Pekan Keluarga Berngi IV, Jabu Singenanami Pemere Dibata (Pengerana 3:12-15)

Ogen : Lukas 15:20-32

Kotbah : Pengerana 3:12-15

Tema : Jabu Singenanami Pemere Dibata

Perlebe

Tidak ada yang kekal di dunia ini selain perubahan itu sendiri. Enda sada ungkapen sienggo rusur sibegi dingen banci pe usur ipake ibas erbage acara sihadiri kita. Nuriken kerna ndalani kegeluhen maka labo lit kai pe si tahan rasa lalap. Kerina nge ermasap-masap. Labo nuriken kerna kegeluhen manusia saja tapi situasi kegeluhen pe kepeken adi sipergermetken labo lit sada pe si kekal. Labo banci bali nderbih ras sendah rikutken pe ras wari si pepagi. Melala keriahen bagepe usur ka nge jumpa erbage kesusahen. Ibas kegeluhen jabu pe bage ka. Pengarapen ndube maka kegeluhen jabu kalak si erkiniteken eme jabu si sangap, si dem ibas kiniulin, dem bas kemalemen ate, ersada arih rikutken pe simpar ka ibas kerina pasu-pasu Tuhan arah rejeki. Tapi kinatana labo kerina bagi niarapken enda banci jadi.  Mbue kel nge situasi kegeluhen ndauh bagi siniarapken kita. Rikutken bahan berngi enda sigargari kerna uga situhuna kegeluhen jabu e ibas ngaloken kerina kai si jadi baik ibas si bagi ukur rikutken la bagi ukur pe.

1. Penjelasen Teks

• Ogen : Lukas 15:20-32

Erpalasken ogenta enda lit piga-piga hal si banci siperdiateken arah 3 tokoh si berperan penting ibas cerita anak si bene,

1. Anak Singuda/anak si bene

Siilakoken anak singuda eme mindo bagin ibas erta warisen bapana nari. hukum Yahudi ngataken maka anak sintua arusna ndatken erta 2x lipat asangken anak sidebanna (Ul.21:17). Alu pengertin enda maka anak singuda memang lit hakna i bas 1/3 ibas erta bapana nari. Tapi sijadi masalah ipindona erta e, tupung bapana lit/nggeluh denga. Dingen enda situhuna hal si labo pantas ilakoken ibas tradisi kegeluhen. Kenca anak singuda ngaloken baginna maka lawes ia kku kuta sideban, ngkeriken kerina erta sienggo idayakenna ndube. Ulih ibas kerina silakoken anak singuda, ia nggeluh ibas kiniseran dingen ibas pengogenta ay.32 ikataken “enggo mate” ras bene. Kiasen enda pe banci merujuk kubas kematian kerohanian kalak kristen si enggo lanai nggeluh ibas Dibata. Situasi enda mabai anak singuda sadar kerna perbahanenna dingen erban sada keputusen mulihken ku rumah bapana dingen jera ibas kai sienggo ilakokenna.

2. Bapa

Gambaren bapa ibas pengogenta enda teridah maka situhuna kidekah anakna lawes, ia lit bas posisi si tertima-tima, ay.20 ndauh denga pe ia enggo iidah bapana,,,,,,bapa ijenda bapa si dem alu perkuah ate nandangi anakna seh maka lupa ia kerna kai siibahan anak e tupung ia banci jumpa mulihken ras anakna. Kiam ia ndatken anak e, janah iemaina. Kata iemai (kissed fervently=mencium dengan sungguh-sungguh/dengan keras dan penuh dengan kasih). Arah enda siidah maka bapa tetap ngaloken anakna ibas kerina situasi, tanpa syarat ras tanpa hukuman.               `

3. Anak Sintua

Anak sintua ibas pengogenta ituriken anak si tetap nggeluh ras bapana, si tep-tep wari ngenanami keleng ate bapana. Tapi tupung seninana mulih merawa dingen la ia senang kerna kai siibahan bapana ibas ngalo-ngalo seninana e.  La ia nggit kurumah (ay.28),  cemburu/iri sierbahanca kedungenna ia lit ibas posisi mpeganjangken dirina ras mbanding-mbandingken kerna kai silakokenna sedekah enda ras kai si lakoken seninana e (ay.29,30).

• Kotbah : Pengerana 3:12-15

Bahan renungenta enda eme bagin ibas kitap Pengerana 3:1-15, sinuriken maka kerina si lit ibas kegeluhen enda jadi ibas paksana. Dingen Dibata kap sinetapkenca paksa-paksa enda. Dibata enggo namaken kita ibas kerina rangkaian paksa-paksa silit ibas kuasaNa. La lit si kekal ibas kerina paksa e, seh maka kai siinanami manusia ibas geluhna pe labo ka lit si tetap. Dibata enggo namaken sura-sura ibas pusuh manusia guna ngantusi kerna kegeluhen labo terjeng doni saja (warinta sipepagi ibas ayat 11) seh maka situhuna kerina kai sibanci ilakoken dingen idatken ibas kegeluhen doni enda labo ngasup njabab kerna sura-sura manusia e.

Menaken pengogenta ayat 12, ijenda ijelasken maka ibas ndalani kerina e manusia pe lit nge sura-surana ibas kai si enggo itetapken Dibata e.  Ay.13 njelasken kerna kesadaren manusia ibas banci menikmati hidup (man dingen minem janah ermeriah) jadi erkiteken pemere Dibata ibas kegeluhen siialoken ibas persadanna ras Dibata. Ertina e jadi erkiteken lit hubungen siterjalin ras Dibata. Dingen seterusna pengogenta enda nuriken maka ibas sikap geluh sibagenda Dibata e tetap nge ibas rancangenna nandangi geluhta. Kai pe la banci itambahken entah ikurangi ibas rencana Dibata e.  Kerina e jadi alu sada tujun gelah kita nggeluh tetap “bergantung”/malang man baNa. Enda ngertiken maka situhuna rencana Dibata e mutlak ibas kegeluhenta. Dahinta menikmati rencana e ibas dalan siiberekenNa man banta.

• Aplikasi

Erpalasken pengogen ras bahan renungen idatas maka kepeken sidat pengertin ndalani kegeluhenta rikutken kegeluhen jabunta maka otoritas/kuasa Dibata e tetap lit ras jadi man banta. Saja maun-maun siakap la lit adi kune persoalen ras si la bagi ukur turah. Pengogen ngajarken maka lit persoalen jabu. Banci arah la ersada arih, persoalen ekonomi, persoalen pengampunen ras hal sidebanna. Seh maka rusur kita bagi anak sintua si la ngasup ngaloken situasi e erkiteken la bagi ukurta. Piahna pemere Dibata ibas bentuk sideban (keleng ate Bapa, erta si lit tading ibas ia) lanai ternanami.

Kuasa ras rencana Dibata mutlak ibas kegeluhenta. Labo ngertiken lanai kita banci erkai pe ibas sienda, tapi jelaskel ikataken pengerana maka kerina e tujunna gelah kita malang man Dibata. Berarti ibas malang man baNa e nge kita ngasup nggejapken/ngenanami kerna kerina pemere Dibata si lit bas kita e. Baik ibas bentuk kebutuhen jasmani (man, minem, ermeriah) bagepe dalam bentuk situasi kegeluhen. Ibas persoalen nggeluh pe adi malang man bana maka sigejapken ka nge pemere Dibata e arah gegeh, kengasupen ibas mentasi ras ndungi kerna persoalen kegeluhen. Jadi kuh kel siidah arah bahanta enda maka pemere e lit ibas erbage bentuk sue ras kai kin ate Dibata jadi man banta ibas kegeluhenta. Si arus idalanken kita eme tetap nggeluhken geluhta ras IA seh maka ngasup kita ngenanami kerina pemere Dibata e ibas geluhta rikutken jabunta pe.

Pdt. Peri Natalina Br Sitepu.

(GBKP Rg. Namo Rambe)

___Klasis Medan Namorambe____