PEKAN DOA WARI KE-V, 22 Mei 2021, Ertoto Guna Pentar (1 Raja-raja 3:1-9)

PEKAN DOA WARI KE-V, 22 Mei 2021, Ertoto Guna Pentar (1 Raja-raja 3:1-9)

Renungen       : 1 Raja-raja 3:1-9

Tema              : Ertoto Guna Pentar


  1. BENA KATA

Wari enda enggo ka kita seh ku bas pekan doanta wari pe-5 ken. Ija si jadi tema man banta eme kap “Ertoto Guna Pentar”. Selaku kalak Kristen adi kita ertoto, kai nge sipindo ibas totonta? Pernah nge kita mindo kepentaren guna bijaksana ibas ndalani kegeluhen? Entah hanya sekedar ertoto-ertoto saja gelah enggo. Ibas pekan doanta sendah iajuk kita gelah ibas ertoto kita mindo pemeteh ras kepentaren guna ndalanken sibujur bas kegeluhenta, gelah arah kegeluhenta tetap termulia gelar Tuhanta Yesus Kristus.

 

  1. ISI

Kata Dibata si jadi bahan pekan doanta ibas wari pe-V ken enda ibuat ibas kitab 1 raja-raja 3:1-9, ija ije iceritaken kerna sekalak tokoh eme kap Salomo. Tentu labo asing man banta gelar Salomo enda. Salomo eme sekalak raja banga Israel, ija ia me raja si peteluken bangsa Israel. Salomo eme anak Daud ras Betseba, janah Salomo me raja si pemenana erpalasken kesusuren.

Si jadi bahasenta eme kap 1 Raj. 3:1-9. Ibas ayat 1 ibahas ije tentang sekalak Salomo erbahan hubungen ras Raja Mesir alu cara ngempoi anak raja e. Tujun perjabun enda guna memperkuat persekutuan antara sada bangsa ras bangsa si deban. Banci ikataken guna kepentingen politik, gelah kerajaan tetap stabil. Ibas ay. 2 ikataken maka bas paksa si e rumah pertoton lenga denga ipajekken. Ay. 3 ikataken maka Salomo erkeleng ate man Tuhan janah kerina pedah bana Daud I ikutkenna. Ay. 4 ikataken maka Salomo lawes ku Gibeon guna nehken persembahen, lit buena piga-piga ratus persembahan tutungen (ibas alkitab bahasa Indonesia: seribu korban bakaran). Tentu enda jumlah si luar biasa kel. Enda nuduhken kehamaten ras keleng atena man Tuhan. La akapna rugi mereken persembahen si bagenda mbuena man Tuhan. Ibas ay.5, Tuhan encidahken diriNa man Salomo arah nipi. Ras ije ibereken Tuhan kesempaten man bana guna nehken pemindon, sura-sura entah pe arapen Salomo. Ay.6-9: ije Salomo nuriken pemindonna, labo kebayaken, kekuasaan si ipindo Salomo, tapi Salomo mindo kepentaren gelah ngasup ngerajai bangsa Israel alu kebujuren ras kebeluhen mbedaken si bujur ras si jahat. Arah kai si ipindoken Salomo banci sipahami maka situhuna Salomo enda kalak Pentar. Kalak pentar ngenca si erpengakap ia lenga pentar. Kalak pentar ngenca si erpengakap ia harus terus menerus erlajar gelah jadi kalak pentar. Pemindonna man Tuhan pe nuduhken maka Salomo eme pribadi si rendah hati, erpengakap maka labo ia ngasup mimpin bangsa Israel. Emaka kerinduanna uga gelah ia jadi raja si pentar guna kiniulin bangsana. Pemindonna enda guna kepentingen bangsa labo guna kepentingenna secara pribadi. La ia egois. Erkiteken sikapna si la egois enda maka isehken Dibata kai si ipindona, bahkan lebih asa si ipindona ibereken Tuhan. Labo hanya kepentaren saja si ibereken Tuhan tapi pe lit tambahenna eme kebayaken ras kemulian.

Kepentaren la seri ras ilmu pengetahuan entah pe pemeteh. Kepentaren la seri ras buena data sieteh kita. Tapi kepentaren e ertina ngasup entah pe beluh makeken ilmu entah pe pemeteh si lit e guna bertindak tepat. Seni hidup baik dan tepat eme kepentaren. Janah kepentaren si sejati rehna ibas Dibata nari. Adi ateta pentar kuncina erkemalangen man Tuhan. Salomo berhasil mutusken sada perkara si mesera eme kasus perebuten sekalak anak. Lit 2 kalak diberu si pendahinna erlua-lua mperebutken sekalak anak, duana ngaku bahwa ia me nandi sis ah. Guna meteh ise nande si tuhu-tuhu, ibuat Salomo pedang gelah anak e ibelah duaken. Dungna terteh ise kin nande situhu-tuhu. Nande si tuhu-tuhu la nggit anakna mate ibunuh, madin ibereken man diberu ndai asangken anak e ibelah duaken.

Ibas geluh enda melala persoalen, subuk ibas jabu, ntah ibas perpulungen bagepe I tengah-tengah masyarakatta. Kepentaren e seh kel perluna, gelah beluh kita mutusken sada hal, gelah ula salah langkah. Bicara bayak pe kita tapi adi la pentar lalit gunana. Gedang pe umurta tapi adi la pentar sia-sia nge geluhta. Alu bage kepentaren e shekel perluna ibas kegeluhenta.

 

  • PENGKENAINA

Arah tema pekan doanta enda, mari ibas totonta sipindo kepentaren gelah beluh kita mutusken sada perkara, gelah sieteh mbedaken apai si benar apai si salah, gelah ngasup bertindak tepat. Umpamana selaku orangtua perlu kel pentar mendidik anak, gelah anakta pe karakterna mehuli, bijaksana. Orangtua pe mereken contoh si mehuli man anak, baik ibas kiniteken, nehken keleng ate, ukur si bujur, pengerana ras perbahanen. Ajarken kata Dibata, sebab ilmu tanpa iman adalah kesombongan. Ilmu tanpa karakter adalah kebodohan. Babai anakta gelah pentar, ula terjeng fokus ku bas sekolahna, tapi pe fokus ku bas spiritualitasna, emosionalna, karakterna. Gelah kuja pe ia lawes ngasup ia ngalaken kai pe si jadi. Jadi, mamre pe harus pentar, moria pe harus pentar, anak pe harus pentar, pentar jadi perbulangen, pentar jadi ndehara. Uga gelah jabu jadi jabu harmonis, nyaman siakap tading bas rumah e. SELAMAT ERTOTO, SELAMAT JADI KALAK PENTAR.


Pdt. Imamat Tarigan, S.Th

(Ketua Klasis Menara)

___Klasis Menara____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba