KHOTBAH MINGGU, 31 OKTOBER 2021, Kegeluhen Si Ipelimbarui (Kolose 3: 10-11)

KHOTBAH MINGGU, 31 OKTOBER 2021, Kegeluhen Si Ipelimbarui (Kolose 3: 10-11)

Invocatio      : “Daramilah kai singena ate Tuhan” (Efesus 5: 10)

Bacaan         : 2 Raja-Raja 18:1-7 (T)

Khotbah       : Kolose 3: 10-11     (T)

Tema           : Kegeluhen Si Ipelimbarui


PERLEBE

Pembaruan Gereja tentu tetap denga berlangsung seh ngasa genduari, sejalan alu semboyan reformasi Gereja eme : ecclesia reformata, ecclesia semper reformanda, ertina: “Gereja yang telah direformasi adalah Gereja yang (harus) terus-menerus diperbarui.” Apai kin Gereja e? Gereja e me kita perlebe. Pembaruan (reformasi) gereja sue ertina pembaruan diri sendiri. Emaka selanjutna siperlu terus menerus iperbaharui e perjalanen Organisasi Gereja. Ibarat Mobil sewa ndai, gelah banci tetap mobil e berjalan ras naruhken penumpang e ku tujunna, maka mobil arus terus iperhatikken kerna perawatenna bahkan lit waktuna piga-piga bagin harus irombak gelah ersikapna mobil e, penumpang pe aman ras nyaman seh kempak tujunna. Bageme Gereja si sehat terus erlajar guna mpesikap diri ndahiken singena ate Dibata, alu litna kesadaren ras  keterbukaan untuk terus-menerus dikoreksi, ditegur, bagepe kerelaan untuk iperbarui oleh Firman Tuhan si Tahan rasa lalap e, Verbum Dei manet in aeternum (Firman Tuhan tetap untuk selama-lamanya – 1 Pet. 1:25).

PENJELASEN TEKS

Surat Paulus man Perpulungen Kolose si ibere judul “Kegeluhen Si Male Ras Kegeluhen Si Mbaru”, merupaken surat si mpertegas kerna kalak si enggo nggeluh i bas Tuhan ras lenga nggeluh i bas Tuhan. Lit kesadaren turah i bas diri sendiri kenca enggo sitandai ras tek man Tuhan Jesus Kristus, maka Tuhan Jesus enggo ngalemi salah dosanta, ras nggeluh kita i bas kegeluhen si isurakenNa. Peran perkuah ate Dibata mbelin i bas kita nadingken kuasa dosa entah pe kerincuhen ngelakoken dosa, tapi i bas surat enda lit ka i je respon manusia. Lit turah kesadaren i bas diri sendiri guna mbunuh biak-biak doni si la mehuli ras ngambekenca. Pedoman Penafsiran Alkitab LAI, ngatakenca kata “mematikan” (ayat 5) merupaken kata kiasan si sangat kuat ertina, ula bere kesempaten man dosa tumbuh sumbur menguasai kita. Piga-piga dosa si icontohken Paulus antara lain: erlua-lua, erlagu la mehuli, peraten daging, sura-sura si jahat, rangap (rangap e me nembah man berhala), merawa, ngamuk ras segat ate, cikurak entah pe melasken cakap melket, perguak. Sabab enggo sitangtangi manusia si male ras kebiasanna, ras enggo sipakeken manusia si mbaru si tetap ipelimbarui Dibata si njadiken manusia rikutken tempasNa jine. Ertina, kerembakenta ras Tuhan subuk arah Kata ras KesahNa, si tetap erdahin bas kita, mpengasup kita mpelimbarui kegeluhenta, maka kalak si enggo tek man Dibata, e me kap anak-anak Dibata. Sebage anak-anak Dibata perbahanenta arus ngusih Dibata. E maka arus sipakeken paken ate perkuah, mehuli, rukur meteruk, lemah lembut dingen saber.

Ogen 2 Raja-raja 18:1-7 Nuriken kerna sosok Hiskia, anak Ahas, si jadi Raja Juda kenca telu tahun Hosea anak Ela jadi Raja Israel, Hiskia Jadi raja lit dekahna 29 tahun, janah ia me salah sada tokoh reformator simbelin ibas padan sindekah. Mbue idah kita ibas Pusata si Badia pembaharuan siilakoken Raja Hiskia. Raja Hiskia mereformasi kegeluhen kalak Juda, gelah mulih ku posisi semula sebagai bangsa Dibata. Sebab enggo enterem kalak juda terpengaruh kubas biak kegeluhen kalak Samaria, Kalak Babil simembangun patuh berhala ras nembah man berhala e. Hiskia mereformasi kalak Juda, alu ngeruntuhken berhala-berhala, iripukkena tugu-tuguna, itabahna gana-gana Asera, dingen mabai kalak Juda nembah man Dibata saja, emaka ibuka kembali rumah pertoton gelah Dibata saja si isembah kalak juda alu tutus. Raja Hiskia erkemalangen kel man Tuhan, pang ngelawan raja Assur, guna njadiken Juda jadi bangsa si erkemalangen man Dibata. Emaka Tuhan nemani Hiskia janah sanga ia ibas ndalani masa pemerintahenna rikut kai pe sidahikenna jadi sikap. Sendalanen ras sie ibas Invocatio Epesus 5:10 Rasul Paulus Mabai perpulungen Epesus guna nggeluh ibas terang, terang simaksudken jenda labo soal terang lampu, tapi terang ibas jalan Tuhan, ibas ayat 9 ipertegas Paulus uga perulihen nggeluh ibas terang e me erbage-bage simehuli, sibujur ras si tuhu-tuhu, tentu adi nggeluh kita ibas terang Kristus nggo silakoken kai singena ate Tuhan.

Pengkenaina

Terkadang alergi kita dengan kata “manusia baru” entah pe “hidup baru”, padahal enda jelas bahasa Pustaka si Badia. Gelah tetap nggeluh sebage manusia si mbaru memang la banci instan, tapi arus terus-menerus geluhta ipelimbarui Dibata. Tek man Tuhan Jesus labo secara otomatis lepas kita i bas kerina dosa si biasa silakoken, tapi tek kita maka Tuhan Jesus enggo ngalemi salah dosanta. E maka, kinitekenta man Tuhan Jesus, kerembakenta arah KataNa ras KesahNa si Badia mpengasup kita nadingken perbahanen-pebahanen si gel-gel (kedangingen) si senang kita ngelakokenca (bahasa Paulus: “Nai kam nggeluh rikutken lagu-langkah si la mehuli”). Hal si deban si ncidahken maka geluhta enggo ipelimbarui Dibata e me ngasup kita ipersingeti (itegur, ikoreksi) ras ngasup kita ngakuken dosa-dosanta bagi raja Daud.

Nadingken perbahanen si male ras nggeluh i bas kegeluhen si mbaru arus teridah i bas kerina dampar geluhta. Labo hanya secara formal aktif i gereja bahkan mungkin sebage Serayan Tuhan, tapi teridah i bas kerina pengkebet geluhna: perukuren, kata ras perbahanen ras kata wari pe, termasuk bas rumahna, gereja, lingkungen erdahin, rsd., tetap ngasup ia ncidahken kegeluhen si mbaru. Sabab lit deba kalak nggeluh i dua dunia, berbeda i gereja ras i rumahna entah pe i bas inganna erdahin. I gereja banci badia kel, tapi i rumah sama sekali berbeda.

Minggu enda bengket kita ku bas minggu Reformasi Gereja. Usia Reformasi Gereja i bas tahun enda enggo 504 tahun (1517 – 2021). Ertina enggo lebih 5 abad ndekahna Gereja-gereja Reformasi si ipelopori Reformator, khususna Luther ras Calvin, ipake Dibata mabai kalak si tek man Yesus Kristus ku bas ajaren si benar erpalasken Kata Dibata. Labo seh je saja, Gerakan Reformasi Gereja enggo mabai perobahen si mehuli man peradaban manusia i bas doni enda. Amin pe tentu saja lit kelemahenna, erkiteken la lit ise pe si sempurna i bas doni enda. Minggu Reformasi Gereja enda mabai kita ku bas refleksi kerna kegeluhenta sebage kalak si tek man Yesus Kristus. Khususna erkawiten ras tema sendah, “Kegeluhen si Ipelimbarui”. Esensi kalak Kristen e me perobahen ku si mehuli sue ras peraten Dibata i bas Yesus Kristus. Perobahen enda terjadi i bas proses terus-menerus menuju pada kesempurnaan Kristus. Tentuna enda labo proses si murah. Mbukar ras pekena perbahanen si la payo e me perjuangen si mberat. Tapi bagi Rasul Paulus,tek kita maka Dibata si mpegegehi ras mpengasup kita mperobahi si la payo i bas dirinta ras sekelewetta.


Pdt. Jerry K. Tarigan, S.Th

(GBKP Rg. Griya Rumah Tengah)

__Klasis Medan Namorambe____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba