Minggu Budaya,  03  OKTOBER  2021, Erdame  Ras  Sangkep  Nggeluh (Masmur  122 : 3 – 9)

Minggu Budaya,  03  OKTOBER  2021, Erdame  Ras  Sangkep  Nggeluh (Masmur  122 : 3 – 9)

Invicatio :  “Usahakenlah  tuhu-tuhu  maka  persadanndu  si  ibereken  kesah  e  tetap  irakut  alu   nteguh”(Ep.  4:3)

Ogen      :  Kolose  3 : 12 – 15  (Tunggal)

Kotbah   :  Masmur  122 : 3 – 9  (Antiponal)

Tema      :  Erdame  Ras  Sangkep  Nggeluh


  1. PERLEBE

Nggeluh  erdame  ras  kerina  tinepa  Dibata  tentu  e  me  si  jadi  perayakenta  sebab  perdamen  me  si  erbanca  tetap  lit  keriahen  ukur  dingen  ketenengen.  Erbage – bage  cara   ilakoken  gelah  tetap  banci  turah  perdamen   amin  pe  lit  ka  nge  kalak  si  meriah  ka  nge  akapna  adi  turah  perjengilen  sapih – sapih  ia.  Tentu  kalak  si  la  atena  lit  ibas  ia  dame  banci  ikataken  ibas  ia  lit  perukuren  iblis  sebab  iblis  labo  meriah  ukurna  adi  ibas  kegeluhen   manusia  dem  ibas  dame.

  1. ISI

Masmur  122  enda  emekap  masmur  jiarah,  sinuriken  kerna  keriahen  ukur  pemsmur  erkiteken  Jerusalem  enggo  ipekena  mulihi. Bagi  Israel  kota  Jerusalem  eme  simbol  kehadiren  Dibata  sebab  Jerusalem  merupakan  pusat  peribadaten  man  Dibata  menaken  kin  Daud  mimpin  jadi  raja         Israel. Selaku  pemimpin  Daud  erpengarapen  njadiken  Rumah  pertoton  jadi  ingan  si   simpersadaken bangsa  Israel  amin  gia  bangsa  e  lit  ibas  erbage – bage  suku  sebab  arah  kiniersadan   bangsa  e  banci  nggeluh  alu  dame.  Pemasmur  labo  semata – mata  kagum  nandangi  kota  Jerusalem  tapi  ertedeh  ate  nandangi  kehadiren  Dibata  ije,  enda  teridah  arah  upaya  pemasmur  ngajuk  kalak si  nterem  alu   ermeriah  ukur  berkat  ku  rumah  pertoton  ras  ndatken  kiniulin  Dibata.  Pemasmur    ngajuk  si  nterem  ertoto  guna  Jeruslem  gelah  tetap  lit  ibas  dame,  bage pe  ibas  pertotonna  pemasmur  mengungkapken  pengarapenna  kerna  Jerusalem  si  jadi  pusat  pemerintahen  bangsa  Israel,  segelah  raja – raja  ngasup  mimpin  bangsa  pilihen  Dibata  e  alu  adil,  erkemalangen  man  Dibata  segelah  tetap  turah  perdamen  e.

Jerusalem  jadi  simbol  simpersadaken  Israel  erkiteken  kuasa  Dibata  ipetangkas  arah  suruh-suruhenNa  emekap  Daud  ras  sinursurna.  Wajar   kel  adi  keriahen  e  iterusken  alu  notoken  kesejahteraan  kota  mulia.   Kesejahteraan  Jerusalem  jadi  inti  pertoton  pemasmur.  Kesejahteraan  Jerusalem  jadi  tolak  ukur  kesejateraan  Isarel,  janah  kesejahteraan  para  imam  si  ngelai  jadi  dasar  guna  kesejahteraan  bangsa  Dibata  si  berkat  ku  rumah  pertoton  i  Jerusalem,  bagepe  kesejahteraan  raja  jadi  lambang  kesejahteraan  rakyat.

Kolose  3 : 12 – 15, Rasul  Paulus  nehken  persinget  man  perpulungen  Kolose,  selaku  anak – anak  Dibata  harus  ncidahken  biak  Dibata  ibas  kerina  dampar  kegeluhen  si tep – tep  wari.   Guna  ngasup  ncidahken  biak  Dibata  harus  make  paken  si  erbanca  dame  eme  perkuah,  mehuli,  rukur  materuk,  lemah  lembut  dingen  saber.  Arus  tetap  sikeleng – kelengen  sebab  kekelengen  eme  biak  Kristus  ras  kekelengen  emekap  si  ngerakut  kerinana  alu  serta.

  • PENGKENAINA

Minggu  enda  eme  minggu  Budaya  II,  janah  tema  si  seh  man  banta  eme  Erdame  ras  Sangkep  Nggeluh.   Sangkep  nggeluh  ibas  kalak  karo  eme  rakut  si  telu  (sembuyak,  kalimbubu  ras  anak  beru).  Rakut  si  telu  e  arus  tetap  saling  mendukung  ras  menopang  gelah  banci  mpeturah  dame  amin  pe  erbage – bage  latar  belakang  kegeluhennta.  Ibas  kegeluhenta   maun – maun  banci  turah  perdebaten  entah  erkiteken  tading – tadingen  atau  si  debanna  si  erbanca  lanai  lit  dame  e sebab  ersenina  pe  banci  lanai  erkuan  sienda  kerina  tentuna  bekas  pengajuk  iblis  kap,  emaka  selaku  kalak  si  erkiniteken  marilah  tetap  kita  tetap  nggeluh  alu  ngandalken  pendahin  kesah  si badia  sebab  kesah   eme  simpersadaken  kalak  si  tek  janah  mpeturah  dame (invocatio)


Pdt. Sri Novalinda Br Tarigan, S.Th

(GBKP Rg. Tebing Ganjang)

__Klasis Menara___

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba