Pekan Doa Berngi 7, 22 Mei 2021, Ertoto La Erngadi-ngadi (Perbahanen Rasul-Rasul 10:1-4)

Pekan Doa Berngi 7, 22 Mei 2021, Ertoto La Erngadi-ngadi (Perbahanen Rasul-Rasul 10:1-4)

Invocatio     :“Meriahlah atendu ibas kam erpengarapen, megenggenglah kam ibas kiniseranndu, janah ertotolah kam man Dibata la erngadi-ngadi” (Rm. 12:12).

Ogen           : Perbahanen Rasul-Rasul 10:1-4

Tema           : Ertoto La Erngadi-ngadi


Lit sepasang orangtua si enggo lanjut usia, ia tading dua-dua nari i kutana sedang anak-anakna enggo merantau kerina, dingen pe enggo erjabun. Emaka teptep warina la pernah ia lupa notoken anak-anak ras kempu-kempuna, sebab isedarina maka labo lit gegehna lako njagai anak ras kempuna e adi la kin Tuhan Dibata si njagaisa alu keleng ateNa. Pernah kah kesaksin si bage ibegindu? Bas palas renungennta sekali enda pe, ituriken kerna sekalak jelma si tutus dingen la erngadi-ngadi ertoto. Ise e? gelarna emekap Kornelius.

Kornelius eme sekalak tentera Romawi sinigelari “Pasukan Itali” si tutus nembah man Dibata rikut ras seisi jabuna (ay.2). Selaku kalak Junani, si pada umumna menganut kepercayaan terhadap dewa-dewa (Polytheisme), Kornelius enda berbeda, ia la ersembah ku dewa-dewa melainken nembah man Dibata. Janah la terjeng e saja, tapi ilakokenna ka pe aturen bas agama Jahudi emekap nampati kalak Jahudi si musil janah ertoto la erngadi-ngadi. Ertoto la erngadi-ngadi ertina, adi rikutken agama kalak Jahudi  ertoto ilakoken setiap 3 jam sekali, eme jam 12, jam 3, jam 6, jam 9.  Bageme kira-kira bentuk ketutusen Kornelius enda bas ertoto man Dibata.

Bas sada paksa, tupung ia ertoto iidahna malekat Tuhan ngerana man bana arah sada pengenehenen. Nina malekat Tuhan e, maka pertotonna enggo ibegi Tuhan, jenari nggo inget Tuhan ia. Kai kin ndia isi pertoton Kornelius enda? La ituriken ijenda alu tangkas. Adi si oge seterusna maka arah perjumpan e ndai isuruh malekat Tuhan me si Kornelius nuruh juak-juakna guna ngelegi Simon Petrus, sekalak ajar-ajar Tuhan Jesus. Jenari, kenca jumpa  ia ras Petrus,  pulung ia ras seisi jabuna guna ngaloken pengajaren ibas Petrus nari gelahna reh tangkasna penandaina kerna Dibata. Alu kata sideban, teridah ije maka Kornelius enda metedeh kal atena guna nandai Tuhan terbagesen, emakana iutus Tuhan me Petrus ku tengah-tengah jabuna, seh maka Kornelius ras seisi jabuna ngaloken keselamaten. Enda me kemungkinen si jadi pertoton Kornelius kidekah e, si la erngadi-ngadi itotokenna emakana bas sada paksa ijabap Tuhan me toto e,  alu kehadiren malekat si ngataken maka “pertotonna enggo ibegi Tuhan. Kai dage makna renungen Pekan Doa berngi si terakhir enda?

Arah palas renungennta enda teridah ketutusen Kornelius bas ertoto ras ngelakoken perbahanen si mehuli seh maka ijabap Dibata pertotonna. Ertina kalak si tutus ertoto, iperdiateken Dibata kap, labo ngehenen ise jelmana, kalak Jahudi ia ntah lang, sebab  ketutusenna eme si ngena ate Dibata. Emakana atan me Kornelius guna ndatken pengenehenen, si merupaken cara Dibata erkomunikasi ras ia. Jenari, ketedehen ate Kornelius guna nandai Kristus erbahan ia ras seisi jabuna atan pe ndatken kesempaten guna ngaloken keselamaten si tuhu-tuhu ibas Dibata nari arah perjumpanna ras Petrus. Kepeken enggo pe tutus Kornelius e  ertoto, ras pe tutus ngelakoken perbahanen si mehuli lenga bo cukup iakap Dibata perban lenga itandaina terbagesen Kristus, Anak Dibata si iutus ku doni enda guna maba keselamaten. Seh maka perlu iakap Dibata ia ras seisi jabuna ndatken pengajaren kerna Kristus ibas Petrus nari. Sebab kalak si nggo tek man Kristus ngenca si ngaloken keselamaten si tuhu-tuhu, inget nina Tuhan Jesus “Aku kap dalan nandai Dibata, dingen ndatken kegeluhen” (Joh.14:6).

Dage, mari si usihlah ketutusen Kornelius bas ertoto ras ngelakoken perbahanen si mehuli, gelahna kita pe ras seisi jabunta atan ngaloken kesempaten bagi si ialoken Kornelius ndai, idatkenna keselamaten si tuhu-tuhu. Tema-ta eme Ertoto la erngadi-ngadi, enda jadi pengajuk man banta, terlebih-lebih ibas paksa-paksa pandemi Covid-19 si seh paksa enda langa erkedungen. Tapi amin bage gia tetaplah tutus ertoto dingen erpengarapen man Tuhan.   nina i bas Invocatio “Meriahlah atendu i bas kam erpengarapen, megenggenglah kam i bas kiniseranndu, janah ertotolah kam man Dibata la erngadi-ngadi” (Rm. 12:12). Amin gia Pekan Doa tahun 2021 enda sendah enggo berakhir, janah bas wari Minggu itutup alu Lakon Persadan Si Badia, tapi labo berarti maka ngadi ka kita ertoto, melainken arusna terus silakoken e ras seisi jabunta, berupa kebaktin PJJ, kebaktin keluarga, kebaktin Minggu, rsd. Segelahna reh paguhna kinitekennta, dingen reh ngasupna kita ngalaken erbage-bage perbeben geluh. Amin


Pdt. Elisabeth Br Ginting, M.Th

(GBKP Gd. Johor)

___Klasis Menara____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba