh kel ate Dibata, ras i berekenna ukumen man bana. Manusia si peganjangken diri i peteruk Dibata, tapi manusia si meteruk ukur i peganjangken Dibata. Bageme kelengna ate Dibata nandangi manusia. Dibata tetap terus memelihara. Banci si idah cara Dibata guna engkelengi tinepana ibas ayat 8-9, “Ia kap si engkibangken embun i langit, si mereken udan ku doni, si peturah dukut i uruk-uruk. Ia kap si mereken nakan man rubia-rubia, si mere nakan man perik kak si ciap-ciap kua ia.” Bage raturna Dibata njagai tinepana ras encukupken kerina keperlunna. I aturken Dibata katawari tinepana e butuh las matawari bagepe udan guna kegeluhenna.

Ibas ayat 10 -11, “Tuhan la ngena ateNa kuda si megegeh, La diateNa tentera-tentera si mbisa. Tapi ngena ateNa man kalak si erkemalangen man baNa, si ernalem man keleng ateNa si tetap.” Kuda si megegeh maksudna, Kuda e me salah sada alat guna erperang, si megegeh, si banci pedas kiam guna maba tentera-tentera si mbisa guna erperang. Si hanya mengandalken gegeh kekuatenna tanpa mengandalken Dibata si mada geluhna. Tapi Dibata erngena ate man kalak si erkemalangen man baNa ras erkeleng ate man baNa. Keberhasilenta la erbanca meganjang ukurta ras kegagalenta la erbanca surut ukurta guna ngertiken perbahanen Tuhan si mbelin ibas geluhta. Dibata e si mada kuasa emaka mari si pujilah Ia.

Bahan ogenta Matius 1:18-23, nuriken kerna Ketubuhen Jesus Kristus. Sejarah ketubuhen Jesus enda i pake Dibata Maria ras Jusuf guna jadi alat Dibata nehken keselamatan man Doni enda. Tupung  Jusuf ras Maria ertunangen, i begi Jusuf Maria enggo mehuli kulana. Awalna Jusuf ersura-sura guna nirangken mMaria alu sinik-sinik. Tapi kenca Malekat Tuhan ngerana man Jusuf arah nipina, O Jusup keksusuren Daud, ola kam mbiar muat Maria jadi ndeharandu. Sebab anak si lit ibas bertinna e jadi erkiteken kuasa Kesah Dibata. i pupusna pagi sekalak anak dilaki janah harus ibahanndu gelarna Jesus sebab ia me pagi si nebusi bangsaNa ibas dosa-dosa nari (ayat 20-21). Jenari Jusuf tek man Dibata ras iikutkena kata malekat e. kecedan ate ras kearun ate si harus i dalanina guna kemulian doni enda ije teridah. Dibata la nadingken kalak si setia amin ibas kiniseranna sekalipun. Ketaaten Jusuf ras Maria man Dibata, mahanca pusuh si luka pe jadi malem. Erkiteken kuasa ras penampat Dibata.

Puji-pujin si meganjangna si isehken Daud bas bahan renungenta, nuriken man banta maka Dibata la pernah nadingken kita, Dibata si erkuas dingen erdolat si tetap memperdiateken anak-anakNa. Alu erbagai cara Dibata mabai tinepaNa guna nandai Ia alu payo ras ekiniteken man baNa. Bagi tema ibas Kebaktian malam natal enda “IpepalemNa Pusuh Si Getem”. Enggo tangkas i turiken Daud uga Dibata mereken pengapul nandangi Bangsa pilihenNa, tuhu-tuhu i kelengiNa ras i sampatina ibas kiniseranna nari. Dibata erkeleng ate nandangi anak-anak si tetap setia ras git mulihi reh ersembah kempaksa. Arah bahan Ogen, Kotbah nuduhken uga belinna perbahanen Dibata bas geluhta, banci si renungken uga kita ndalani kegeluhenta, ngalaken kiniseran-kiniseranta tapi sada hal si luar biasa kita banci denga ngeluh ras ngejapken perbahanen Tuhan enda erkiteken penampat Dibata. Emaka tetaplah si puji ia. Janji Tuhan pasti bagi ituriken ibas invocatiota Ia pagi jadi kalak si mbelin dingen i gelari pe Anak Dibata si Meganjangna kal. Tuhan Dibata pagi njadiken Ia jadi Raja bagi ninina Daud. (Lukas 1:32)

Pdt. Merry P. Sitepu, S.Th

(GBKP Rg. Tangkahen)

___Klasis Medan Namorambe____