Khotbah Minggu, 7 November 2021, Nggeluh I Bas Dame (Roma 14 : 13 – 23)

Khotbah Minggu, 7 November 2021, Nggeluh I Bas Dame (Roma 14 : 13 – 23)

Invocatio         : Jenari nina TUHAN, “Ulihi ka tamaken tanndu ku bas tenten bajundu”. Ibahan Musa bage, janah sekali enda kenca ipedaratna, enggo sehat mulihken tanna ndai bali ras dagingna si deban (Keluaren 4 : 7).

Ogen               : Masmur 62 : 1 – 13  (Antiphonal)

Khotbah          : Roma 14 : 13 – 23  (Tunggal)

Thema             : Nggeluh I Bas Dame


Sada ungkapan kerna kesehaten nina, “Di dalam tubuh yang sehat, terdapat jiwa yang sehat” sinuduhken maka kesehaten kula (jasmani) erpengaruh ku bas kesehaten ukur, jiwa, perasaan sesekalak. Megati pe kesehaten e ihubungken ras uga dekahna sesekalak banci ngeluhken geluhna i doni enda. Nginget pentingna kesehaten e, manusia terus rupaya guna ningkatken teknologi medis subuk guna mendiagnosa bagepe lako nambari penakit si lit. Upaya-upaya preventif (pencegahen) alu erolahraga, njaga keseimbangan nggeluh ibas erdahin, istirahat ras refresing,  mengkomsumsi makanan sehat, rsd terus itingkatken.

Sue ras themanta paksa enda eme nggeluh i bas dame siihubungken ras kesehaten, maka erpalasken 3 bagin Kata Dibata si seh man banta paksa enda gelahna e banci jadi ras si nanami ibas geluhta maka :

  1. Kita arus patuh ndalanken kai arusna sidalanken/silakoken (Invocatio Keluaren 4:7).

Konteks invocatio eme tupung Dibata ndilo ras nuruh Musa lako njumpai raja Mesir lako mindo gelahna ibere raja e bangsa Israel ndarat i Mesir nari guna lawes ku taneh si enggo ipadanken Dibata man nini-ninina. Perlebe guna petetap ukur Musa maka si sangana ngerana ras ia eme Tuhan Dibata sindube isembah nini-ninina Abraham, Ishak ras Jakub, icidahken Dibata me kuasaNa alu ngerehken penakit kusta ibas tan Musa kenca Musa namaken tanna ku bas tenten bajuna (ay. 6). Bagem pe kenca Musa mulihken namaken tanna e ku bas tenten baju jubahna, mulihi ka tanna ndai sehat bali ras dagingna si debanna (ay. 7). Sehatna mulihi tan Musa enda ncidahken maka kuasa Tuhan e luar biasa belinna termasuk nangdangi penakit siibiari manusia kal paksa e sabab penderita kusta ianggap najis emaka iserapken bas jelma si enterem nari. Tapi malemna pe penakit Musa e la terlepas pe ku bas kepatuhenna ndalanken kai si isuruh Tuhan guna ilakokenna. Bagem pe kesehatenta e mbue ipengaruhi kepatuhenta ndalanken hal-hal si mendukung kesehatenta umpama njaga keseimbangen erdahin, istirahat ras refresing. Pola hidup ras makan si payo, rsd.

  1. Sikapta ndalani kegeluhen terlebih ibas ngalaken masalah (ogen Masmur 62:1-13).

Konteks ogen enda eme tupung raja Daud arus kiam i bas istanana nari erkiteken pemberontaken siilakoken anakna Absalom. Ibas masa pelarian e, Daud nggejapken kiniseran si mberat sabab la saja arus nadingken istana rikut kerina fasilitasna bagepe kelaurgana tapi pe nggejapken ketertekanen ukur ras psikis/mental sabab ihianati kalak si ndeher kal ras ia, eme anakna Absalom bagepe piga-piga kalak kepercayaanna bagi Ahitopel sijadi penasehatna kidekah enda (2 Sam. 15:12)  bagepe iperlakuken la mehuli (2 Sam. 16:5-8). I bas situasi e teridah kiniteken Daud si paguh man Tuhan Dibata seh maka ku Dibata ngenca ia tetap erpengarapen (ay. 2, 3). Daud pe tetap teneng (ay. 2, 6) sabab tek ia maka Dibata kap si ngkawali dingen engkelini (nelamatken) ia. Dibata penampatna, emaka la ndigan pe ia talu. Dibata kap gegeh ras kecionna, si mereken kemulian man bana (ay. 7,8). Keleng ate Dibata e tetap rasa lalap, si mereken upah man tep-tep kalak rikutken perbahanenna (ay. 12) Alu bage bas situasi si la dame tapi dem kebiaren ras perbeben e, geluh raja Daud tetap dame. Bahkan ia ngasup pe ngajuk bangsana Israel lako tetap ernalem man Dibata saja katawari paksa pe (ay. 9). Jadi perbeben e la nambahi masalah si deban umpama penakit ibas geluhna. Ibas sie, lit kuan-kuan nina, “Sehaten kalak si beluh rukur asangken si megegeh rukur” sabab kalak si beluh rukur, ietehna mbaleng-mbalengi ukurna. Sedangken kalak si megegeh rukur, pekerina kal ngukuri kerinana piah man pe lanai iakapna entabeh, tunduh pe ningen lanai mbera tunduh. Raja Daud tipe kalak si beluh rukur.

  1. Sikapta nangdangi kalak si deban (Roma 14:13).

Ibas Roma 14:13 teridah kerna sikap ntah perilaku perpulungen Roma si salah-salahen ntah si pandang-pandangen kerna pangan. Enda jadi erkiteken perpulungen si erlatar belakang kalak Jahudi mantangken piga-piga jenis pangan sue ras aturen agamana si ndekah (Im. 11:1-47; Ul. 14:3-21). Sedangken si erlatar belakang la Jahudi, la lit man bana pangan si man pantangenken. Ibas ia si salah-salahen e, dungna cenderung rupaya ndaram-ndarami kai-kai si banci ibahanna sebage dalan nerang ras mpekitik kalak. Emaka dampakna, enggo urak dame ibas perpulungen e sabab cirem ras tawa pe enggo urak kal sabab lanai meriah perjumpan e sabab tupung jumpa lanai meriah cakap tapi buen si tahanen bas cakap, si juru-jurun. Emaka bagi nina rasul Paulus, man jagan gelahna bas sipan ntah lang sada-sada jenis pangan e, ula e mahansa ceda ukur kalak si deban terlebih temanta sada kiniteken (Roma 14:15,16,20,21). Bicara si pan ula ka salahken kalak si la mansa, begepe sebalikna.

  1. Pangan ras inemen (Roma 14:14)

Kesehatenta mbue sitikna ipengaruhi arah pangan-inementa subuk jenisna bagepe pola  makanta. Adi bas konteks nats enda, lit pangan si man pantangenken ras lit si lang erkiteken aturen agama khususna kalak Jahudi bagepe gelah ula tondel ukur kalak. Adi kita paksa enda lebih ku bas faktor umurta, berat badanta, lit ntah langna penakit tertentu bas daging kulanta misalna diabetes, hiper tensi, kanker, rsd. Table Manners ntah etika makan i meja makan eme aturen si arus ipatuhi ras ilakoken sanga man ras-ras i meja makan, sindube ipetandaken kalak Eropa jadi acuan awal bas melala negara i doni enda kerna etika makan i meja makan gia bas piga-piga negara lit ka ibahan tambahen ntah pengurangenna sue ras budaya si lit bas negara e. Bas Sumbang Perpan nina kalak Karo, ipersingeti maka sanga man e siranaken (siukuri) pe kalak sideban segelah ula ipake istilah “Gundera sala gundera buluh belin kubenturi, kutera kalak kutera gelah beltek belinku kubesuri”. Ula min kita ikuanken kalak “Si laga man” erkiteken rangapna. Menurut penelitian melala kal penakit sijadi bas manusia isebabken pola makan si la mehuli (melala man daging, seafood, makanan erlemak, minumen ersoda, rsd) tapi kurang bergerak ntah olah raga piah turah penakit jantung, diabetes, asam urat, kolesterol, rsd. Si inget maka “Man guna beltek labo beltek guna man” ntah “Man guna nggeluh labo nggeluh guna man”. Persinget sideban nina, “Makanlah sebelum lapar dan berhentilah sebelum kenyang” ertina ula sempat kosong lambung/beltekta maka kita man bagepe sebalikna ula ka kenca pulning kal maka si pengadi. Ula ningen pe, “Adi ban buahna e maka penggel dahanna e, penggellah”.  Si jaga kesehatenta gelah tetap meriah ras dame geluhta.


Pdt. Eben Eser Depari, M.Th

(GBKP Rg. Sp. Selayang)

__Klasis Medan Namorambe___

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba