BAHAN Perpulungen Jabu-Jabu, Tanggal 06-12 Juni 2021, Tema: Pengerakut Kiniersadaan Ibas Jabu (Masmur 133:1-3)

BAHAN Perpulungen Jabu-Jabu, Tanggal 06-12 Juni 2021, Tema: Pengerakut Kiniersadaan Ibas Jabu (Masmur 133:1-3)

BAHAN PJJ (Tanggal 06-12 Juni 2021)

Tema: Pengerakut Kiniersadaan Ibas Jabu

Nats: Masmur 133:1-3

(Budaya/Sangkep Nggeluh)



Ibas kegeluhenna manusia la banci nggeluh sekalak-sekalak, sebab salah sada kodrat manusia eme nggeluh alu bersosialisasi ras sesama manusia. Ibas interaksi e iperluken kerukunen ras kedamen. Tapi gundari hal si bage nggo mulai langka. La banci ipungkiri maka gaya hidup modern erbansa kekelengen e reh dekahna reh urakna ibas kegeluhen manusia, ibas jabu, masyarakat bahkan ibas lingkungan gereja.

Ibas Masmur 133:1-3, ituriken Daud kerna situasi jabu ras bangsana si paksana ngalaken ancaman perpecahen. Kerajan Daud terancam pecah. Sementara bas lingkungen jabuna mulai turah benih-benih permusuhen. Erkiteken sie pemasmur nuriken kerna sura-surana gelah kerina masyarakat ras anggota jabuna ngasup ngidah maka kalak si nggeluh alu ersada perarih e bali kap ras minak wangi si meherga ras desken embun i Deleng Hermon. Minak si mejile eme minak wangi si meherga, si icurcurken ku takal Harun ibas penangkuhenna jadi imam. Minak e langka ras meherga kel. Alu minak e sekalak imam ittangkuhken ras ipebadiaken guna ndalanken dahinna. Tupung minak e ituangken, aromana si merim ras menyegarken pasti minter teranggeh. Bage pe adi kita nggeluh alu rukun ras dame, pasti maba dampak positif man kulanta jine bage pe jadi pasu-pasu man kalak si deban. Jadi salah sada cara gelah banci nggeluh ibas kerukunen ras dame eme ngasup ersada perukuren ras sada penggejapen, sikelengen, ras er meteruk rukur (1.Pet.3:8)

Kalak si nggeluh sada perarih kegeluhenna pe gambarken desken embun i  Deleng Hermon. Puncak gunung Hermon ditutupi salju sepanjang tahun. Sementara daerah-daerah di sekitarnya sangat kering, oleh karena itu embun dari gunung Hermon tidaklah mungkin mencapai bukit Sion yang dibatasi oleh lembah dan kering, namun di sinilah rahasianya, semuanya dapat terjadi oleh karena Tuhan. Bage pe kalak singgeluh ibas kiniersadaan, adi Dibata ringan ibas kegeluhen sekalak jelma, maka kerina penghalang guna mpeturah kerukunen ras kedamen banci itadingken, erkiteken ia termotivasi guna mbuka diri ngaloken ras ngasup memahami kalak si deban. Konkritna nggeluh saling menghargai pasti turah erkiteken kerina nggejapken maka ia kerina tinepa Dibata si memiliki potensi-potensi khusus bage pe memerluken kebutuhen-kebutuhen khusus ka. Eme sebabna ikataken Paulus gelah si sampat-sampaten ibas maba baban geluh enda (Gal. 6:2a). Erkiteken sie maka gaya hidup individualisme ras eksklusivisme arus sipedauh bas kita nari, gelah pasu-pasu erkiteken kiniersadaan e banci ras-ras sialoken. Sebab ibas kegeluhen si lit ije kiniersadaan ku je me Tuhan erpadan mereken pasu-pasuNa.

Terkhusus ibas budaya kita kalak Karo, lit pengerakut kiniersadaanta si tertuang ibas sistem kekerabatennta sinigelari sangkep nggeluh eme Kalimbubu, Senina ras Anak Beru. Secara prinsip kiniersadaan kegeluhen kalak Karo icidahken ibas kegeluhenna ibas ersangkep nggeluh. Sikap dasar ibas rakut si telu enda eme mehamat erkalimbubu, medes ersenina ras metami eranak beru. Janah sistem enda igambarken desken daliken si telu, si banci erguna adi kuh ia, bage pe bas kegeluhennta bas jabu la banci lit kesirangen, erkiteken adi lit perpecahen maka lanai bo lit oratna. Alu bage tep-tep kalak arus berusaha guna njagai kiniersadaan e, subuk bas jabu, masyarakat ras gereja. Sebab ija lit kiniersadaan si sada perarih ije me Tuhan mpepaler pasu-pasuNa. Amin


Pdt. Rita Armenia Br Ginting, S.Th

(GBKP Rg. Nabrita)

___Klasis Medan Namorambe___

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba