Perpulungen Jabu-Jabu, 7 – 13 Nopember 2021, Kerina Erdahin Guna Tuhan (Roma 16 : 1 – 7)

Perpulungen Jabu-Jabu Tanggal 7 – 13 Nopember 2021

(Ngalo-ngalo Tahun Pelayanen 2022)

Ogen             : Roma 16 : 1 – 7

Thema           : Kerina Erdahin Guna Tuhan

Visi gerejanta eme GBKP aron Dibata guna jadi pasu-pasu man isi doni (GBKP menjadi kawan sekerja Allah untuk menyatakan rahmat Allah kepada dunia) ija lako nehisa, tep-tep tahun ilitken tahun program gerejanta. Ibas tahun 2022 si reh enda, tahun program gerejanta eme Jemaat Menjadi Pelaku Aktif Pelayanan. Guna sie me maka arah thema PJJ paksa enda, kita ibabai gelahna kerina perpulungen e erdahin guna Tuhan si ikataken pe jemaat Misioner ntah Emphatos. Bagi ninta usur, lit 3 tingkaten keaktifen perpulungen bas pelayanen gereja eme (1)). Aphatos eme perpulungen si gelarna nari ngenca terdaftar sebage anggota ngawan perpulungen, tapi enggom nahuni lanai idah. Tersinget gelarna sebage anggota ngawan perpulungen, eme tupung ia sakit ntah lit kepaten ibas jabuna, ngawanken ntah pasu-pasu pupusna. (2). Simphatos eme perpulungen si sekali-sekalin kal reh bas dahin-dahin gereja umpama muat peridiken, ngawanken ntah pasu-pasu anakna. Reh PJJ erkiteken ia tuan rumah ntah si mehangkena kal tuan rumah. Reh ngapuli hanya ku rumah-rumah tertentu. Ku gereja pe sung reh, sung lang. (3). Emphatos eme perpulungen si tuhu-tuhu aktif bas pelayanen gereja subuk alu kerehenna bagepe dukungenna arah mereken ras makeken si lit i bas ia.

Perpulungen si erdahin guna Tuhan si idah me ibas gelar-gelar si isingetken rasul Paulus ibas ogenta PJJ enda subuk seh ayat 7 bagepe ku ayat seterusna. Mbue cara siipakeken perpulungen e ibas erdahin guna Tuhan subuk arah pemerena lako nampati bagi siilakoken Pebe (ay. 1-2), perpulungen-perpulungen kalak Jahudi (ay. 4b); erberita si meriah bagi siilakoken Persila, Akuila (ay. 3-4), Epenetus, Maria, Andronikus ras Junias (ay. 5b-7); bagepe alu mereken rumahna jadi ingan kebaktin (ay. 5a).

Bagem pe paksa enda, mbue dahin-dahin pelayanen gereja si banci si buat baginta ije umpama jadi Pengurus PJJ, Kategorial, tuan rumah ibas PJJ ras PA, ngelitken dana, menshare Kata Dibata, ngingetken guna eribadah Minggu, PJJ, PA ntah ngapuli arah Media Sosialta, rsd. Asal nggitlah, pasti lit hal si banci silakoken ras si sehken guna dahin Tuhan.

Pdt. Eben Eser Depari, M.Th

(GBKP Rg. Sp. Selayang)

__Klasis Menara____