Pekan Keluarga Berngi V, Payo Ibas Paksana (Budaya Karo ras  covid 19), Johanes 4:21-30

Pekan Keluarga Berngi V, Payo Ibas Paksana (Budaya Karo ras  covid 19), Johanes 4:21-30

Invocatio: Emaka pedauhlah ibas Kam nari kebiasaan-kebiasaan simelket ras lagu langkah si jahat. Alokenlah alu meteruk ukur kata si isuanken Dibata ibas pusuhndu sabab kata e ngasup nelamatken kam (Jak 1:21)

Ogen : Imamat 13:1-11

Khotbah : Johanes 4:21-30

Tema   : Payo Ibas Paksana (Budaya Karo ras  covid 19)


Invocatio

Ibas bahan invocatiota enda ituriken man banta kerna kunci pembarun geluh kiniteken kalak kristen. Kerina si teridah ibas perbahanenta enda eme representasi arah perukuren. Jakub nuriken kerna dua hal penting ibas teks enda emekap sipemena arus lit ketegasen ibas diri kalak Kristen nentuken geluhna. pedauhlah ibas kam nari kebiasaan si melket ras lagu langkah is jahat. Adi e nggo jadi kebiasaan tentu lanai bo lit simehuli si teridah ibas perbahanenna e. sipeduaken uga carana gelah banci ipedauh kerina e ibas geluhta emekap alu ngaloken au meteruk ukur kebenaren Firman Tuhan. Kata ngaloken ijenda ertina kata Dibata e nggo jadi palas ibas ndahiken kerina pendahin janah e me jadi tolak ukur kerina si nilakoken ibas kegeluhen.

Ogen

Nats enda nuriken sada bagin kerna konsep ‘najis = la bersih’ ras ‘tahir = bersih’. Ibas Padan Si Ndekah konsep enda cukup penting erkiteken kalak si bersih ngenca banci atan ibas ngikuti dahin-dahin ibas rumah pertoton, atan ersembah man Tuhan, janah atan pe muat bagin ibas keteremen. Sementara situasi kempak kalak si la bersih enda sebalikna. Ia ipeserap arah persadan sienterem dingen arah persadan kalak siersembah man Tuhan. Lit piga-piga proses siarus idalani kalak sila bersih. Sipemena iperiksa imam-iman pinakitna e, adi ulih pemeriksan e ngataken maka ia la bersih, iserapken me ia 7 wari dekahna, kenca bage iperiksa ka, adi e pe lenga bersih iserapken ka 7 wari nari, bage me seh pinakit si lit ibas ia e ikataken bersih sue ras pemeriksan imam-imam. Janah kalak si ndube la bersih tapi pinakit silit ibas ia e la erkelekna, ia banci la ipeserap tapi harus maka icucina uisna, janah ridi ia (ay. 6; 14: 8) emaka nggo banci ia ikataken bersih mulihi. Bagenda me kira-kira proses siharus idalani bangsa Israel kerna ndalanken pedah Tuhan kerna kata bersih ras la bersih secara daging kula.

Adi siperdiateken kegeluhenta genduari enda kepeken isolasi mandiri nai nari kepeken nggo lit. janah proses isolasi mandiri si isingetken ibas kitab imamat enda justru kinarusen ersembah man Tuhan. Sebab Dibata Badia maka kita pe ersembah man baNa arus ncidahken geluhta pe Badia. Janah isolasi enda ilakoken guna ngukurken kiniulin si sakit ras jelma nterem sebab penakit kulit e menular. Banci jadi si sakit pe iuru-uru sinterem, ciga ate kalak janah lit kemungkinen ia isiksa secara sosial. Alu bage proses penyembuhenna pasti lebih sulit. Tapi ketika ia nggo pulih janah nggo idah Imam ia bersih emaka banci ka mulihken ersada ras si nterem e.

Khotbah

Cataten sejarah kalak Jahudi ngataken maka ingan ersembah si semal kel ipakeken eme i deleng-deleng. Janah kenca bangsa e enggo ringan i taneh Kanaan maka ipajekken me rumah pertoton ingan ersembah bangsa e i Jerusalem. Ibas percakapen Yesus ras diberu Samaria e iturikenNa maka seh me paksana kalak lanai ersembah i deleng entah pe  Jerusalem. Tole ituriken Yesus maka kalak Samaria (kalak si la nandai Dibata) la itandaina ise siisembahna, tapi Ia (kalak Jahudi) tangkas ietehna, itandaina ise siisembahna. Jesus pe ngerana kerna Si Engkelini (KJV : salvation =  keselamatan) reh arah kalak Jahudi. Seh me paksana, enggo seh pe arah Kesah Si Badia manusia ersembah man Dibata alu payo (KJV : the true worshippers shall worship the Father in spirit and in truth = penyembah – penyembah yang benar akan menyembah Bapa dalam roh dan kebenaran). Lit sitik kel perbedan makna kalimat siitulisken ibas perbandingen 2 bahasa enda ibas bahasa Karo ipake kata manusia janah ibas terjemahen KJV ipake kata penyembah – penyembah yang benar. Enda banci nambahi pngertinta maka kalak situhu-tuhu ersembah man Tuhan ersembah ibas Kesah ras kebenaren (ay. 21 – 24).

Perjumpan Yesus ras diberu Samaria enda pe mengubah melala pandangen kalak tentang uga kin arusna membangun relasi. Jarak sosial (la banci erkuan, la banci ndeher, la banci ersada rsd) ialoken jadi sada kebenaren. Piah turah kemamangen ibas diri diberu Samaria uga maka Yesus nggit erkuan ras ia. tapi kebiasaan si mbaru ibangun Yesus alu ngataken Dibata kesah kap emaka arah kesah e ngenca maka banci manusia nembah Dibataalu payo (ay 24) kalimat enda tentuna ngeruntuhken konflik masa lalu si lit pemahamen maka nembah dibata I deleng-deleng ntah I Jerusalem  labo perkara si utama tapi ersembah man Dibata arus alu Kesah e nge si payo.

Refleksi

Cara beribadahta genduari tentu melala ngenanami peribahen erkiteken situasi covid 19. Raduken ras sie melala ka persoalen si turah guna ncakapken apai ngenda sibenar apai si lang ras sidebanna. tapi arah reunungenta wari enda jelas kel nuriken man bantam aka si man lawanen tetap eme biak kejahaten ras lagu langkah si jahat. Adi kerna ingan beribadah ras uga cara beribadah labo jadi persoalen tapi situhuna uga sikapta ibas ibadah e  nge si pentingna. Jadikenlah enda kerina jadi kebiasaan baru simaba perubahen simehuli man banta, ngelakoken ibadah ibas rumahta masing-masing (labo ka terjeng sanga covid ), menjaga kebersihen, menjaga kesehaten e kerina kebiasaan baru si arus tetap siterapken. Relasi ntah hubungenta pe tetaplah terawat arah kerina media sosial si genduari gelah teridah kepekanta ntah rasa pedulita nandangi kalak sideban.


Pdt. Siska F. Br Tarigan, S.Th, MM

(GBKP Rg. Kayu Embun Simalem)

___Klasis Medan Namorambe___

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba