KHOTBAH MINGGU, 21 NOVEMBER 2021, Ngerti Gendekna Umur Manusia (Masmur 90:1-12)

Invocatio         : La lit ise pe si ngasup ngambati kematenna, ntah nuncun wari kematenna. Enda me sada peperangen si la tersilahken; penipu pe la terpulahisa bana i jenari (Peng. 8:8).

Ogen               : Ketangkasen 1: 4-8

Khotbah          : Masmur 90:1-12

Tema               : Ngerti Gendekna Umur Manusia.

Pengantar

Kerina kita pasti ngalaken kematen, ise pe kita enda labo banci nilah ibas kematen. Asum terjadi gelombang pertama bagepe iumputi gelombang ke dua pandemic covid 19 ibelang-belang doni enda, khususna i negaranta enda maka kematen e tempa-tempa ndeher kal ras kita, tempa tempa musim mate, sabab la sitik si begi lit mate rempet, ndai ras denga kita ngrana-ngerana jenari berngina nggo ka mate. Bagem rapuhna kegeluhenta enda, labo lit si banci si andalken. Ise pe kita enda labo banci menjamin kegeluhenta aman-aman saja, sehat-sehat saja, sabab kuga kin pe penjagaita kesehatenta e banci saja nge bene, sebab lit kang si dat informasi sehat kel nge ia, rajin olah raga, ijagaina pola makanna tapi nggo mate, tapi lit ka nge nggo ndekah sakit bertahun-tahun tapi lalap la mate. Ije si idah maka nggeluh ras mate eme misteri ilahi. Hanya Tuhan yang tahu sebab kematen la nandai nguda, ntah metua, bayak ntah musil, sehat ntah sakit, rsd. Kita la sieteh ndigan mate, emaka harus si sadari alu payo maka si paling ndeher ras kita eme kematen, kematen e banci reh katawari saja pe, la peduli kita siap ntah lang, sebab kematen labo nimai kita metua. Asum kita i dilo Tuhan labo banci si tolak, itunda lebe ninta, la banci iperpanjang waktu, asum ikataken Tuhan waktundu enggo dung, yah enggo dung. Kita kerina pasti menuju ku bas titik kematen. La kin si sadari lit kap kegeluhen si rasa lalap? Saja haluanna lit dua eme Surga ras Neraka. Asum kita ngadap man Tuhan ntah ibas wari enda, ntah pagi ntah kedun, ibas posisi siapai nge kita, Surga ntah Neraka?

Penjelasen Nats

Invocationta Pengerana 8:8 ngataken: “La lit ise pe si ngasup ngambati kematenna, ntah nuncun wari kematenna.     Enda me sada peperangen si la tersilahken; penipu pe la terpulahisa bana i jenari”. Jelas maka ise pe labo si ngasup ngolangisa, ise pe la ngasup bertahan dikune nggo reh kematen e. bagepe Pengerana ngataken  enda me sada peperangen, si arus man alanken, banci jadi kita kalah, tapi amin bage gia jangan menyerah sebelum berperang. Alu bage ibabai kita kuga ngergai kegeluhen si enggo ibereken Dibata e alu mehuli, alu tetap ernalem man Tuhan saja ngenca.

Pengogen: Ketangkasen 1:4-8 enda eme sura-sura Yohanes nandangi uga belinna kerna kekelengen Tuhan si tetap jadi asam man kalak si tek. Aminna erbage-bage pebeben ibas ngalaken kegeluhen enda, keleng ate Tuhan si ebahanca ia tetap bertahan ibas kinitekenna. Sebab keleng ate Tuhan Yesus ngenca si ngasup mulahi kegeluhen manusia ibas dosa-dosa nari. Sebab Kristus Yesus kap si pemena ras pendungi.

Khotbah: Masmur 90:1-12, enda eme pertoton Musa. Dibata inganna cicio, Musa nggejapken uga pengkawali Tuhan nandangi kegeluhenna menaken kin ibas masa perdalanen bangsa Israel menuju tanah Kanaan. Mazmur enda itulisken sebagai ingeten man bangsa enda maka bangsa enda pernah memberontak/nilah man Tuhan, aminna gia bage Tuhan tetap engkelengi bangsa enda. Igejapken Musa uga belinna keleng ate Tuhan e. Bagepe ibas ndalani kegeluhen enda ieteh Musa uga buena kiniseran, perbeben, si la bagi ukur man alanken, emaka ingan pendundalen si tuhu-tuhu eme ku Tuhan ngenca. Tuhan ngenca  si jadi jalan keluar ras jabapen ibas kerina keadaan kegeluhen manusia. Lit harapen si mbaru si igejapken Musa ibas pergumulenna. Mazmur enda merupakan refleksi nandangi kegeluhenta selaku manusia maka kegeluhenta ibabo doni enda kentisik nge ngenca. Janah la banci lang pasti nge kita mate.

Aplikasi

Arah kata Dibata enda ngajari kita guna ngertiken uga gendekna geluhta enda sabab kegeluhen manusia kentisik nge ngenca. Alu bage ibabai kita gelah reh bijaksana guna makeken waktu waktu si gendek e si lit ibas kegeluhenta sekalak-sekalak. Uga kita ndalanken kegeluhenta enda alu mehuli. Inget pe maka nggeluh hanya sekali, janah mate pe sekali. Asum kita nggeluh mari sipakeken hikmat Tuhan, gelah kita sadar maka ibas sada titik kita ngadi ibas waktu e, janah ibas kegeluhen enda kita berakhir ibas kematen jenari kuburken kulanta enda macik mulihken ku taneh, adi bage sah-sah saja kita rate-ate ibas makeken kegeluhenta enda. Tapi la kap bage, ibas Pustaka si Badia ngataken  maka kenca kematen lit kap kekeken nandangi kalak si tek. Janah kai si ilakoken kita kidekah kita nggeluh idoni enda  arus  sipertanggung jawabken ilebe-lebe Tuhan, janah kalak siberhikmat/pentar ndalani kegeluhenna, alu patuh man Tuhan i tamaken Tuhan i Surga guna ngaloken kegeluhen si rasa lalap. Sementara nandangi kalak si lenge iukum me ras itamaken ku Neraka si apina la ernimpet-nimpet, ingan si dem alu tangis, ras simesui.

Ikateken maka kegeluhenta i doni enda kentisik nge ngenca “Gendek umur kami erkiteken rawaNdu”, enda me dampak dosa si ilakoken manusia. Dekahna kami nggeluh lit 70 tahun, adi kami megegeh banci seh 80 tahun, tapi kesusahen me ayam-ayam geluh kami. Erkiteken sie mari sipakeken waktu si singkat enda alu mehuli, labo alu gegeh ras kiniulinta.  Alu setiap waktu mari kita erpengendes man Tuhan. Tetaplah Tuhan si negu-negu perdalanen geluhta sebab IA ngenca si meteh kai si terbaik ibas kegeluhenta. Kidekah kita nggeluh ola pedah siandalken dirita, kade-kadeta erta-ertanta, jabatenta, kiniulinta. Kegeluhenta enda desken uis melket i adepen Tuhan. Si nggeluh ibas Yesus Kristus nge  i bereken gegeh ras kengasupen. Tanpa Tuhan kita salah makeken waktu, salah erdalan, salah ngerana, salah bertindak, pikirenta lebih cenderung ku arah negatif, dilahta lalap jadi sumber masalah si mbelin, perbahanenta la mehuli. Emaka marilah nggeluh erpengendes man Tuhan si mada kuasa. Waktu si ialoken kita enda eme pemere (anugerah) Tuhan. Emaka mari kita berkomitmen hidup guna lebih baik iadepen Tuhan. Sebab kegeluhen si ibereken Tuhan man banta eme nggeluh guna erbuah, guna ndalanken kiniulin. Mari sibereken kai si lit ibas kita guna kemulian Tuhan. Nggeluh ibas kata Dibata, Si inget maka tanpa Tuhan kita enda labo kai pe, gampang menghakimi, mengeluh, menyalahkan, rsd.

Mbiar kita mate tapi la pernah erpengendes man si mada kegeluhen enda. Hidup ini adalah kesempaten, jangan sia-siakan… kentisik nge ngenca adi ibandingken ras kegeluhen si nandangi ibereken Tuhan man banta. Adi wari enda lit denga kesahta, kataken bujur man Tuhan. Adi pemasmur ngataken maka kegeluhenta enda  desken dukut si ertunas erpagi-pagi turah dingen terlak, tapi kenca ben melus me. Labo kepeken terbelinken gegehta ibas geluh enda, janah arus si inget maka kai si lit ibas kita e hanya hak pake, kita labo  pemilik si empuna eme Tuhan. Asum kita tubuh labo si baba kai pe, janah asum kita mate pe labo sibaba kai pe. Uga nge buena si tadingken asum kita mate?… kerina. Janah uga nge buena si baba asum kita mate?…lalit. Erta, sen, jabaten, title, tading kerina. Uga pe jilena mobilta asum kita nggeluh, tapi adi mate kita ambulans nge si maba kita ku kuburen. Uga jilena gia rumahta asum kita nggeluh tapi adi mate peti si ukuren 2×1 ngenca inganta, uga gia belangna tanehta i doni enda sum kita nggeluh tapi adi enggo mate ukuren 2×1 ngenca sikerajangenta. Momento mori, ingetlah wari kematenta. Mari si inget kiniulin Tuhan e, ersikaplah katawari pe, timai pendilo Tuhan asum kita nggeluh i doni enda alu tetap nggeluh ibas kebenaren kata Tuhan. Amin

Pdt. Antonius Tarigan, S.Th

(GBKP Rg. Lau Cih)

___Klasis Medan Namorambe____