Perpulungen Jabu-Jabu, 23-29 MEI 2021, Kerina Ringring lit Gunana (Roma 12:4-8)

Ogen               : Roma 12:4-8

Tema               : Kerina Ringring lit Gunana (Pentakosta)

Ibas sada bangunen Gedung si mejile ras kokoh, lit ije erbage-bage bahan bangunen si banci erbahanca bangunen e banci pantek alu mejile ras nteguh. Ibas kerina bahan-bahan e lit semen, batu bata, besi, kersik, seng, kayu, cat tembok, baut, batu galang, kerikil, paku rsd. Kerina bahan-bahan enda i persada guna banci pajek bangunen ndai. Ibas kerina bahan-bahan ndai megati lit iakap bahan si paling penting guna banci ndatken bangunen si mehuli. Umpamana semen na arus simejile ntah pe meherga, cat tembokna arus si paling mbaru. Padahal adi iukurken kai ertina semen si mejile adi kersikna la lit, kai gunana cat tembok si paling mbaru ibas gedung adi baut-baut ntah paku na lalit, tentu bangunen e banci mbulak.

Surat Paulus man perpulungen I Roma negasken kerna ugakin lagu langkah kalak Kristen, kalak Kristen si nggo ngaloken perkuah ate Dibata tentuna arus mampu ncidahken biak simehuli baik secara pribadi ntah pe ibas perpulungenna. Dibata ngaturken kerina alu serasi, Ring-ring si sada ras si debanna saling terkait, berhubungen ras la banci berdiri sendiri. Saling membutuhkan ras enda lit gunana ibahan Dibata  Ay. 4“Labo banci nina mata man tan, “aku la perlu kam!” Bage pe labo banci nina takal man nahe, “aku la perlu kam!” Ring-ring si sada ras si debanna saling membutuhkan. Umpamana, perlu kita teh erkiteken muas. Labo hanya babah ngenca si bertindak, tapi erbage anggota ring-ring saling bekerja sama, ibenaken mata ngidah i ja kin teko berisi teh, nahe erdalan, tan njemak teko dingen nuangkenca ku gelas, je nari babah ngalokenca ras nginemsa. I bas persadanta selaku kula ni Kristus, melala erbagena kita, uga pe bayakna aku, ras jagona aku, pasti aku butuh kalak si deban, bage pe sebalikna. Ertina i bas persadanta mbue pe erbagena, kita arus saling melengkapi. Sue bage sikataken Paulus ibas kitab Roma 12:4-8 sijadi ogenta erbage Pemere siibereken Tuhan; kalak singasup ernubuat, ernubuatlah sue ras ajaren kiniteken. Kalak si kengasupenna guna nampati, nampatilah. Adi ibereken Dibata Kengasupen guna ngajar, ngajarlah (ayat 7). Kengasupen petetap ukur kalak, lakokenlah e. kengasupen mere man kalak sideban, lakokenlah alu ukur menahang. Kengasupen jadi peminpin, arus tutus erdahin. Kengasupen ncidahken perkuah ate man kalak sideban, dahikenlah alu ukur meriah (ayat 8). Sienda iterangken Paulus bageme ibahan Dibata pelain-lain kengasupen ras bagin ibas perpulungen tujunna guna melengkapi sada ras sidebanna, sekaligus ncidahken bahwa Dibata e bayak ibas kai-kai pe ras mbelinna KuasaNa man manusia, janah e terjadi ibas perpulungen guna ncidahke kuasa kemuliaan Tuhan. Ibas Gereja pe lit nge erbage-bage tugas ras tanggung jawab si nggo iaturken, janah dasar e kerina eme guna ncidahken kekelengen Tuhan.

Labo ngatakenca institusi gereja lanai perlu, tapi gelah keberadaan gereja la terjeng guna mpebelin diri secara institusional (lembaga) melainken lebih ku bas fungsina lit I doni enda guna jadi sira ras terang, enda motivasi si sehken Paulus gelah kai pe sibahan kita sipaling utama guna memuliaken gelar Tuhan ras si kerina ibahan alu ukur meriah. Kesah si Badia (Pentakosta) tujunna guna namapati manusia, bagepe kegeluhen kalak si nggeluh ibas Kesah. Alu istilah bas kita, rutang si megegeh nampati si kurang megegeh. Si kurang megegeh (duit, pemeteh, tenaga,perukuren) e me si lebih erpengayak kita alu ersada nampatisa. Gelah ula terjadi perpecahan, maka sada ras si debanna arus tetap saling mperdiateken, siergan, sikeleng-keleng dingen sisampat-sampaten. Virus-virus si banci erbahanca turah perpecahen, kerangapen, kiniganjangen ukur, egois, menganggap diri paling benar e me si perlu itengeti dingen ibeneken i bas geluhta, alu bage terpuji Tuhan.

Pdt. Jeri Karlo Tarigan, S.Th

(GBKP Rg. Tangkahen)

__Klasis Menara___