MINGGU 30 MEI 2021 (MINGGU TRINITATIS), Persuruhan Si Dem Kesah Dibata (Yohanes 3: 31-36)

MINGGU 30 MEI 2021 (MINGGU TRINITATIS), Persuruhan Si Dem Kesah Dibata (Yohanes 3: 31-36)

Invocatio  : “Enggo ibereken Bapangku kerinana man bangKu. Ise pe la nandai Anak seakatan Bapa, janah ise pe la nandai Bapa seakatan Anak ras kalak si man bana enggo ipetangkasken Anak e” (Matius 11:27).

Ogen       : Yesaya 6:1-8

Khotbah   : Yohanes 3: 31-36

Tema       : Persuruhan Si Dem Kesah Dibata



Dibata si Telu Sada (Dibata Bapa, Dibata Anak ras Dibata Kesah) eme misteri si sangat sulit ipahami alu akal, otak manusia terlalu terbatas guna ngangkaisa. Justru bapa gereja Agustinus ngataken: maka adi enggo kin iakapndu iangakaindu berarti labo Tuhan e. Adi kam memahami Dibata si Telu  Sada berarti e labo Dibata si tuhu-tuhu. Jadi arah ungkapen enda ngataken man manusia maka sangat sulit bagi kita memahami Dibata si Telu Sada e, sebab Dibata si Telu Sada eme sebuah misteri si sulit diungkapkan. Manusia berupaya guna memahamisa alu erbage-bage cara ntah pe erbahan analogi. Umpamana: Lit kalak si ngataken maka Dibata si Telu Sada banci ipahami bagi Matematika, maka nina Dibata si Telu Sada labo sada tambah sada tambah sada, tapi pe sada kali sada kali sada. Lit ka kalak ikatakenna memahami Dibata si Telu Sada bagi Matawari, Matawari ndauh idatas langit eme Dibata Bapa. Janah lit Cahayana si banci si idah (Dibata Anak), ras lit Lasna banci si gejapken (eme Kesah Si Badia). Lit ka singataken maka Dibata si Telu sada banci ipahami  bagi Lau, Es ras Uap. Lau membeku jadi es, janah lau ipanasken jadi uap lau. Tapi Lau, Es ras Uap lau eme H20. Lit telu keberadaan, tapi situhuna sada. Lit ka ianalogiken bagi Ruangen si terbentuk arah Panjang (Gedang), Lebar (Belang) ras Tinggi (Ganjang). Adi ibeneken salah sada ibas telu unsur e maka labo Ruangen gelarna. Lit ka ianalogikenna bagi sekalak Direktur Perusahaan si tergelar Tono; i rumahna ia eme Bapa anak-anakna, i Kantor ia igelari Bos, janah i Perpulungen ia igelari Pertua.  Tapi Tono e sada. Kepeken kerina ilustrasi analogi enda lenga bo ter angkai alu mbages kerna Dibata si Telu sada e.

 

Uga pentarna gia  kita, uga geniusna gia otakta, lenga bo ngasup kita nuriken kerna keberadaan Dibata si Telu Sada e. Janah Dibata si Telu Sada labo perlu man perdebatenken, gia mungkin megati lit ngataken man banta Telu Dibata si isembah kita, tapi kita memahami maka Dibata si isembah kita e eme Dibata si Telu Sada (Bapa, Anak ras Kesah), amina gia labo tuhu ras la logika nina kalak, em ncidahken maka pikiren manusia e terbatas kel, ras labo ngasup ngangkai secara logika kerna Dibata si Telu Sada . Jadi uga dage cara manusia guna ngangkaisa? Eme alu kiniteken / Iman. Kita selaku warga gereja tek maka Dibata reh ku tengah-tengah doni enda labo alu sada cara ngenca tapi telu cara, Allah dalam satu substansi dan tiga pribadi. Allah yang menyataken diriNya sebagai Bapa, Anak ras Roh, alu ungkapen Allah di atas kita, Allah di antara kita dan Allah di dalam kita.

Nats kotbahta enda merupaken kesaksin Yohanes Peridiken kerna ise kin Yesus Kristus e. Sebab lit kalak erpengakap maka Yohanes peridiken e me Mesias, tapi ikatakenna maka ia labo Mesias, tapi ia me persuruhen Dibata si leben asangken  Yesus e. Yohanes Peridiken tuhu-tuhu tek maka Yesus eme kap Anak Dibata, ia hanya si mbuka dalan kempak Mesias e. Yohanes Peridiken menegasken ise kin Dibata si lit ibas diri Yesus Kristus e, maka IA kap Anak Dibata si mbelin, si ndauh belinen asangken ia. Janah amina gia Yesus e reh belinna labo iakap Yohanes peridiken masalah sebab ia hanya si nikapken dalan nge ngenca.

Arah nats enda banci si idah engkai maka Dibata mengutus/nuruh Yesus ku doni enda?

  1. Mpejumpaken dua Ingan eme Surga ras Doni. (ay.31-32) Surga eme ingan si Badia, si sempurna. Janah doni eme si dem alu dosa, melala kekurangen. Emaka doni si dem alu kekurangen ras dosa enda ate Yesus gelah ipelimbarui, dingen lanai nggeluh iteruh kuasa dosa. Yesus  si reh i Surga nari e,  belinen asangken ise pe. IA eme kap si mada kuasa. Ise si reh i doni enda nari sikerajangen doni kap, tapi ise si reh i Surga nari sikerajangen Surga. Erkiteken Yesus e reh isurga nari maka IA ngenca ngasup nuriken kerna Surga, kai si idahNa ras kai si ibegiNa. IturikenNa sie ku doni  gelah manusia si nggo ndabuh kubas dosa e tek man baNa, tapi justru ise pe la tek kai si ikatakenNa.

 

  1. Gelah manusia nandai Dibata e. (ay.33-35) Tuhan ngenca banci mpetandaken diriNa man manusia gelah banci sitandai. Gelah itandai kalak maka IA kap si erkuasa i doni enda. Gelah tangkas man manusia maka labo lit si lebih erkuasa seakatan Tuhan Yesus e ngenca. E ngatakenca man banta maka man baNa saja ngenca kita ernalem.  Ise si tek nandangi kai si ikatakenNa e iakukenna maka Dibata e benar kap. Sebab persuruhen Dibata nge sinehken kata Dibata, erkiteken IA dem Kesah Dibata. si ngasup mereken kemalemen ate man kerina kalak si ernalem man baNa.
  2. Ngaloken kegeluhen si la erkeri-kerin. (ay.36) Kegeluhen manusi biakna ermasap masap, pasti ngalaken kematen sebab labo lit sada pe si kekal, janah la ate Tuhan manusia e mate ibas dosa. Emaka ikataken pe ise si tek man Anak e ialokenna me kegeluhen si tuhu-tuhu si la erkeri-kerin. Tapi sebalikna ise singelawan Anak e asa ndigan pe la ngaloken kegeluhen si ras lalap e, janah ia lalap iteruh ukumen Dibata. Sebagai gambaren man banta adi kita sendiri pe keleng kel ate kalak anak si ipelimiken Dibata ku tengah-tengah jabuta tentuna sikelengi nge kalak sierkeleng ate man anakta e, tapi dikune nembeh atena, ipesega-segana, isakitina, tentuna kita pe nembeh ateta man bana, janah adi banci si ukum pe ateta ia. Dibata pe keleng kal ateNa anakNa, janah ise sierkeleng ate man anakNa e ikelengiNa kap.

Erkiteken sie kuga dage ninta? Tek nge kita man Yesus e ntah lang, hal enda labo mengubah situasi ras keadaan. Umpamana di kune kam bengket kubas kerangen tua, janah enterem kalak ngatakenca ibas kerangen e lit harimau, soal tek ras la kam tek labo meneken keberadaan harimau e. Adi la kam tek lit ije harimau e labo ngatakenca bene harimau e. Harimau labo bene sebab kam labo tek kerna keberadaan harimau e. Adi la kam tek kerna keberadaan harimau ras bengket kam ku bas kerangen e, kai nge si berubah? Harimau si bene erkiteken la kam tek ntah kam si bene erkiteken ipan harimau. Kam nge si bene. Jadi kai pe si iteki ras si la iteki labo mengubah kenyataan. Bicara tek ras la pe kam tek maka selain doni enda lit surga, labo mengubah kenyataan, siberubah eme kam. Adi ningku lit sada ingan si seh kel jilena, tek nge kam ntah lang? Bicara la pe kam tek labo mengubah keberadaan ingan e, saja la kam pernah seh kubas ingan e, sebab la kam tek,janah labo lit nura ukurndu guna ndaramisa. Saja  enggo ipetangkas man bandu ise kin Yesus e, IA me kap Persuruhen s idem Kesah Dibata.

Tema Kebaktin Mingguta ngatakenca: Persuruhen si dem kesah Dibata. Maka sini imaksudken persuruhen e eme Tuhan Yesus Kristus e kap. Ertina maka iajuk kita gelah ibas tetap kinitekenta nandangi Tuhan Yesus Kristus e saja ngenca, sebab IA me kap persuruhen Dibata si keleng atena guna nehi sura-suraNa itengah-tengah doni enda eme guna nelamatken manusia si perdosa. Erkiteken sie tek lah maka Yesus eme Anak Dibata situhu-tuhu si reh i Surga nari, ia me anak Dibata si iutus guna ndalanken kekelengen eme nelamatken manusia si perdosa. Guna sie ulanai ragu kerna Yesus kap Anak Dibata. Arah kesaksian Yohanes peridiken enda tentuna nambahi  kinitekenta nandangi Yesus e, selaku Anak Dibata si nggeluh, si reh guna keselamaten mansusia. Arah kesaksin Yohanes peridiken enda mabai kita reh yakinna maka ia Anak Dibata si idemi Kesah si Badia.  Ibas invocatio pe ituriken man banta maka adi tuhu-tuhu kita tek nandangi  Tuhan Yesus e, maka tangkas me penandaita kerna Dibata Bapa e, sebab ikataken Yesus e Nina: “Enggo ibereken Bapangku kerinana man bangKu. Ise pe la nandai Anak seakatan Bapa, janah ise pe la nandai Bapa seakatan Anak ras kalak si man bana enggo ipetangkasken Anak e” (Matius 11:27). Sienda kerina banci siangkai eme erkiteken pengajari Kesah si Badia e. Ibas pengogenta Jesaya 6:1-8, si idah uga pendahin Kesah si Badia nandangi diri nabi Jesaya. Asum Dibata ndilo nabi Jesaya, guna naksiken Dibata man doni enda, arah pendilo e, lit proses penyucian dosa sini ilakoken terhadap diri Jesaya, seh kedungenna asum Tuhan erlebuh alu ngataken Ise nge ndia nggit maba berita ibas Aku nari, ngaloi Jesaya nina “Aku suruhlah Aku Tuhan”. Teridah maka Kesah si Badia erdahin ibas diri Jesaya guna ngaloken pendahin ibas Tuhan nari.


Pdt. Antonius Tarigan, S.Th

(GBKP Lau Cih)

___Klasis Menara___

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba