MINGGU 12 SEPTEMBER 2021, Nguda Jadi Pemimpin (Josua 1:5-9)

Invocatio         : Kalak si ipilih e arus mejile rupana pentar kal, mbages pemetehna, pedas                                                 nangkap pelajaren, janah lallit sitik pe man pandangen ibas kulana, gelah banci                                         ia atan erdahin ibas istana raja (Daniel 1:4a)

Ogen               : Perbahanen Rasul-rasul 21:7-9 (T)

Kotbah            : Josua 1:5-9                                 (T)

Tema               : Nguda Jadi Pemimpin

KATA PERLEBE

I bas melala referensi rusur ikataken bagenda, kegagalan seorang pemimpin, pendidik, orang tua, hamba-hamba Tuhan i bas ndalanken tanggung jawabna e me kap adi la banci ia jadi teladan, entah pe usihen. Ertina labo hanya terjeng ngerana, ngajari, mereken petuah tapi uga geluhta enda berdampak man kalak si deban. I bas salah sada bukuna Zig Ziglar, sekalak penulis ras motivator AS nari, mereken sada contoh kerna sekalak anak perana si tiba-tiba ngadi ia erdalan ras tulihkenna ku das (menengadah ke atas melihat ke langit). La ndekahsa i pudina enggo ka melala kalak ngadi ngenehen ku das ka. E maka isungkun sekalak si isampingna kel, “De, ada apa memang di atas?” Ijababna, “Oh tidak ada apa-apa Bu, saya memang mau melihat saja ke atas”. Bagem ilustrasi enda, ncidahken man banta uga hebatna perbahanen sesekalak si banci mpengaruhi kalak si deban. Gundari tading sipilih kita pengaruh si apai ateta sicidahken i bas geluhta, si positif entah si negatif?

PEMBAHASEN NATS

Nats ogen khotbahta enda merupaken sada perentah si i peseh Tuhan man Josua guna ersikap, segelah ia ras kerina kalak Israel berkat guna ngepari Lau Jordan lako mengketi negeri si bakal i bereken man Josua ras bangsa Israel e me tanah Kanaan.  Erti gelar Josua ibas bahasa ibrani (PL): Yehoshua atau Yeshua: Tuhan Menyelamatkan (Tuhan adalah keselamatan). Perentah Tuhan man Josua guna ngepari lau Jordan guna mbengketi tanah perpadanen i umputi ras padan Tuhan man bana ras Bangsa Israel si tertulis ibas ayat 3-5. Janah janji e i petegas Tuhan segelah Josua tetap ukurna sebab Tuhan tetap ras Josua ras la ndigan pe i tadingkenNa (ayat 5b). Tuhan tole mereken kepercayan man Josua maka ia sebagai pemimpin guna ndatken taneh si enggo i padanken, tapi Josua ras Bangsa Israel harus ngikutken undang-undang si ibereken Musa (Bdk. Ul. 31:9-12),sada bagin pe ula lupaken, kitab undang-undang e harus tetap i ogeken ibas kebaktindu, pelajarilah e suari ras berngi ras harus i patuhi. Alu bage la banci la kam sangap janah seh sura-surandu (ayat 6-8). Bage pe i tutup i bas ayat 9, mulihi i persingeti Tuhan segelah tetap ukur Josua ras tek, ola mbiar, ola aru atendu sebab aku Tuhan Dibatandu tetap ras kam ku ja pa pe kam lawes. Perentah Tuhan e i patuhi Josua dingen i lakokenna. Banci si oge ibas kitab Josua 6:1-13:7 kerna ketaatan Josua guna mimpin Bangsa Israel. Kepatuhan ketetapen ukur Josua e me jadi telan man serayan Tuhan guna ndahiken pendilo guna ndahiken dahin Tuhan.

Perentah e i peseh Tuhan kenca mate Musa.  Josus anak Nun e me pembantu Musa (ayat 1), ia me pembantu Musa si akrap tupung Musa jadi pemimpin Bangsa Israel. Si ibenai mulai ndaratna Bangsa Israel ibas tanah perbudaken i Mesir, nyaksiken hukumen sepuluh tulah (mara), Paskah si pemena, ngepari Lawit Merah, tupung perdalanen i padang gurun. Josua me jadi panglima perang tupung perang ngelawan bangsa Amalek (bdk. Kel. 17:8-16). Bagepe tupung Musa  i suruh Tuhan nangkih ku Deleng Sinai, tupung Tuhan mereken dua lambar papan batu si isina kerna undang-undang si enggo i suratken guna pengajaren man Bangsa Israel (bdk. Kel. 24:12-18). Sebagai pembantu Musa, Josua e me sekalak si setia ras tutus guna nampati Musa bagepe ketutusen guna ndahiken dahin Tuhan (bdk. Kel. 33:11). Bagepe tupung i Kades Josua me salah sada mata-mata si sepuluh dua si i suruh Tuhan ku Kanaan. Janah Ia me ras Kaleb si mpertahanken pendapat guna melawan saksi palsu mata-mata si sepuluh dua si deban (bdk. Bil. 14).  Josua me sekalak si menghargai ras ngakui kehadiren Tuhan. Empat puluh tahun kebersamaan i dalani Josua ras Musa guna mimpin Bangsa Israel. Pastina Josua melala erlajar arah pengalaman Musa baik pengalamenna suka ras duka ras Tuhan guna mabai Bangsa Israel. Jadi tupung Josua ras Musa sebagai pemimpin Bangsa Israel enggo i tuduhken Josua sekalak si erkiniteken, bervisi, memiliki kebranian, setia, taat, bage pe ertutus ate, tutus ertoto, ras mengabdi man Tuhan arah ndalanken kata-Na. E maka Josua me i pilih Tuhan guna ngantiken Musa. Si tuhuna perentah e enggo i peseh man Musa sope denga Musa mate. Tertulis ibas kitab Bilangen 27:18-19 “Nina Tuhan man Musa, “Buatlah Josua anak Nun sekalak si megegeh jenari tangkuhken lah ia. Siruh ia tedis i lebe-lebe Imam Eleasar ras kerina perpulungen e, jenari i lebe-lebena kerina, momoken maka ia me jadi gancihNdu.” Ibas ogen sipemena ibas kitab Perbahanen Rasul nuriken kerna perdalanen perdalanen Paulus ras teman-temanna ku Jerusalem aminna situhuna nggo melala kiniseran ras tantangen nimai Paulus. Idah kita kesetiaan ras keteguhen hati Paulus ibas meritaken berita simeriag aminna pe nggo ietehna bakal inanamina melala kiniseran ijah tapi tetap idahikenna dahin e alu semangat ras dem pengarapen kerna pengarak, ngarak Tuhan. Adi kentisik sitarik hal enda ku kita uga kange adi jumpa bagi konteks sinanami Paulus?. Kenca Paulus seh i Kesarea bengket me ia kurumah  Pilipus, dahin Pilipus meritaken berita simeriah. Ia me salah sada ibas si pitu kalka si enggo ipilih I Jerusalem, I rumahna me Paulus ras teman-temanna kesilang. Janah lit empat kalak anak Pilipus singuda-nguda si enggo biasa ernubuat. Teridah uga keterlibaten anak-anak Pilipus singuda-nguda ibas ngelai Dibata, janah icidahkenna posisina si penting itengah-tengah perpulungen aminn gia ia singuda-nguda tapi nggit makeken pemere Dibata ibas dirina guna ernubuat minpin perpulungen ras ngelai Dibata. Rikut pe invocationta ibas Daniel 1:4 kerna kriteria anak perana siipilih Raja Nebukadnesar guna erdahin namapati ia ibas istana Raja. Ibas tahun sipeteluken sangana Joyakim jadi Raja, kuta Jerusalem itakluken Nebukadnesar ras kerina erta ras piga-piga kalak itaban ku Babil. Pitu tahun ope denga Jerusalem iserang Babil, kenca Niniwe hancur, kerajaan Babil Berkembang pesat seh maka kekurangen tenaga terpelajar ibas bangsana guna nampati ia ndalanken roda pemerintahan, emaka isuruh raja Aspenas pengulu juak-juak guna lako milih piga-piga kalak Israel, si sue ras Kriteria sinikataken raja eme: mejile rupana, pentar kal, mbages pemetehna, pedas nangkap pelajaren, janah lalit sitik pe pandangen ibas kulana, gelah iajarken kebudayaan ras bahasa Babil, gelah banci atan erdahin ibas istana raja. Janah ibas siterpilih e ikut me salah sada Daniel. Gia Ia ras teman-temanna nggeluh ibas bangsa asing, tapi la kel ia ngelupaken Tuhan Dibatana, itetapkenna ibas ukurna (Dan 1:8) maka la ia nggit ngelanggar aturen agama dingen ngasup engkuasai dirina. Tentu sekalak nguda si ipilih jadi pemimpin ibas ingan sideban ngasup Daniel ncidahken integritasna la nggit terpangaruh ku hal sierbanca merawa Dibata.

PENUTUP

I bas Pustaka si Badia, melala contoh-contoh kerna kehebaten orang muda, i ja i bas kiningundanna enggo ipake Tuhan guna jadi pasu-pasu (berkat) man kalak si deban, misalna: Jeremia, Daniel, Jusuf, Timotius ras Titus. I bas Negaranta pe, Sumpah Pemuda Tgl. 28 Oktober 1928 iprakarsai orang-orang muda, Kemerdekaan RI pe dimotori oleh orang-orang Muda, Reformasi 1998 imotori mahasiswa, ras melala pe contoh-contoh si deban si ncidahken peran penting kaum muda. Maka Presiden RI sipertama Sukarno ibas Pidatona pernah ngataken  “Berikan aku seribu orang tua, niscaya akan kucabut semeru dari akarnya, berikan aku sepuluh pemuda, niscaya akan kuguncang Dunia” Hal si seri iarapken kita arah Persadan Man Anak Gerejanta entah pe PERMATA baik sebage lembaga bage pe sebage pribadi.

Tapi memang dua kali lebih mberat tanggung jawab sekalak orang muda adi ia jadi pemimpin. Sabab umumna adi orang muda, kalak minter sepele, ianggap kurang pengalaman, belum banyak makan asam garam, masih hijau, rsd. Bagem umumna ibelasken kalak. E maka i bas minggu Permata enda sekaligus menjelang HUT PERMATA si pe-73-ken, iarapken kaum muda GBKP jadi rudang-rudang i tengah-tengah keluarga, gereja ras masyarakat, jadi teladan i bas kegeluhenna. Payo memang, la lit kita si sempurna (no body perfect) uga pe mehulina jelma pasti lit kekurangenna. Tapi ula jadiken istilah enda sebage pembenaren i bas kelemahen entah pe kekurangen si lit bas kita seh makana la lit perjuangen si terulin si banci silakoken. Masa muda sekali ngenca, e maka berekenlah si terbaik man Tuhan. Mari radu ras sitotoken ras sidukung PERMATA-nta.

Pdt. Jerry Karlo Tarigan, S.Th

(Rg. Griya Rumah Tengah)