Pekan Doa Berngi IV, Tetap Ersembah Ras Sikelengen (Perb. Rasul 2:43-47)

Pekan Doa Berngi IV, Tetap Ersembah Ras Sikelengen (Perb. Rasul 2:43-47)

Invocatio          : Ibahan Nuah sada batar batar ingan persembahen man Tuhan, ibuatna sada ibas tep tep erbage rubia rubia si la pantangen rikutken aturen agama. Kenca bage itutungna bulat bulat i datas batar batar ndai, jadi persembahen. (Kejadian 8:20).

Khotbah           : Perb. Rasul 2:43-47

Tema               : Tetap Ersembah Ras Sikelengen



Pekan doa wari si pe 4 ken enda persingeti kita gelah tutus ersembah man Tuhan sebagai bentuk kehamatenta man Dibata si ermulia. Adi ikataken ersembah ertina menyataken rasa hormat ras kemuliaan si meganjangna man junjungenta si ianggap erkuasa ibas kegeluhenta. Alu kata si deban ibas kita ersembah ertina menghadirken Tuhan ibas hubungen si mehuli ras Ia.

Ibas Perb. Rasul 2:43-47 nuriken kerna kegeluhen kalak si enggo tek man Tuhan ibas pendahin Kesah Sibadia (Ind. Cara hidup jemaat mula mula = TB). Terbentukna kiniersadan ibas kalak si enggo tek erkiteken nusurna Kesah Sibadia bagepe kesaksin rasul rasul kerna Yesus juru selamat doni enda. Persadan kalak si enggo tek enda me bena bena terbentuk gereja si pemena alu mereken dirina i peridiken teremna lit 3000 kalak. Turahna kiniteken ibas kegeluhen kalak si enggo tek man Kristus mabai erbage kiniulin ibas persadanna bage pe jadi kesaksin man kalak si deban i sekelewetna erkiteken perbahanen Kesah Sibadia bagi si enggo i padanken Yesus man ajar ajarNa (Bnd.Yoh 14:6). Pendahin Kesah Sibadia e teridah arah tanda tanda sengget si ibahan rasul rasul ras melala denga ke ajaiben si ibahanna erbahansa kalak si enterem (Masyarakat luas secara umum) subuk si lenga tek bage pe si enggo tek jadi kagum ras terkesan ngidahsa. Erkiteken si e enterem kalak si ngidah perbahanen rasul rasul e berubah jadi tek ras erkemalangen man Dibata. Kerina kalak si enggo tek emekap ajar ajar Yesus ras kalak si mbaru denga nggeluh ibas pertobaten tetap setia ras njagai pengajaren rasul rasul janah ngelakokensa bagi si enggo iajarken rasul rasul man bana. Pengajaren rasul rasul si enggo ialokenna ndai icidahkenna ibas kiniersadanna guna menciptakan sebuah pola kehidupan bersama secara komunal alu tetap njagai kwalitas kesucian ras solidaritas kerohanian si erujud ibas sikap tenggang rasa sikap kepedulian si cukup mehuli. Kiniersadan antara kalak si enggo nandai Kristus ras si mbaru denga nandai Kristus tetap i bangun ibas hubungen si mehuli erpalasken pengajaren rasul rasul ras pendahin Kesah Sibadia. Si enda kerina teridah ibas nggeluh si sampat sampaten, si keleng kelengen, mediate ras erdiate enggo jadi gaya hidup si harus i pertahanken khususna ibas encukupken keperluan kalak si deban ibas hubungen keteriketen entah pe emosional ibas kiniersadan e. Tep tep kalak si enggo tek lit rusur si ndayaken erta ertana janah duit ulihna i bereken man kalak si deban subuk si mesera baban geluhna entah pe si erkekurangen, man bana ibereken rikutken keperlunna sekalak sekalak sebagai tanda kekelengen si enggo turah ibas perukuren ras kinitekenna. Tambah si e kerina kalak si enggo tek ndai tetap tutus ersembah man Dibata alu ersada ukur pulung ibas Rumah Pertoton guna ertoto ras megiken dingen ngaloken pengajaren Kata Dibata sebab isadarina  labo ia ngasup nggeluhken kegeluhenna adi tetap nandeken dirina kubas persadan e sendiri. Secara teratur ia reh ndahi Rumah Pertoton selain ersembah  kegeluhen peribadaten pe semakin berkembang terus seh kubas rumah rumah perpulungen secara bergilir janahna man radu ras bage pe saling melayani alu ukur si meriah sada ras si debanna dingen tetap menjaga kehidupan saling menopang dan saling mendukung si erbahansa kegeluhenna reh warina reh buena keriahen nggeluh ibas erkiniteken ras erpengarapen man Dibata. Ulih kiniersadan si enggo ibangun ibas kiniteken enda peturah kekelengen singgeluh ibas pertendinna.janah si enda kerina jadi kesaksin kerna Kristus.  Secara universal  man kalak si tading idarat Palestina eme masyarakat kafir si lenga tek man Kristus ngidah kerina kai si enggo jadi e secara spontan berubah perukurenna jadi kalak si tek man Kristus dingen muji kiniersadan ras kiniteken si nggeluh ibas kalak si enggo i pelimbarui kegeluhenna. Kerina kalak si lit i Yerusalem pe la ketadingen ermeriah ukur ras erngena ate man kalak si enggo tek man Kristus janahna muji gelar Dibata. Tep tep wari kerina jelma si naksiken perbahanen kalak si tek e nandingken kegeluhenna sindekah guna ersada ibas sada kiniteken ras kerina kalak si enggo tek man Kristus janah Dibata pe tetap erdahin emaka tep tep wari itambahiNa beligan kalak si erkiniteken man baNa.

Arah bahan renungenta enda ngingetken kita sebagai kalak Kristen si tek man Yesus Kristus gelah tetap encidahken kegeluhen si ersembah man baNa. Penembahenta man Dibata teridah min ibas sikap geluh sitep tep wari. Salah sada bukti si perlu ibahan ibas geluh erkiniteken man Dibata emekap alu litna karakter iman si memotivasi kita secara pribadi bage pe komunal guna tetap ersaksi kerna Kristus arah encidahken keperdulianta nampati keperlun kalak sideban subuk sada kiniteken bage pe antar lintas iman. Gelah ia pe banci ngidah kehadiren Kristus ibas kepedulianta man bana. Kegeluhen kalak si ersembah man Dibata ngasup nggeluh sitatang tatangen subuk ibas keluarga, teman sada perpulungen, sada kesain sada lingkungen bage pe mediate man temanta si kurang tutus ersembah man Dibata. Kata Dibata si enggo i pelajari alu mehuli tetap min ijaga gelah jadi palas perukurenta guna nehken tanda lias ras keleng ate Dibata. Siban min kegeluhen si ersembah man Dibata jadi gaya hidup kalak si tek, si sadari min maka kita lemah iadep adepen Tuhan emaka la kita ngasup nggeluh adi la kin erkiteken perbahanen Tuhan. Ola min siakap kita si beluhna si la banci langna ibas kai pe tempa kalak si deban la erpepah dungna la iergaken. Adi bage si terjadi ibas kita maka lalit oratna kita ngerana kerna Kata Dibata. Tapi kalak si tutus ibas ersembah mabai bana ka ia mediate man kalak si deban janah ngergaken kalak si deban alu sikap keperdulian si tuhu rehna ibas kiniteken si payo. Adi bage maka lalit saling merendahken saling menjatuhken tapi si ergan sada ras si debanna sebagai bukti belinna keleng ateta man tenmanta bagi keleng ate Kristus man perpulungenNa. Nuah pe encidahken kinitekenna arah ersembah alu maba persembahen tutungen guna mpermuliaken Dibata ibas geluhna erkiteken Dibata enggo nampati ia ras isi jabuna. Kegeluhen kalak si mediate ras erdiate pe banci jadi sada persembahen si nggeluh ibas dirinta ras ibas kiniersadanta sebagai anak Dibata si tetap maba terang ras perdamen.


Pdt. Timotius Sembiring, S.Th

___Klasis Menara____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba