Khotbah Minggu 16 Mei 2021, Eksaudi, Kemalemen Ate Kalak Benar (Masmur 1:1-6)

Invocatio      : Tapi Istepanus si dem alu Kesah Si Badia, natapku das. Idahna terang si ersinalsal ibas Dibata nari janah idahna pe Jesus tedis arah kemuhen Dibata (Perb. 7:55)

Ogen            : Johanes 17:6-19 (T)

Kotbah          : Masmur 1:1-6

Tema            : Kemalemen Ate Kalak Benar

Kerina manusia ersura-sura nggeluh ibas kemalemen ate. Malem ate e, ertina senang, meriah, (Ind. Berbahagia), kesangapen. Guna nggeluh ibas kemalemen ate (bahagia) eme pilihan, si merupaken keputusen si turah bas pusuh manusia nari. Kemalemen ate e idarami, iperjuangken ras inikmati bas kegeluhen enda. kemalemen ate erbahansa kita merasa sempurna. Kai makna kemalemen ate situhuna? Uga carana kita gelah nggeluh ibas kemalemen ate? Kemalemen ate e ketenangen hati. Banyak harta belum tentu tenang hidupnya. Melala cara ilakoken kalak alu tujun ras alasen “bahagia ntah kemalemen ate”. Kemalemen ate e banci si dat arah bahan kotbah minggu enda.

Rikutken bentuk tulisen kitab Masmur enda ibagi ku bas erbage: Masmur pujin siertina pujin man Tuhan Raja, ende-endeen I Sion nari.; Masmur pertoton ertina pemindon, kiniteken ras pengataken bujur; Masmur-masmur raja; janah Masmur pengajaren ertina kepentaren, sejarah, liturgy. Masmur 1:1-6 enda merupaken Masmur pengajaren khususna Masmur kepentaren. Masmur pengajaren enda biakna ngajar ras mereken perenungen, umpamana kai gunana Taurat Tuhan man kalak si erkiniteken, uga nggeluh kalak benar ras kalak jahat, pasu-pasu man bana, uulihna ersenina erdame. Cara pengajaren eme alu makeken kata-kata pengajuk. Isuruh ngelakoken si mehuli ras mpedauh perbahanen si la mehuli. Masmur enda membandingken dua jenis kalak siniakui Dibata, alu berbage prinsip hidup. Kepeken kata kunci pemasmur guna nggeluh ibas kemalemen ate eme kalak si empuna prinsip hidup:

Ayat 1: la megiken pedah kalak jahat, kalak si la tek man Tuhan, ietehna kebenaren tapi la ilakokenna.  Enterem kalak gelah ngajuk kita gelah ikut ibas la kebenaren. Kalak si tuhu-tuhu tek man Tuhan la megikensa. la ngusih perbahanen kalak perdosa, eme kalak si ngelakoken kejahaten ras  nggeluh alu hawa nafsuna, adi terjemahen Indonesia “tidak berdiri di jalan orang berdosa”, kedagingenta bas Tuhan la perlu iandalken. La erteman ras kalak megombang man Dibata eme kalak si anggap remeh kebenaren Tuhan, kalak sib age usur merendahken ras menggosip kerna temanna.  Kalak si tuhu-tuhu tek man Dibata teridah arah kai si la ilakokenna. Pemasmur nuduhken prinsip uga malemna ate kalak si ertedeh ate ras erngena ate man Tuhan. Kerina enda banci ilakoken adi:

Ayat 2 “tapi keriahenna eme matuhi Undang-undang Tuhan dingen ngukurisa suari ras berngi” kalak si nggeluh bas kemalemen ate Dibata labo hanya berbalik bas kejahaten nari tapi membangun nggeluh alu Kata Dibata. ia erusaha guna matuhi peraten Dibata ibas pusuh nari alu senang. Ia ertedeh ate man Tuhan janah tetap iogena Kata Dibata suari berngi (terus menerus), labo sekali dua kali ngenca tapi tiap wari. Kai gunana? guna membentuk pikiren, sikap, ras tindakenta.

Ayat 3 nggambarken kalak si ermalem ate e desken sada batang kayu si turah I tepi lau anak, amin reh pe musim perlego, bulungna tetap meratah ras erbuah sabab uratna she ku bas lau anak, sangap bas pendahinna Enda merupaken ulih kalak si tutus ngikutken Dibata.

Ayat 4-5 melukisken kerna kalak jahat si la nggit bertobat, ulihna eme: bali ras segal si iembus angin, kalak si bage bene me. Kalak la pernah turah ras la pernah erbuah e iukum Dibata, dingen isirangken ibas bangsa Dibata nari. Banci saja sinen dalan kalak jahat mudah asangken kalak benar (korupsi, la adil, erlua-lua, nipu, lalit kekelengenna, egois, mau menang sekalak, rsd), la perlu iri man kalak sibage sebab kemalemen ate si tuhu-tuhu labo idatna.

Ayat 6 janah kalak si benar itegu-tegu dingen ikawali Tuhan. Tapi kalak jahat dalan ku kebenen. Kemalemen ate eme tetap iarak-arak Tuhan ras itegu-tegu. Emaka bagi nina ibas Heber 3: 15 “adi ibegindu sora Dibata sendah, ola pemersik ukurndu bagi nini-ninidu nai asum ia berontak ngelawan Dibata”.

Emaka ibas ogennta Yesus mempersiapken perpisahen ras ajar-ajarNa, janah ertoto man ajar-ajarNa gelah ajar-ajarNa jadi milik Allah janah tek man Kristus. Bagi Yesus, kita enda Dibata empuna. Kita labo mungkin terpisah ras Dibata Bapa, Yesus ras Kesah Si Badia. Pertoton Yesus e gelah Dibata Bapa nampati ajar-ajar gelah tetap ngelakoken dahin surgawi aminna pe tading I doni (ay.15 “labo kupindo gelah ipedarat ibas doni enda nari tapi kupindoken man baNdu gelah ikawaliNdu ia ibas si jahat nari”), ndalanken perintah Tuhan eme kebenaren (ay.17).

Minggu enda minggu Eksaudi “Begiken min o Jahwe” ngajarken gelah tetap ngelebuh Tuhan ibas tep-tep kesempaten. Minggu enda mabai kita ersikap ngalo-ngalo kerehen Kesah si Badia kenca kita mperingeti Tuhan Yesus nangkih ku surga. Labo itadingken Dibata kita melumang. Adi erlebuh kita man Tuhan tetap nge idengkehkenNa. Pingko-pingkota alu dem kesabaren ibegikenNa kita. Bagi Istepanus, ipegegehi Dibata ibas ngalaken kiniseran. Istepanus ikuasai Kesah Si Badia tetap setia seh matena pe. Bagem arusna kalak si tek man Tuhan, tetap ndalanken si ngena ate Tuhan. Ije me kemalemen ate e. bujur.

Pdt. Rita A. Br Ginting, S.Th

(GBKP Nabrita)

___Klasis Menara___