Pekan Doa Wari 6,  Jumat 21 Mei 2021,Ulih Pertoton (Jakup 5 : 13- 18)

Invocatio      : Nina ibas perototonNa,”O BapangKu, o BapangKu! La kap lit si metahat ibas Kam. Agui min calung kiniseran enda ibas Aku nari. Tapi labo peratenKu,   peratenNdulah jadi.    ( Markus 14:36)

Renungan      : Jakup 5 : 13- 18

Tema              : Ulih Pertoton

Kata Perlebe

Sada hal si la pernah terelakken kita ibas geluh enda eme litna persoalen si man alanken. Subuk ibas paksa kita ermeriah ukur, ije pe banci ka nge turah soal. Emaka nina kuan-kuan karo: “seh sura-sura, turah sinanggel”. Apai ka di kune jumpa aru ate, pelin-pelin kel si pagitna man alanken. Erbage-bage cara manusia gelah banci pulah ia ibas persoalenna, sebab manusia bebas nge ngelakoken kai atena si ibahanna. Saja selaku kalak kristen perlu metenget, sebab lit nge sukat-sukat si arus man lakonken. Banci saja adi salah kita darami serpang pulah, labo jalan keluar si idat kita tapi tambah persoalen si mbaru. Bagi lit kuan-kuan karo: bagi mulahi gelang perdit…dosa iosari gelang e reh keskesna ia. Emaka selaku kalak kristen, ndarami serpang pula perbeben geluh erpalasken kiniteken man Tuhan Yesus eme arah ertoto, sebab toto e kompas, penuduh dalan uga ngalakenca sue bagi sinisuraken Tuhan.

Uraian Teks

Bage me ibas wari peenemken enda, Rasul Jakup mereken serpang pulah arah kata Dibata man banta di kune lit jumpa  persoalen ibas kegeluhennta enda. Kata enda ipeseh Rasul Jakup man kerina kalak kristen si paksa e merap marpar i taneh perlajangen. Lit 3 batang belinna sura-sura Jakup, eme:

1. Mereken semanget man kalak si erkiniteken ibas ngalaken persoalen si paksana nguji kiniteken.
2. Mpehuli pengangkan si lepak nandangi kiniteken si nelamatken
3. Ngingetken nandangi kerina kalak si ngoge surat enda, eme nandangi ulih perbahanen si mehuli.

Penekanen si cukup mbelin ajaken Jakup ibas ngalaken persoalen eme alu erpengendes man Dibata arah pertoton, baik pertoton secara pribadi kerna dirinta bage pe kesetiannta ertoto nandangi teman-teman sideban.

Lit piga-piga anjuren siiisehken Jakup eme :

1. Ku Dibata saja erpengendes.

Ibas kita ngenanami kiniseran, lalit sideban ingan pengendesenta, tapi nandangi Dibata saja alu pertoton, enda me sipayona siarus si lakoken, sebab IA ngenca meteh kerina perdalinen kegeluhennta. Adi situriken man kalak si deban, banci saja jalan keluar siiberekenna erbahanca erdauhna kita papak, amin pe secara pengangkanta payo nge siikataken temannta e. Jenari adi enggo jumpa kita serpang pulah ibas kiniseranta e, tetap kita ngataken bujur man Tuhan arah ende-endenta.

2. Peran Pertua-Pertua

Pertua-pertua siiangkat Dibata ibas perpulungen ertanggungjawab nandangi ‘keberadaan’ perpulungen e, subuk ibas paksa senang entah pe susah. Jakup nuruh  perpulungen, gelah adi lit si sakit gelah ndilo Pertua-Pertua guna ertoto. Ertina kehadiren sekalak sierdahin (kemahen Tuhan) ibas paksa litna kesusahen anggota perpulungen cukup iperluken. Amin gia pinakit secara kula (jasmani) langa gia malem, tapi kerehen s erdahin e mereken kemalemen ate secara perukuren.

3. Pertoton e ergegeh kal

Jakup ningetken uga pengalamen Nabi Elia pernah ertoto alu tutus paksa kelegon si mesangat i Israel. Ulih pertoton Elia, reh udan seh maka taneh si kerah banci mulihi mereken ulihna man manusia. Bage me ikataken maka pertoton kalak tutus ergegeh kal. Janah kerina enda jadi erkiteken sura-sura Dibata.

Bagepe Yesus ibas pertotonNa, puncak kiniseran, kebiarenna ngalaken kematen. iantusiNa kal kai si lit iadepenNa, siman bentasenNa, tapi secara manusia ibas kebiarenNa e ertoto IA mindo adi banci la ibentasiNa kiniseran e, sebab ietehNa kal labo lit simetahat ibas Dibata, ietehNa kal si jadi e kerina pelin-pelin kuasa ras otoritas Dibata lalit sijadi tanpa ijinNa. Ibas pengangkanNa si bage rupa, ibelaskenNa pengendesen diriNa labo peratenku tapi peratenNdulah. Jelas ije Yesus tetap ngelebeken sura-sura Dibata ibas rancangenNa si mbelin.

Pengkenaina / Aplikasi

Sue ras temanta bas pekan doa enda eme ulih pertoton, mpersingeti kita maka ulih pertoton e la saja seh pemindonta, arapenta tapi pe mengubah sura-sura ras sudut (cara) pandangta nandangi sura-suranta dingen sura-sura Dibata. Reh belinna kengasupenta ngangkai kegeluhen enda, reh buena dampar si banci sidat sijadi ulih ibas rusurna kita ertoto. Tapi la sitik kita si tutus ertoto alu sada ulih si enggo sitetapken, sipastiken ras siarapken. Emaka reh rusurna kita ertoto arusna teh buena siidah cara Dibata ngaturken kegeluhen; reh belinna siidah kuasa Dibata ibas mereken jabapen; reh gegehna kita ndalani kegeluhen, janah la sempit cara rukurta alu ngaturken ulih pertotonta.

Alu bage arah pekan doanta sipeenamken enda iarapken man banta eme:

1. Ibas kita ertoto labo dirinta saja, tetapi pe kerina kalak si ersangkut paut ras kita, bage pe ula lupa ertoto ngataken bujur man Tuhan, rende muji Tuhan ija enggo simpar sialoken pemereNa banta.

2. Kita arus tetap ertoto (ngataken bujur, nehken pemindon, nuriken ukur, ercakap-cakap ras Dibata) sebab eme tanda kegeluhen kalak si tek, nggeluh selaku keluarga Dibata, tetap erkomunikasi, gelah reh deherna kita ras reh belinna penandaita kerna IA.

3. Ketutusenta ate ibas ertoto ras saber nimai perkuah ate Tuhan sie nuduhken kiniteken si mbages nandangi kuasa Tuhan si ngasup mereken kerina kebutuhennta / ulih pertotonta.

(by: Pdt. Christmas P. Gtg, M. Th, MH)