Pekan Keluarga Berngi VII, 20 November 2021, Jabu Si Mehuli (Pilipi 4:8-9)

Invocatio         : Dage ersinalsallah min terangndu I lebe-lebe kalak si nterem gelah adi idahna perbahanenndu si mehuli ipujina Dibata, Bapandu si i surga (Matius 5:16)

Ogen   : Pengerana 12:13-14

Khotbah : Pilipi 4:8-9

Tema : Jabu Si Mehuli

1. Perlebe

Cara pandang jelma ngenen kata jabu si mehuli tentu berbeda-beda. Uga kin jabu si mehuli?man ise saja ia arus mehuli? banci saja turah melala penungkunen arah tema berngi si pepituken enda perban berbeda kerina sukat-sukat jelma ngenen sada-sada hal. Sebagai tema umum pekan keluarga enda tentu lit nge arapan kerna tema enda banci min teraplikasiken alu mehuli ibas jabuta kerina. Anem gia jabu-jabuta paksana berjuang guna mengahadapi persoalen geluh siturah akibat dampak pandemic Covid 19 baik ibas kesehaten, ekonomi, persekolahen, relasi ras sidebanna tapi iarapken jabu tetap min mehuli. Mehuli ibas erti ersada dingen mejuah-juah jabu e. Teridah tetap kiniersadan ibas jabu, nggeluh ibas hikmat kepentaren, perukuren ras perbahanen, alu bage tetap jabu e ngenanami kiniulin Dibata seglah ngasup ncidahken kiniulin e ka nandangi nterem jelma.

1. Pembahasen

Invocatio Matius 5:16

Kam eme sira ras terang doni enda sinimaksudken ibas matius enda emekap penekanen maka kita kalak Kristen memiliki dampak nandangi doni enda. Arus ka nge lit proses ras perjuangen guna banci ncidahken dampak e nandangi kalak sideban. Tapi terang e ersinalsal min ilebe-lebe kalak sinterem segelah adi idahna perbahanen simehuli siilakoken kita ipujina Dibata ibas geluhna. Uga banci kegeluhenta jadi erguna ras jadi pasu-pasu tentuna ibenai itengah jabu-jabuta nari sebab I je nge kita itempa ras ipekena-kena gelah banci erguna ku sekelewetta. Jabu si mehuli tentu tetap natap kubas jabuna kai banci ibahanna gelah erguna kegeluhen jabu e guna kalak sinterem.

Ogen Pengerana 12:13-14

Ibas kitab pengerana enda ituriken kerna ulu pengajaren hikmat emekap ibas jabu. Pengajaren e isehken orangtua nandangi anak gelah megermet ia natap kerna keadaan doni enda. Pengerana muat sada kesimpulen kerna kegeluhen enda maka kai pe lit tampukna, kitab lit tampukna, elajar pe mahanca latih kula/daging. Janah geluh enda tampukna eme erkemalangen man Dibata dingen patuh man perentahNa sebab guna e saja manusia itepa. Lit tetap tanggung jawab kiniteken siisehken ibas ndalani kegeluhenta. Uga carana gelah isi jabu tetap sada pengidahna maka erkemalanngen man Dibata arus tetap jadi perayaken. Tentu enda arus tetap iajarken nandangi isi jabu guna ijadiken pedoman nggeluh. La ka hanya elajar gelah tambah pemeteh tapi ibas nggeluh erkemalangen man Dibata ijenda ngikuti kang kerna kepatuhen nandangi sura-sura ras singena ate Dibata ibas geluhta. Ndalanken sura-sura Tuhan ibas geluhta. Dibata kap si nggerunggui kerina perbahanenta, simehuli ntah si la mehuli bagepe siterbuni. Ertina kerina lit ibas kuasa Dibata. Jabu si mehuli tentu jabu sitetap ngajarken pendidiken kiniteken sipayo ibas jabu, sincidahken ketutusen ibas ngalanken perentah Dibata alu sada kesadaren kerina guna kemuliaan Dibata.

Khotbah Pilipi 4:8-9

Bagin kitab Pilipi 4 enda eme kata ajar siisehken Paulus nandangi Eiodia ras Sintike gelah tetap ersada arih ibas ndahiken dahin pelayanen. Ermeriah ukur katawari pe janah tetap sisampaten sada ras sidebanna. Paulus nehken atena tedeh nandangi teman sepelayanenna janah ketedehen atena e ibelaskenna arah kalimat penguaten gelah tetap mehuli perbahanenna man ise pe janah ula aru ate kerna kaipe tapi tetap alu saber ngenanami perjumpan ras Tuhan ibas pertoton alu bage tambah-tambah usur gegeh ibas ngelai Dibata arah perpulungen.

• Ncidahken perbahanen simehuli tentu ibenai arah perukuren si mehuli. Paulus nuriken ibas ayat 8 maka ngukuri kerna si mehuli, kerna si bujur, kerna si mulia, benar, bersih, mejile ras kerina si patut ipuji enda arus jadi sada pendahin si la banci ianggap biasa saja. Sebab kepeken kai siukuri manusia enda banci icidahken ibas perbahanen. Segelah ula min petembil perbahanen ras perukuren. Emaka si man pekenan kel lebe emekap pusuh ras perukuren. Adi si jadi ukurenta kerina simehuli ras positif tentuna biak end ape sicidahken ibas perbahanenta.
• Keteladanen nggeluh

Ibas ayat 9 Paulus nuriken kerna keteladanen nggeluh. Dalanken lah kai singgo ipelajarindu ibas aku nari. Subuk ibas pengeranangku bagepe perbahanenku. Ertina kegeluhen kalak Kristen la terjeng megiken kata Dibata tapi pe kepeken arus iterapken ibas kegeluhenta. Kesaksin nggeluh kalak Kristen teridah ibas uga ia makeken kata Dibata e, siturah ibas ukurna ndai banci min idalanken ibas kegeluhen. Alu bage lit keteladanen nggeluh si jadi usihen man kalak sideban.

• Kemalemen ate

Kemalemen ate ibas geluhta enda Dibata simerekenca. Kemalemen ate si labo terjeng ukuren doni ngenca tapi kemalemen ate si tuhu-tuhu reh ibas Dibata nari. Dibata kap tetap sinemani kegeluhenta ersaksi ibas perbahanen ras pengeranata.

• Pengkenaina
• Jabu si mehuli labo jabu si la pernah rubat, labo jabu si la pernah ersoal. Tapi jabu si mehuli emekap jabu si ngasup ndungi persoalen si turah ibas jabu. Ndungisa alu perukuren semehuli ras ndalanken sura-sura Dibata ibas kegeluhen jabu. Arus turah biak salaing ngergai ras sihamaten sada ras sidebanna. gelah jabu e banci jadi usihen nandangi sekelewetna.
• Jabu eme ingan elajar kata Dibata ras ncidahkenca ku doni enda. Kerina si mehuli arusna min teridah ibas jabu. Jabu jadi ingan arih ras ingan guna mpelajari kata Dibata. Bapa ras nande dingen anak-anak muat bagin ibas mpeturah biak nggeluh erkemalangen man Dibata ibas jabu. lit teridah perubahen si mehuli ibas jabu emekap ibas mpelajari kata Dibata ras ndalanken singena ate Dibata bas doni enda.
• Itengah situasi ras keadaan si sulit ibas jaman enda, jabu iajuk guna banci tetap ncidahken fungsita sebage tinepa Dibata. Tetap jadi usihen ras teladan nandangi sekelwetta si teridah arah perukuren, pengerana ras perbahanenta. Kemalemen ate si rehna ibas Dibata nari mpengasup kita terus erbahan mehuli ibas geluhta.

Pdt. Siska F. Br Tarigan, S.Th, MM

(GBKP Rg. Kayu Embun Simalem)

__Klasis Medan Namorambe____