Minggu I Kenca Trinitatis (Minggu UEM) 6 Juni 2021, Ersenina Erturang Ibas Tuhan (Markus 3:20-35)

Invocatio                    : Andiko ulina ras senangna, adi kalak si ersenina ersada perarih! (Msm.133:1)

Ogen                           : Kejadin 50:17-21 (R)

Kotbah                       : Markus 3:20-35 (T)

Tema                          : Ersenina Erturang Ibas Tuhan

Nggeluh ersada ukur (hidup rukun) jadi perayaken kerina jelma, ersada ukur ibas jabu, ersada ukur ibas ersenina ras erturang, ersada ukur ibas pendahin khususna pe ersada ukur ibas Gereja si kin jadi usihen man doni enda. nggeluh ersada ukur tuhu mehuli ras jadi pujin ibas doni enda (Invocatio). Melala dahin si mberat jadi menahang adi ersada ukur ndahikenca. Sebalikna ka pe dahin si arusna menukah banci jadi mesera ndungisa adi la lit kiniersadan ukur. Ngkai usur sijumpai denga perubaten, la siangkaan bas perpulungen? Musuh kiniersadaan ukur salah sada eme lanai sepenggejapen. Ibas Matius 10:36, Yesus pernah ngerana ibas ngikutken IA banci jadi imbangna eme jabuna. Janah bas teks kotbahta, jabu Yesus lanai sepenggejapen ras Yesus. Keluarga Yesus berkesimpulen maka ia nggo bene kewarasenNa janah arus ibaba mulih. Kai sebabna?

• Yesus nadingken rumah ras pendahin sebage tukang kayu I Nazaret. Pendahin e pasti menghasilken ras arah pendahin e banci ia nggeluh. Tapi Yesus nadingken kerinana guna jadi pengkotbah keliling. Ngambekken pendahin si banci menghasilken sen tiap minggu guna jadi pengembara si lalit ingan guna ngamparken takalNa.
• Yesus ibas pelayananNa, tantangenNa eme para pemimpin ortodoks, ahli Taurat ras kalak Farisi. Keluarga Yesus rukur maka lanai waras Yesus sebab, uga pe Yesus talu sebab man lawanenna eme pemimpin ibas ZamanNa.
• Yesus rempet erteman ras kalak si aneh anggap keluarga eme penjala nurung, pemungut cuke si nggo ipelimbarui geluhna, lit ka ras kalak nasional fanatic. Jelas kalak si bage labo tipe kalak bijaksana. Salah sada keluarga Yesus rukur, maka Yesus nggo mulai bene warasNa.

Ibas ay. 22-27 teridah tantangen man Yesus ija ibas Yesus mpelawes setan-setan. Pemimpin-pemimpin e labo pernah nungkun ija nari rehna kuasa Yesus. Eksorsisme (pengusiren setan) merupaken fenomena umum paksa e. Kuasa Yesus lit sebab IA bersekutu ras roh-roh jahat ras “magis mbiring”, janah ritual e sangana ipraktekken Yesus. Yesus kerasuken Beelzebul. Beelzebul merupaken ilah kalak Filistin si isembah i kota Ekron bas Padan si Ndekah. Yesus labo gentar ibas tuduhen-tuduhen kalak e.  Emaka ibuat Yesus perumpamaan kerna Negara, ras jabu si bas perpecahen tentu la ndekah umur Negara e bagepe jabu adi turah rusur perubaten tentu la ndekah umur jabu e. Jadi adi kerajan setan erbelah-belah tentu lanai ia erkuasa. Yesus naluken si jahat alu ngelakoken si mehuli. Bagi kalak enda si jahat jadi mehuli ras si mehuli jadi jahat. Kalak enda banci ngidah keleng ate Dibata tapi ikatakenna keleng ate setan. emaka nina Yesus, kalak si bage asa ndigan la ialemi perban nggo menghujat pendahin Kesah Si Badia.

Ibas ayat 31-35 reh nande Yesus ras senina-seninaNa guna ndilo Yesus. Aminna pe ianggap keluarga Yesus lanai waras, tapi keleng ate keluarga e tetap icidahkenna. Kerehen keluarga Yesus isempatkenNa guna ngajar kerna ise kin senina ras turang (tema). Teridah Yesus njelasken syarat-syarat jadi keluarga si sejati. Keluarga e labo terjeng soal daging ras dareh. Biasana kata ersenina ras erturang e lit ibas keluarga nari. Hubungen si sejati banci terjadi bas sekalak si tuhu-tuhu ndeher janah lalit ikaten ibas daging ras dareh. Ija dage letak hubungen ersenina ras erturang e? adi nina Yesus ibas ayat 35 eme si nehken peraten Dibata, ia me senina ras turang Yesus. Ibas ayat enda banci ibuat kami piga-piga hal uga kerna si nehken peraten Dibata eme ersenina ras erturang ibas Tuhan (tema):

• Hubungen ersenina ras erturang teridah bas pengalemen si seri, apaika adi pengalamen e ialami radu ras. Kalak Kristen mempunyai pengalamen bersama sebage kalak si nggo ialemi.
• Hubungen ersenina erturang e terletak ibas minat si seri. Kalak Kristen mempunyai minat si seri sebab lit sura-surana mengetahui melala kerna Yesus Kristus.
• Hubungen ersenina erturang terletak ibas kepatuhen bersama. Pemungut cuke, penjala manusia ras sekalak nasionalis fanatic (contohna Simon orang Zelot) pernah saling benci, tapi ibas kepatuhenna nandangi guruna eme Yesus Kristus, kalak enda jadi saling ngkelengi. Ersenina erturang bas Tuhan sebab kepatuhennta nandangi guru si seri eme Yesus Kristus
• Hubungen ersenina erturang teridah bas tujuan bersama. Lalit hal sideban si banci mpersadaken kalak kecuali tuajuan bersama. Tujuan bersama banci jadi keluarga. Gereja banci ersada adi seri tujunna guna memenangken manusia man Yesus Kristus. Tujun e guna mengenal Kristus secara baik janah maba kalak ku kemuliaanNa. Ibas hal sideban banci berbeda tapi ibas tujuan kita sepakat. Rambut sama hitam, tapi hati siapa yang tahu? Banci senina e meneken kita. Tapi adi palasna kerna tujun ibas Kristus, teman e pe banci lebihen bagi senina (Kuan-Kuanen 18:24).

Adi si nen kerna ogennta maka, Jusuf si ipakeken Tuhan guna mpekena-kena senina ras keluarga seninana. Perbahanen jahat seninana la ibalaskenna ibas ia lit kuasana merentah. Tapi ibas ia nehken peraten Dibata eme erkemalangen man Dibata ngasup ia ngalemisa ras ngaloken senina-seninana.  Minggu enda igelari minggu UEM ija minggu si merayaken persekutun gerejanta si tergabung bas anggota UEM (United Evangelical Mission) si pusatna I Jerman. Tahun 1962, GBKP bergabung bas pelayanen UEM. Ibas kerja sama ras UEM, ije benaken pajekna Zentrum GBKP, Alpa Omega, KWK ras pelayanen bas bidang kesehaten. Perbedaan labo erbahansa kita terpecah ras lanai siangkan tapi ibas perbedaan e erbahansa kita saling melengkapi sebab keleng ate Tuhan mpersadaken kita.emaka kita gereja arus lit biak mpermuliaken Dibata labo mpermuliaken keakun-ta alu bage tercipta senina ras erturang bas Tuhan. Bujur.

Pdt. Rita Armenia Br Ginting, S.Th

(GBKP Rg. Nabrita)

___Klasis Medan Namorambe____