Kenangkihen Tuhan Jesus Ku Surga, Kam Me Jadi Saksi (Lukas 24:44-53)

Kenangkihen Tuhan Jesus Ku Surga, Kam Me Jadi Saksi (Lukas 24:44-53)

Invocatio  : I Surga kap Dibatanta, idahikenNa kai ateNa ibahanNa (Msm 115:3)

Ogen         : Efesus 1:15-23 (A)

Khotbah    : Lukas 24:44-53 (T)

Tema         : Kam Me Jadi Saksi


 



  1. Kata perlebe

Tep-tep tahun siperingeti wari kenangkihen Tuhan Jesus ku Surga, padahal lenga bo lit manusia si pernah naik ku Surga rikutken siniidah kita ibas doni enda, tapi engkai maka siperingeti tep-tep tahun kenangkihen Tuhan Jesus ku Surga? Kai nge si dat makna kenangkihen Tuhan Jesus ku Surga e? Tentu kenangkihen Tuhan Jesus ku Surga enda jadi sada bukti si nyata maka lit kegeluhen kenca kematen ras enda ngataken maka kerina si lit ibas doni enda sifatna sementara saja, lalit sada pe si kekal. Peristiwa kenangkihen Tuhan Jesus ku Surga eme sada peristiwa si labo menukah ngalokenca, surga e lenga iidah, janah lenga pernah lit kalak mulih i surga nari ku doni enda, emaka kiniteken ngenca sierbanca kita tek maka lit surga siniarapken kita. Janah kenangkihen Jesus ku surga labo man Jesus dampakna tapi man kerina jelma si tek man Jesus selaku juruselamatta. Enda me si jadi kesaksinta.

Kata saksi ertina meneguhkan bahwa ia melihat/mendengar/mengalami sesuatu pengertian ilahi yang diberikan kepadanya. Saksi eme si mereken berita (informasi). Ibas terjemahen KBBI kerna saksi eme kalak si ngidah ras meteh alu tangkas sada-sada kejadin. Alu bage pengertin saksi eme kalak si tuhu-tuhu mengalami gelah naksiken alu payo kai si igejabkenna e.

  1. Isi

Ibas bahan khotbahta Lukas 24:44-53 lit 3 hal si penting si banci siidah eme:

  • Ayat 44-48, ope entah nandangi Jesus nangkih ku surga, iberekenNa sada tugas man ajar-ajarNa guna naksiken kerina kerna IA. Ipersingeti Jesus ka mulihken kerna Dirina emekap Mesias si enggo isuratken ibas undang-undang Musa ras surat nabi-nabi bagepe ibas Masmur. IA si ngenanami kiniseran, mate i kayu persilang, ras ibas wari sipeteluken keke ibas si mate nari. Enda kerina ilakokenNa guna nelamatken manusia. Enda arus isaksiken ajar-ajarNa selaku ia kerina saksi nggeluh ibas peristiwa e. Bagepe ibas gelarNa isaksiken kerna berita jera/pertobaten ras pengalemi dosa ras enda ibenaken i Jerusalem nari.
  • Ayat 49, ieteh Tuhan uga kerna keadaan ajar-ajarNa emaka ibas ia ndahiken dahin ersaksi e, ibereken Jesus me penampat eme kuasa i datas nari kuasa Kesah si Badia. Guna si e ajar-ajar Jesus arus tetap nimai ibas kuta seh nusurna kuasa e.
  • Ayat 50-53, ibaba Jesus ajar-ajarNa ku darat kuta, i Betani. Ije iangkatNa tanNa ras ipasu-pasuNa ajar-ajarNa. Asum IA masu-masu, sirang IA ras ajar-ajarNa, iangkat IA ku surga. Kenca ialoken ajar-ajarNa e pasu-pasu ibas Jesus nari, nembah erjimpuh ia kerina ras alu meriah ukur ndahiken dahin si ibereken Jesus man bana, eme ersaksi.

Bagepe ibas pengogenta Efesus 1:15-23 ituriken uga Paulus ibas pejara nari mbegi pertumbuhen iman perpulungen i Efesus, enggo erkiniteken man Tuhan ras erkeleng ate man anak-anak Dibata, meriah kel ukurna ras ngataken bujur ia ibas keriahenna, bagepe itotokenna perpulungen i Efesus ipindokenna man Tuhan gelah perpulungen iberekenNa kepentaren guna nandai Tuhan (ayt 17), nalangi pusuh peratenna gelah terang pengangkanna kerna Tuhan seh maka ietehna kai si banci iarapkenna ibas Dibata nari (ayt 18) , bagepe gelah ieteh perpulungen e maka seh kel buena erta-erta si mulia siisikepken Dibata man anak-anakNa (ayat 18), ieteh perpulungen e kerna belinna kuasa Dibata erdahin ibas kalak si tek man baNa (ayt 19). Alu bage enda kerina jadi gegeh man banta guna ersaksi kerna Jesus e. Sebab labo banci kita ersaksi kerna IA adi labo sitandai ras siangka kerna Jesus e.

  1. Aplikasi

Kenangkihen Jesus ku surga e encidahken kuasaNa maka IA enggo keke. Kematen enggo italukenNa. Kenangkihen Jesus ku surga isaksiken ajar-ajarNa. Berita kenangkihenNa isaksiken ajar-ajar dingen tetap iberitaken man kerina kalak si tek seh paksa enda. Alu tujun gelah kerina kalak si tek tetap paguh erkiniteken ras jera ibas ngelakoken dosa. Gia la iidah alu matata Jesus enggo nangkih ku surga, arah kesaksin ajar-ajarNa selaku saksi nggeluh mahanca kita tek dingen tetap ateta ngerembakken dirita man Tuhan segedang geluhta.

Temata ibas wari enda, kam me jadi saksi.  Enda me tugas selaku kalak si erkiniteken si nggo itebus alu dareh Kristus. Ise kin saksi e? Adi genduari kita kerina lanai bo ngidah alu mata jasmanita kerna perbahanen si ibahan Tuhan Jesus, tapi mata kinitekenta ngidah dingen tek kerna berita kesaksin si isehken Rasul-rasul janah kita pe ikut ertanggung jawab jadi saksi. Matius 28:19-20 e pe pedah Tuhan Jesus gelah kita ncidahken ulih ersaksi e eme jadiken kalak jadi ajar-ajar Kristus (mperidiken ras ngajari) erbanca ia tek. Ersaksi labo terjeng nuriken alu kata-kata tapi arah perbahanen si mehuli ibas kegeluhenta.

Teptep kesempaten, ersaksilah! Jesus tetap nampati kita ibas ersaksi. Aminna pe IA enggo nangkih ku Surga, tapi tetap nge idahikenNa kai ateNa ibahanNa (invocatio), tetap iberekenNa kuasa i surga nari seh maka tetap kita ngasup ersaksi ibas geluhta.

 

= Selamat Mperingeti Wari Kenangkihen Tuhan Jesus Ku Surga #


Pdt. Melda P. Br. Surbakti, S.Th

(Rg. Simalingkar A)

___Klasis Menara_____

 

 

 

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba