PEKAN KELUARGA WARI  II, Jabu Si Dem Kepentaren Ras Pengertin (Kuan-Kuanen 24:3-7)

PEKAN KELUARGA WARI  II, Jabu Si Dem Kepentaren Ras Pengertin (Kuan-Kuanen 24:3-7)

Invocatio        : Ajarkenlah man anakndu. Persingetilah rusur, subuk sanga kam i rumah, ntah sanga kam i rumah, entah sanga kam i bas perdalanen, subuk sanga kam ngadi-ngadi entah pe sanga kam erdahin

(Ulangen 6: 7).

Ogen               : 1 Johanes 3:1-10

Kotbah           : Kuan-Kuanen 24:3-7

Tema              : Jabu Si Dem Kepentaren Ras Pengertin


Kitab kuan-kuanen i tulisken Salomo si isina kerna ajaren agama dingen ajaren kegeluhen si payo. Pengajaren e icidahken ibas pedah, perumpamaan dingen ajar. Isina mbue nuriken kerna cara nggeluh ibas kegeluhen si tep-tep wari dingen ibenaken alu kata persinget nina, jadi kalak erpemeteh, arus lit ibas ia kehamaten dingen kemalangen nandangi Tuhan.

Khususna Kuan-Kuanen 24:3-7 si nuriken kerna Jabu i panteki erpalasken kepentaren ras pengertin. Ibas Alkitab kata Jabu i terjemahken rumah, kata rumah labo terjeng iertiken alu pengertin secara harafiah, rumah si ipajekken alu batu, kersik, batu bata, kayu ras bahan-bahan si debanna (pengertin secara bangunan). Tapi rumah/jabu sinimaksudken ibas ayat 3-4  alu pengertin si lebih luas eme kap ngerana kerna kegeluhen. Kegeluhen Jabu si mehuli si ipanteki alu kepentaren ras pengertin siilakoken kerina anggota jabu eme bapa, nande ras anak-anak. Kepentaren ras pengertin banci sidat alu mehamat ras erkemalangen man Tuhan (Kuan-Kuan 1:7). Ertina kepentaren e rehna ibas Dibata nari ras kepentaren e mereken manfaat, la nebu-nebu, la menyakiti ibas jabu. Seh maka kepentaren ras pengertin siidat ibas doni enda arah pendidiken si tinggi, pengajaren ibas jabu ras lingkungen sipakeken alu pengertin si payo erpalasken kata Dibata. Bagepe ija lit pemeteh ije lit bilik-bilik kuh ras barang-barang meherga ras mehuli. Ibas tengah-tengah jabu tercipta kegeluhen si harmonis, bapa ras nande erkemalangen man Dibata, sehati sepikir guna engkelengi anak-anak, anak-anak mehamat ras keleng atena orang tuana ras ibas kerina perbeben geluhna radu ras i endeskena man Dibata.

Ibas ayat 5-7, kalak pentar lebihen asangken kalak megegeh. Pentingen kap pemeteh asangken gegeh ertina pemeteh banci terus i pelajari tapi adi gegeh ibas diri manusia i batasi alu kiningasupen, kesehaten, usia. Jadi arah pemeteh si payo si erpalasken kepentaren Dibata nge siiajuk kitab Kuan-Kuanen enda. Ibas tengah-tengah jabu ibahan rencana si megermet. Rencana si pertama pastina berawal arah orang tua (bapa ras nande), bapa ras nande harus mempersiapken diri guna mabai seisi jabu singena ate Dibata. Ibas kiniteken, pengajaren, perukuren, perbahanen, perhatin dingen keleng ate. Kepentaren e i pake guna makeken alu mehuli potensi-potensi si lit ibas tengah-tengah jabu. Janah la terjeng orangtua tapi radu ras anak-anak guna makeken kepentaren ras pengertin si enggo isuankaen orangtua ras terus mperlengkapi diri alu erkemalangen man Dibata. Ibas ayat 7 nuriken kerna kepentaren man kalak bodoh, silaiertikenna alu payo ras la ipakeken guna kegeluhen singena ate Tuhan.

Jadi arah bahan renungen kebaktin pekan keluarga wari pe duaken enda segelah jabuta banci ipanteki alu kepentaren ras pengertin si ipalasi alu kata Dibata. Bagi ikataken ibas invocatio Ulangen 6:7, siningenken segelah orangtua ngajarken kerna kata Dibata, persingetilah rusur, subuk sanga i rumah, sanga bas perdalanen, sanga ngadi-ngadi entahpe sanga erdahin. Ertina katawari paksa pe, subuk tenteng ras la tenteng tetap beritaken. Enda jadi tanggung jawab simbelin man orangtua. Orangtua memiliki peran penting guna mabai jabu makeken kepentaren ras pengertin sirehna ibas Dibata nari. Adi palas pengertin enggo payo mabai kegeluhen si payo. Bagi ikataken ibas ogen 1 Johanes 3:1-10 ipetangkas kerna bedana anak-anak Dibata ras anak-anak si la nandai Diabata. Anak-anak Dibata ngelakoken singena ate Dibata, biyak Dibata lit ibas dirini. Paguh kinitekenna amin pe melala tantangen siman hadapen, la gampang terpengaruh kubas kegeluhen doni silamehuli, tetap terus erkarya ras erpenungkunen man Dibata guna kiniulin kegeluhenna.


Pdt. Merry P. Br Sitepu, S.Th

(GBKP Rg Tangkahen)

__Klasis Medan Namorambe___

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba