KHOTBAH  MINGGU, 12  DESEMBER  2021, IA  Reh  Mereken  Kemenangen (Sepanya 3  :  14 – 20)

KHOTBAH  MINGGU, 12  DESEMBER  2021, IA  Reh  Mereken  Kemenangen (Sepanya 3  :  14 – 20)

Invovatio         :  “Nina  Jesus,  Ketuahen  kalak  si  nggejap  maka  ia  labo  kai  pe  ertina i  lebe – lebe  Dibata;  sabab  man  bana  me  kinirajan  Surga”

Ogen               :  Lukas  3 : 7 – 17

Kotbah            :  Sepanya 3  :  14 – 20

Tema               :  “IA  Reh  Mereken  Kemenangen”


Perlebe

Ibas  minggu  adven  peteluken  enda  kita  tetap  iajuk  guna  ersikap  nimai  kerehen  Raja  si  Mbelin simaba  kedamen  ras  si  jadi  penebus  manusia  eme  Jesus  Kristus.  tetap  sipesikap  pusuh perukurenta  seh  makana  totalitas  penembahennta  tetap  man  Dibata  saja  ngenca  segelah  tetap  malem  ateta  dingen  meriah  ukurta.

Isi

Matius  5  :  3,  pengajaren  Jesus  idatas  uruk  kerna  ketuahen  si tuhu – tuhu  si  ertina  lit  kiniteruken  ukur  guna  ngangkai  maka  kita  labo  kepe  lit  ertina  ilebe – lebe  Dibata  segelah  bancci  ssii gejapken  kinirajan  surga e,  emekap  dame  Kristus  ngiani  ibas  pusuhta  seh  maka  kita  pe  banci  mperturah  dame  ibass  geluhta.  Ibas  kurang  gegehta  ije  me  Dibata  nampati  dingen  erkuassa  iba  kerina  dampar  kegeluhenta.

Lukas  3 : 7 – 17,  Johanes  selaku persuruhen  Dibata  nehken  persinget  gelah  tep – tep  manusia  bertobat  ibas  kerina  biak – biak  kegeluhen  si  la  ngena  ate  Dibata,  tanda  pertobaten  eme  nggit  mere diri  guna iperidiken.  Ikritiki  Johanes  maka  status  lahiriah  tep – tep  jelma  singakuken  maka  ia  sinursur  Abraham  tentu  e  sada  pemahaman  si  salah,  sebab  status  lahiriah  e  labo  maba  keselamatan  adi  la  kin  arah  pertobaten.  Johanes  pe nggambarken  Dibata  bagi  sekalak  si  sangana  miari,  page  si  perngis  bengket  ku  lumbung  tapi  lapung – lapungna  itutung  me  ertina  Jesus  Kristus  anak  Dibata  reh  jadi  hakim  mereken  hukumen  nandangi  kalak  si  la  nggit  nggeluh bagi  peraten Dibata  janah  mereken  keterkelinen  man  kalak si  nggeluh  ibass  benar. Persinget  ka  pe  ibahan  Johanes  maka  pertobaten  e  harus  iwujudnyataken  arah  perbahanen  tep – tep  wari,  bagi  nggit  nampati  kekurangen  subuk  pangan  ntah  pe uis,  pengalo  cuke  pe  ipersingeti  gelah  ula  mindo  asa  si  nggo  itentuken.  Ibas  ndahiken  dahin  selaku  persuruhen  Dibata,  Johanes  peridiken  tetap  meteruk  ukur,  ikatakenna  maka  “Aku  mperidiken  kam  alu  lau,  tapi  reh  me  sekalak  si  belinen  asang  aku.  Ngosari  sepatuna  pe  labo  aku metuggung.  IA  mperidiken  kam  pagi  alu  Kesah  Si  Badia  ras  api” (ay. 16).

Kitab  Sepanya  eme  salah sada  kitab  nabi  kecil,  si itulis Nabi  Sepanya  ibas  masa  pemerintahen  Raja  Manasye (696 – 642)  ras  Raja Josia  (639 – 609  SM).  Sepanya  termasuk  anggota  kerajaan,  ia  kesusuren  Raja  Hiskia.  Pokok  berita  si ipeseh  Sepanya  eme  kerna  “Wari  Tuhan”  si  jadi  ancamen  nandangi  kalak  Jehuda bagepe  bangsa – bangsa  si deban  erkiteken  dosa – dosana. Alu  keras  ipersingeti  Sepanya  bangsa  e  erkiteken  dosa – dosa  si  nundalken  Dibata  alu  nembah  man  dewa – dewa,  Baal,  Milkom  ras  kuasa  kegelapen  si  debanna,  bangsa e tek  man  Dibata  tapi  pe  tek  ka  man  dewa – dewa  (Sep. 1 : 5).  Ibas  bangsa e ngelakoken  sinkritisme,  mencampuradukken  erbage – bage  kiniteken  Nabi  Sepanya  menyoroti  segelah  bangsa  e  mulih kempak  Tuhan  alu  nadingken  berhala – berhala  bage pe  dewa – dewi si  isembahna  radu  ras  bangkit  ibas  kemerosotan – kemerosotan  moral  sidebanna.

Raduken raja  si  erkuasa  paksa  si e  eme  Raja  Josia,  Sepanya  berhasil  ngelakoken  reformasi  ras  pembaharuan  iman,  enda  perubahan  si  terjadi  secara  drastis  sebab  antara  penguasa  eme  raja,  pembesar – pembesar  istana  bagepe  suruh – suruhen  Tuhan  saling  menopang,  lit  kerjasama  si  mehuli  guna  menyadarken,  membaharui bangsa  e  janah  hasilna  terjadi  me  pembaharuan  ibas  bidang  keagamaaan  bagepe  moral, mulihken me  bangsa  e  nembah  Tuhan alu  benar  janah  nggo  seh  paksana  Dibata  mpepulung  bangsaNa  mulihi  guna  nehken  penebusen  bagepe  pemulihen,  si  setia  tentu  iapuli  janah  ersurak  meriah  nembah  Dibata  janah  ringan  me  Dibata  itengah – tengahna  desken  sekalak  pahlawan  perang  si  menang.  Keriahen  tetap  teridah  ibas  kinata  kegeluhen  bangsa  si  nggo  ipelimbarui  Dibata,  bangsa  e  iajuk  tetap  rende  ersurak  guna  jadi  tanda  terjadi  kemenangen  e  sebab  kerina  sierbanca  akapna  mela  enggo  isalihken  Dibata  jadi  kehamaten.  Ibas  pembaharuan  si  terjadi  itengah – tengah  kegeluhen  bangsa  e  mbelin  kel  tuhu  kontribusi  Nabi  Sepanya.

  • Pengkenaina

Kita  pe  kalak  perdosa  si  rusur  kel  erbahan  perbahanen  si  la  ngena  ate  Dibata  tapi  Dibata  setia  kap  ibas  padanNa.  Kalak  si  nggit  ngakuken  kerina  dosa – dosana  dingen  nggit  jera  ialemiNa  kap  tapi  kalak  si  la nggit  robah  iukumNa.  Tema-nta  IA  reh  mereken  kemenangan,  ertina  Dibatanta  sendiri  si  mereken  kemenangan  e man  banta,  ibas  kita  mentasi  kegeluhenta  alu  erbage – bage  situasi  Dibatanta  tetap  mereken  perlindungen  man  banta,  alu  bage  mari  tetaplah  dalanken  kerina  si  ngena  ate  Dibata  alu  meteruk  ukur  ula  sipajang-jang  biak  dosa  si  erbanca  kita  la  dame  sebab  Dibata  la  erngena  ate  man  kalak  si  la  ngit  jera.


Pdt. Sri Novalinda Br Tarigan, S.Th

(GBKP Tebing Ganjang)

___KLASIS MENARA____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba