Khotbah Natal 25 Desember 2021, Jesus Enggo Tubuh ( Lukas 2:1-7)

Khotbah Natal 25 Desember 2021, Jesus Enggo Tubuh ( Lukas 2:1-7)

Invocatio             : “ Enda me kesaksin e: Dibata enggo mereken man banta kegeluhen si tuhu-tuhu si la erkeri-kerin, janah AnakNa eme sumbul kegeluhen e “ (1 Joh 5:11)

Ogen                     : Jesaya 62:6-12 (Antiponal)

Khotbah               : Lukas 2:1-7 (Tunggal)

Tema                     : Jesus Enggo Tubuh


  1. Kata Perlebe

Enggo sibentasi minggu-minggu Advent, si ncidahken kita tuhu-tuhu enggo  ersikap guna ngalo-ngalo ketubuhen Tuhanta Yesus Kristus ku doni enda. Janah ibas wari enda, reh me Tuhan e, Jesus e enggo tubuh. Ibas kiniteruken ukurNa, ateNa tading i tengah-tengahta, ringan ibas pusuh ras ukurta. Emaka kita manusia arus pesikap pusuh ras perukurenta si jadi ingan tubuh Yesus e.

Natal eme perayaan ibas kalak kristen, sinuriken keriahen si mbelin, ija Dibata erkuah ate man manusia. Peringeten Natal ilakoken alu dem keriahen, perayaan, pengataken bujur man Dibata. Manusia si enggo ndabuh ku bas dosa lanai ngasup mulahi dirina ibas kuasa dosa e nari. Emaka ibahan Dibata sada perpadanen nandangi bangsaNa Israel maka lit me sekalak penampat si isuruhNa mulahi manusia ibas dosa e nari. Penggenapen padan Dibata e jadi arah ketubuhen Jesus Kristus Anak Dibata, nusur ku doni enda, jadi seri ras manusia, si mereken dame sejahtera man manusia. Ketubuhen Jesus e jadi jaminen kegeluhen manusia. Anem gia kita lit denga ibas masa-masa pandemi covid 19, labo e si erbahanca urak keriahenta ibas ngerayaken ketubuhen Juruselamatta.

 

  1. Pembagesi Teks
  • Khotbah : Lukas 2:1-7

Kaisar Agustus  sebage kepala pemerentahen Roma mereken perentah  guna ngelakoken sensus. Janah sensus enda eme sensus si pemena, paksa Kirenius jadi gubernur i Siria. Sie erbahanca Jusup ras Maria berkat i kuta Nasaret nari ku kuta Betlehem, eme kuta Daud. Sebab Jusup eme kesusuren Daud.  Paksa sie, perdalanen Nasaret nari ku Betlehem labo menukah, selain jarak si cukup ndauh  tentu waktu perdalanen pe ndekah. Terlebih Maria sangana mehuli kulana. Seh kenca i Betlehem, seh me paksana Maria mupus. Tapi lalit ingan ibas rumah penginapan. Emaka tubuh me sekalak Anak Dilaki, Anak Dibata, si tergelar Jesus, ibas kandang asuh-asuhen ras ibalutina alu ampan janah ipepedemna ibas pelangkah. Aminna pe Jusup ras Maria arus ngenanami si e kerina, tapi tetap ia siap ngalo-ngalo ketubuhen Yesus e, tetap ia ertanggung jawab guna ipake jadi sarana ibas ketubuhen Jesus ku doni enda.

  • Ogen : Jesaya 62:6-12

Ibas pengogenta ituriken uga sikap bangsa Israel ibas nimai kerehen sekalak Juruselamat. Bangsa enda tetap tutus ibas ertoto desken kalak si erjaga-jaga suari ras berngi, segelah padan Dibata igenapi eme gelah Jerusalem ipajekken Tuhan mulihi,  gelah kota e jadi kota si terpuji i belang-belang doni. Sebab enggo igejabna uga penjagai Dibata kegeluhen bangsa e. Ibas ayat 8 “Gandumndu lanai ipan musuhndu, si enggo ipepulungndu arah ulih latihndu”. Alu kata sideban teridah peran Dibata mereken keselamatan man bangsa enda, tetap ikawaliNa kegeluhenna. Emaka ipetangkas Jesaya kerna padan Dibata  ibas kerehenNa. KerehenNa tanda keleng ateNa man bangsa e, si njadiken bangsa e jadi bangsa Dibata si Badia, kuta si la itadingken Tuhan. KetubuhenNa maba dame ras kemalemen ate.

  • Invocatio : 1 Johanes 5:11

Alu bage sue ras invocatiota tangkas bahwa ibereken Dibata man banta kegeluhen si tuhu-tuhu si

la erkeri-kerin, arah AnakNa eme sumbul kegeluhen e si mereken keselamatan man kerina manusia.

 

  • Aplikasi

Temata eme Jesus tubuh ku doni enda, tentu turah keriahen ras kemalemen ate man banta. Sebab bukti

keleng ate Tuhan man manusia eme nggit ia nusur ku doni enda, tubuh jadi manusia segelah manusia e ndatken kegeluhen si la erkeri-kerin. Igenapi Tuhan me kai si enggo pernah ipadankenNa. Si jadi perenungen man banta, enggo nge Jesus tubuh ku bas pusuh ras perukurenta? Adi payo Jesus e enggo tubuh ku bas pusuh  perukurenta, maka teridah biak-biak si mehuli singena ate Tuhan. Natal ngingetken kita uga mbelinna kekelengen Tuhan man banta si jadi sada pemere Dibata si luar biasa man banta. Emaka sikapta ibas natal e eme kita nggeluh ibas keleng ate. Natal labo hanya ceremonial belaka, tapi Natal maba perubahan si mbelin ibas geluhta. Hidup bagi Kristus, adn Kristus hidup dalamku. Selamat Natal!


Pdt. Melda P. Br. Surbakti, S.Th

(Rg. Simalingkar A)

___Klasis Medan Namorambe____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba