Pekan Keluarga Wari – I, 14 November 2021, Pulung Ersada Ibas Jabu (Spiritualitas Jabu), (Perbahanen Rasul-Rasul 2:43-47)

Invocatio: “Tetaplah ertoto kerna kami. Tek kami maka bersih pusuh peraten kami, sabap lalap nge kami ersura-sura ndalanken si mehuli” (Heb. 13:18).

Ogen       : Daniel 1:8-17

Khotbah  : Perbahanen Rasul-Rasul 2:43-47

Tema      : Pulung Ersada Ibas Jabu (Spiritualitas Jabu)

Kai kin erti jabu? Jabu ntah pe keluarga, eme orang-orang si saling berhubungen, baik secara biologis bagepe emosional. Adi keluarga secara biologis, eme terdiri atas bapa-nande ras anak-anakna (si berhubungen dareh). Adi keluarga secara emosional, eme menggambarken hubungen antara orang-orang si ndeher/bersahabat, sada kuta, sada merga/arisen, sada ingan dahin, sada gereja, rsd, si terikat rasa persatuan bagi keluarga, bagi si jadi nandangi jemaat mula-mula bas palas renungennta enda, ija kerina kalak si tek man Kristus, pulung ras-ras dingen sikeleng-kelengen.

Surat Perbahanen Rasul-Rasul eme surat si nuriken kuga ajar-ajar Tuhan Jesus si pemena pebelangken Berita Si Meriah i Jerusalem seh ku belang-belang Judea ras Samaria sue ras perentah Tuhan Jesus (amanat Agung). Bas meritaken Berita Si Meriah e, rasul-rasul ersaksi man jelma sinterem maka Tuhan Jesus nggo keke bas kematen nari, si jadi pokok Berita Si Meriah. Jenari kenca nusur Kesah Si Badia ku babo ajar-ajar Tuhan Jesus (Perb.2:1) ngerana ia ibas erbage-bage cakap dingen melala tanda-tanda sengget ibahanna, erbahan reh teremna kalak si erkemalangen man Dibata (ay.43-44). Menarik kel cara geluh kalak si tek paksa si e, ija pulung ia ras-ras teptep warina janah kai si lit ibas ia ipakena ras-ras. Jenari adi lit sekalak perpulungen sindayaken juma ntah rumahna, duitna iberekenna man rasul-rasul, guna ibagiken man perpulungen rikutken kebutuhenna. Teridah ije maka duit ntah pe materi lanai jadi perayaken geluh, melainken kiniersadan si utamana, desken sada keluarga si ersada ukur kerina makeken kinilitenna ras-ras. Bas ay.46 ikataken maka ras-ras ia kerina man ibas rumahna alu meriah dingen ukur meteruk, banci sibayangken uga eratna hubungen emosional si terjalin bas perpulungen e. Kiniersadan e terjalin alu sada tujun eme: muji Dibata. Alu bage, kerina kalak erngena ate man perpulungen e, dingen teptep wari reh tambahna kalak si tek man Dibata. Kai ndia makna renungennta enda kaitenna kubas Pekan Keluarga berngi si pemena enda?

Cara geluh jemaat mula-mula paksa si e tuhu-tuhu encidahken kiniersadan, la lit si cian-cianen, dingen la lit perasaan terpaksa bas berbagi hak milik. Enda me buah kinitekenna man Tuhan. Arah kepulungenna teptep warina guna muji Tuhan terbangun kinitekenna, janah arah kinitekenna turah kiniersadan ras keleng ate sapih-sapih ia. Amin pe tentuna, kegeluhen pengikut Kristus paksa si e la terlepas arah tantangen (Perb.4) tapi la urak kinitekenna man Tuhan, justru reh tambahna kiniersadan ukurna guna pulung muji Dibata. Pas bagi Daniel si ertetap ukur tek man Dibata maka aminna gia gule-gulen saja panganna dingen lau saja inemenna, labo e erbahan maka la mbestang ia. La sitik pe ia mbiar/ragu ngatakenca e man Aspenas, pengulu juak-juak istana, sebab tek ia Dibata njujuri.

Tema-ta sendah eme “Pulung Ersada Ibas Jabu” ningetken kita guna ersembah man Tuhan arah jabunta nari gelah reh paguhna kinitekennta (spiritualitas). Jabu eme gereja terkecil, si mencerminken kegeluhen persadan/persekutuan gereja. Adi jabunta pulung ersembah man Tuhan alu tutus tentu kinitekennta pe paguh, janah adi kinitekennta paguh tentu gereja pe bertumbuh, seh maka reh teremna kalak si tek guna ngikutken Kristus, erkiteken idahna kepaguhen kiniteken jabu-jabu kalak Kristen bagi kalak sinterem si ngidah jemaat mula-mula bas palas renungennta. Gundari ibas masa Pandemi Covid-19 enda, kita iuji apakah tetap tutus mabai jabunta ersembah man Tuhan tupung la banci pulung ras temannta seperpulungen!? Mbue kalak si ngaku pengikut Kristus tapi la pernah sekali pe ersembah man Tuhan ibas jabuna nari sebab kidekah enda hanya datang, duduk, diam bas kepulungen secara komunal. Palas renungenta enda ningetken kita selaku kalak si tek man Kristus gelah tetap encidahken kegeluhen si ersembah man baNa. Penembahennta man Tuhan teridah min ibas sikap geluh si teptep wari, si nggit nampati ras erdiate dingen nggeluh rikutken sura-sura Dibata (Invocatio). Emaka marilah, selaku gereja si nggeluh jadikenlah ersembah man Tuhan jadi gaya hidup-nta si teptep wari guna mpeteguhi kinitekennta. Kinitekennta man Tuhan mpeturah kiniersadannta selaku perpulungen Tuhan, seh maka sigejap maka kita enda sada keluarga eme keluarga anak-anak Tuhan. Amin

Pdt. Elisabeth. R Ginting, M.Th

(GBKP Gedung Johor)

__Klasis Medan Namorambe)