Minggu, Tgl 28 November 2021, Serta Dingen Badia Lebe – Lebe Dibata (1 Tes 3 : 9 – 13)

Invocatio : 1 Kor 6 : 19

Ogen : Jeremia 33 : 14 – 16

Khotbah : 1 Tes 3 : 9 – 13

Tema : Serta Dingen Badia Lebe – Lebe Dibata

Penaruh :

Mengketi minggu Advent ningetken man banta, maka lit dua persiapen siman timanken ibas masa Advent : Sipemena eme wari ketubuhen Yesus Kristus si igelari wari Natal. Sipeduaken radu ras si pertama ndai ersikap nimai kerehenNa si peduakaliken. Ibas nimai kerehenNa sipeduakaliken enda me situhuna pusat pengarapen kalak Kristen si tercermin ibas pengakun kinitekenta ibas bagin kerna Tuhan Yesus si isina “Je nari reh me ia pagi ngeranaken si nggeluh ras si enggo mate”. Umumna ka pe  ibas masa Advent gereja tempa mpegeluh seruan masa penantian, perpulungen iajuk gelah ersikap ngalo – ngalo kerehen Mesias, tapi banci jadi seruan e hanya sekedar pengungumen tanpa pemaknaan si mbages kerna Advent, sie teridah arah sibukna gereja bersolek menghias diri erbahan dekorasi rekonstruksi kelahiren Yesus. Natal tempa enggo mulai.

Uga dage arusna kita menghayati minggu Adven ? Arusna Advent imaknai alu dem kesadaren diri, meratapi kerina kesalahen ras dosa – dosanta, sebage kalak situhu – tuhu membutuhken penampat (penolong) guna keselamaten dirinta. Bagi nina Agustinus bapa gereja : Orang Kristen harus menghayati masa – masa Advent sama seperti orang yang akan tenggelam, dan dia sangat menantikan pertolongan untuk diselamatkan. Bagepe arusna tuhu lit persiapen si mehuli, persiapen e bage membangun sada infrastruktur membangun jalan tol, dalan si bebas hambaten, ngagui kerina penghalang si lit bagi seruan Yohanes Pembabtis : Sikapkenlah dalan Tuhan, pepinter dalan man baNa (Mat 3 : 3).

Tema : Serta Dingen Badia I Lebe – Lebe Dibata

Tema enda ngataken kerna status, ras enda me gundari statusta genduari, kita enggo serta dingen badia erkiteken Kristus enggo nebusi kita, alu bage status enda harus ijaga, irawat, ilestariken seh pagi kerehen Kristus si peduakaliken. Guna njagai kegeluhen ibas kesertaan ras kebadian e, bage me bahan invocatio, ogen ras bahan khotbahta minggu enda jadi bahan persinget gelah kita tetap ncikep alu nteguh kinitekenta seh pagi kerehenNa si peduakaliken.

• Penjelasen Invocatio, Ogen ras Khotbah :

Salah sada si paling sulit iakap manusia ibas dirina eme kerna penguasan diri, bicara rusur kel pe iendeken KEE 332 siningetken gelah kita nimbak sura – sura daging, tapi mekatep denga nge kita talu dingen lepas kendali. Gambaren kegeluhen kalak Kristen i Korintus pe ncidahken maka melala denga nge lenga ngasup engkuasai dirina, emaka enterem denga kegeluhen perpulungen ndabuh kubas dosa erkiteken meriah iakapna ngikutken sura – sura dagingna, pepuasken ia bagi kalak Korintus si nggeluh bejat ibas kerina moral. Ibas piga – piga kalak si enggo ndabuh kubas dosa e me Paulus ningetken, maka kula pe arus ijaga kebadianna erkiteken kula e me rumah pertoton ingan Kesah Si Badia ringan, si la banci i melketi alu perbahanen – perbahanen si la ngena ate Dibata (1 Kor 6 : 19). Alu bage jelas , persinget ras pengajaren Paulus man kalak Korintus eme gelah perpulungen tetap ngasup engkuasai diri alu njagai kebadian kula ras kengasupen ibas njagai kula e ekaligus ncidahken kematangen kiniteken.

Jeremia 33 : 14 – 16 nuriken nubuat Jeremia man Bangsa Israel, amin gia bangsa Israel pernah mengalami kebenen jati dirina sebage bangsa pilihen erkiteken dosana ras jadi tabanen Babel. Dibata tetap ncidahken kesetianNa man bangsa e alu ncidahken keleng ateNa, Dibata tetap hadir erbahan “pemulihan” si njadiken bangsa Israel ngulihi jadi sada bangsa si erdolat, dingen Tuhan pe erpadan mereken man bangsa e sekalak pemimpin si mabai bangsa e tetap nggeluh ibas kebenaren ras keadilen si rehna ibas kesusuren Daud nari.

Ibas “Pemulihan” e Dibata erpadan memulihken bangsa e ndatken ngulihi kerina keriahen kegeluhenna, alu terbegi me mulihi surak – surak si meriah, ende – enden simeriah iendeken radu ras sora kulcapi sindube lanai banci i petik, ende – enden pujin kemuliann Dibata ngulihi banci i endeken alu pusuh si dem pengataken bujur erkiteken ndube i Babel lanai banci iendeken puji – pujin si mpermuliaken Dibata (bd, Ez 3 : 11), kerina daerah Jerusalem ngulihi idemi kalak Israel sebab ndube kota e seh lumena, taneh perjumaan ngulihi eruisken dukut – dukut simeratah dingen idemi rarasen kambing ras biri – biri (bd, Mzm 65 : 12 – 14), lanai lit kalak pengemis dingen negeri jadi ingan tading kalak bayak alu erbage – bage kebayaken si ibereken Dibata (bd, Mzm 144 : 13 – 14), kejuah – juahen jadi bagin bangsa e me pagi kerina (Jer 33 : 6).

Bageme si idah Jeremia ningetken nubuatna kerna  “pemulihan” bangsa Israel si ndatken ngulihi statusna sebage bangsa si erdolat ibas paksana. Sebage cataten Yer 29 : 10 ningetken lit 70 thn dekahna Babel engkusai Israel maka Dibata nggenepi padanNa. Tentu  ibas nimai nubuat enda tersehi ibutuhken me kesetian ras kiniteken sipaguh,

1 Tes 3 : 9 – 13 Nuriken kerna keriahen ukur Paulus nandangi kalak Kristen i Tesalonika si ndube ia sendiri erberita si meriah ku daerah e, keriahen Paulus e jadi erkiteken reh mbarna berita si meriah i Tesalonika sebab penduduk kota e ndube ersembah man berhala – berhala (1 Tes 1 : 7 – 9). Paulus pe mujiken kegeluhen perpulungen erkiteken tetap paguh ncidahken kesetianna erkiniteken aminna gia erbage – bage kiniseran si inanami perpulungen. Enda pe ncidahken man banta maka kiniseran sebage sada hubungen kebenaren sila terpisahken ibas kegeluhen kinitekenta ibas paksa gundari enda, maka kiniseran pasti tetap lit, aminna gia kebenaren kerna kiniseran e la teraloken sebage sada kebenaren pengalamen kekristenan. (1 Tes 1 : 2 – 10, 2 : 13 – 16). Kerina kegeluhen kiniteken perpulungen Tesalonika erbahanca Paulus tuhu – tuhu ermeriah ukur alu ngataken “Genduari kami banci ngataken bujur man Dibata erkiteken keriahen si lit ibas kami i lebe – lebe Dibatanta erdandanken kam” (ay, 9), jenari tetap maba perpulungen e ibas pertotonna katawari paksa, alu pengarapenna gelah kegeluhen perpulungen Tesalonika reh ulina ibas dingen banci pe jumpa rassa ibas paksana (ay, 10). Ibas kegeluhen simehuli Paulus pe tetap nehken persingetna gelah peprpulungen tetap nggeluh ibas kebadian, dingen persinget e jadi salah sada penekanen sipenting (1 Tes 3 : 13 ; 4 : 1 – 8 ; 5 : 23 – 24) sebab nggeluh ibas kebadiaan erkaiten ras pengajarenna Paulus kerna kerehen Kristus si peduakaliken (1 Tes 5 : 1 – 10).

Aplikasi :

Ibas Minggu Advent kita tetap ipersingeti kerna masa penantian ras persiapen kerna kerehen Tuhan, kerehen Tuhan sipeduakaliken enda me pusat pengarapen kalak Kristen ‘labo natal’ banci kita ernatal alu erbahan rekonstruksi kelahiren Yesus 2.000 thn si lewat, tapi ersikaplah alu tuhu – tuhu ibas nimai kerehenNa si peduakaliken. Kai persiapenta ? Bagi isingetken temata sijagailah kegeluhenta gelah tetapSerta Dingen Badia Lebe – Lebe Dibata, alu nilahken kerina dosa, ula pernah bene jati dirinta. Ibas pertandingen sepak bola, rusur si idah sada pelatih “mencampakkan” ntah “mencoret” pemain arah daftar pemain labo alu alasen teknikal tapi umumna erkiteken prilaku pemain e sendiri si la mehuli, tentuna prilakunta si ncurnaken kebadian Dibata ibas dirinta pe banci erbahanca kita “tercampak” ntah “tercoret’ sebage pewaris kinirajan surga. Si inget denga salah sada MENSOS (J …. Batubara) si igadang – gadang gelarna sebage anak gereja, pernah pe igelari media sebage kalak si sangat religious, tapi dungna i tangkap KPK erkiteken kebadian kegeluhgenna tercurna alu mengkorupsi dana bantuan sosial.

Arah contoh si isingetken idatas ndai, dingen sue ras status bagi si isingetken temata kerna dirinta sebage kalak si enggo Serta Dingen Badia Lebe – Lebe Dibata, tetaplah dage sipertahanken ras sihayati masa Adven enda alu sikap situhu – tuhu jadi anak – anak terang. Sebab kegeluhenta enggo lit ibas terang alu kerehen Kristus ibas Natal dingen si enggo i pebadiaken alu kematenNa i kayu persilang, si saksiken sie kerina, sebab masa – masa Advent pe situhuna masa guna ersaksi kerna dirinta sebage anak – anak Tuhan.

Pdt. Israel HS Milala.

    (GBKP Kemenangan Tani)

___Klasis Medan Namorambe____