PEKAN KELUARGA WARI VI, 19 November 2021, Jabu Si Maba Persembahen, (Jesaya 7:13-16)

Invocatio : Nina Tuhan, “O Betlehem i Eprata, aminna i Juda kam kuta si kitikna, tapi ibas kam nari Kupekeke sekalak singerjajai Israel, si asalna ibas adi-adi nari, ibas paksa si nuria nari” (Miha 5:2)

Ogen        : Jesaya 7:13-16

Khotbah : Matius 2:1-12

Tema       : “Jabu Si Maba Persembahen” (Advent ras Natal)

La sigejap wari-wari geluhta, enggo ka seh warina, nandangi bengket me kita ku bas Minggu Advent ras wari Natal ibas tahun 2021 enda. Masa Advent eme masa pengarapen, penantin ras persiapen guna kerehen Tuhan Jesus Kristus. Kata “Advent” asal katana ibas Bahasa Latin eme “Adventus” si ertina eme kerehen (kedatangan). Minggu Advent biasana ilakoken empat minggu sope wari Natal.

Bagepe kerna wari Natal, eme wari simaba keriahen bas kegeluhenta. Erbage-bage hal ilakoken kalak Kristen guna ngalo-ngalo wari Natal e. Termasuk Gereja pe ersikap guna merayaken Natal e alu mbentuk Panitia Natal ras persiapen-persiapen sidebanna. Janah ibas dua tahun terakhir enda, kerna perayaan Natal ibas runggunta harus ibatasi erkiteken pandemi covid-19.

Bahan renungenta ibas Matius 2:1-12 enda nuriken kerna dua karakter ras pe sikap siilakokenna ibas maba persembahen man Tuhan. Perlebe, eme Herodes, ise kin Herodes enda? Ibas Padan si Mbaru, lit 5 kalak si igelari raja Herodes eme Herodes Agung, Herodes Arkelaus, Herodes Antipas, Herodes Agripa I, ras Herodes Agripa II. Herodes siituriken ibas bahanta enda eme Herodes Agung. Ia sekalak si cerdik ras mahir ibas taktik perang, bagepe ibas bidang politik. Tapi ibas sisi sideban, karakter Herodes enda tuhu-tuhu mejin. Guna nehken sura-surana maka cara si jahat pe ibahanna. Ibas sejarah Herodes itandai sebage raja pembunuh. Kerina keluarga besar anggota jabuna ibunuhna, termasuk pe diberuna ras anakna ikut ibunuhna. Emaka sengget kal ia tupung ibegina berita arah kalak Majus nari maka Raja kalak Jahudi enggo tubuh (ay.3). Isuruhna me  Imam Kepala ras Ahli Taurat guna ndarami informasi e (ay.5-6). Emaka itipuna kalak Majus e, nina Herodes atena ersura-sura nembah Jesus e, tapi situhuna sura-surana mbunuh Jesus (ay.7-8).

Sipeduaken, eme kalak Majus, ibas bahan renungennta enda kalak Majus eme golongen bangsawan si erlajar mengenai ilmu perbintangen (ahli astronomi), ietehna kerna letak bintang, pergeraken, ras tanda-tandana. Kalak Majus tek maka matawari, bulan, ras bintang-bintang secara periodik mbereken tanda-tanda si banci ipake guna ngeramalken peristiwa-peristiwa ibas masa depan sekalak jelma bagepe bangsa. Kalak Majus enda eme kalak si cerdas secara intelektual, labo ahli sihir ntah pe erkaiten ras kuasa kegelapen. Ibas masana, kalak Majus enda kedudukenna cukup tinggi. Biasana ia erdahin sebagai konselor raja, misalna mereken saran-saran penting ibas peperangen. Tupung iidahna bintang si ersinalsal e, ietehna maka e pertanda ketubuhen sekalak Pemimpin si Mbelin. Iperkiraken jarak tempuh kalak Majus e ngikuti bintang e lit 600 Km. Kalak Majus enda ndarami Jesus labo saja guna mbuktiken kebenaren tanda alam si idahna arah bintang, tapi secara jelas ibas ayat 2 isingetken maka kalak Majus enda ndarami Jesus ersura-sura guna nembah Jesus. Keyakinen kalak Majus maka si isembahna e eme Pribadi si Maha Kuasa, mungkin muncul kenca iidahna bintang e si ngasup naruhken ia arah negerina nari seh ku Betlehem ingan Jesus tubuh. Bintang e labo bintang biasa tapi enda me bentuk penyataan ilahi.

Kenca nembah Jesus, kalak Majus epe mbereken persembahen man Jesus, eme emas, kumenen, ras mur. Teluna persembahen enda merupaken barang si langka ras meherga ibas masa sie. Emas eme lambang kebayaken. Emas biasana ipake sebage persembahen man raja-raja ibas masa e. Kumenen (getah dari pohon balsam yang digunakan sebagai obat) pe ianggap meherga bali bagi emas. Kumenen megati ipake ibas upacara keagamaan. Sedangken mur (getah pahit dari pohon mor yang baunya wangi) ibas masa e ipake guna erbahan parfum (wewangian) ras minak urapen . Nilaina cukup mbelin, bahkan rusur ergan asangken emas. Jadi, kalak Majus enda mbereken persembahen si terbaik man Jesus. Persembahen kalak Majus labo saja materi ras semangatna tapi arah ukurna tuhu-tuhu ia nembah Jesus.

Rikutken temata “Jabu Si Maba Persembahen”, iingetken man banta uga arusna sikapta ibas nehken persembahen man Tuhan. Selaku umat Tuhan, Jabu si Mehuli, enggo nge si bereken persembahen si mehulina man Tuhan? Ntah mekarus denga nge kita ibas nehken persembahan man Tuhan? Sieteh nge kai dasarna kita nehken persembahen man Dibata? Labo erkiteken Dibata kekurangen makana kita arus nehken persembahen man Tuhan. Dasarna kita nehken persembahen man Tuhan eme sebage tanda ungkapen syukur/ ngataken bujur man Dibata erkiteken sigejap bahwa pasu-pasu Dibata mbelin nandangi kegeluhenta, terlebih nandangi jabuta. Emaka ibas kita nehken persembahen e eme alu keriahen ukur, ula mekarus. Persembahen eme respon ntah pe jawaben kalak si erkiniteken nandangi kekelengen ras pasu-pasuNa nandangi geluh manusia. Persembahen labo stimulant guna merangsang kiniulin Dibata, tapi persembahen eme reaksi kerna kiniulin Dibata. Persembahen labo upeti siituntut Dibata tapi pengataken bujur manusia si ngaloken pasu-pasu arah Dibata nari. Tek kita maka Dibata ncukupken kerina kebutuhen jabuta ras pe menjamin masa depanta. Alu bage ibas kita nehken persembahen man Dibata, ngataken man dirinta maka kita la mbiar kekurangen ibas masa depan geluhta. Jadi, banci sikataken maka persembahen eme salah sada tanda kinitekenta nandangi pemeliharaan Dibata ibas geluhta. Emaka, kita nehken persembahen man Dibata labo saja ibas masa kelebihen/ kelimpahen tapi ibas masa sukar pe ngasup kita nehken si mehulina man Dibata. Lebih asa sie pe, ate Dibata gelah geluhta sipakeken guna persembahen si nggeluh rikutken si ngena ate Dibata (bd. Rm. 12:1).

Pdt. Lia Diyanti br. Ginting, S.Th

(GBKP Rg. Kuta Tengah)

___Klasis Medan Namorambe____