Minggu14 Maret 2021 (Passion 5/ Letare=Teridahlah), Icidahken Dibata Lias AteNa (Epesus 2 : 1 – 10)

Minggu14 Maret 2021 (Passion 5/ Letare=Teridahlah), Icidahken Dibata Lias AteNa (Epesus 2 : 1 – 10)

Invocatio        : Padan si Kubahan tuhu, janah la mobah-obah; ibas gelarKu jine Aku ersumpah.    Kerina manusia, i lebengku pagi erjimpuh, janah ersumpah maka ras lalap tutus atena nembah (Jesaya 45 : 23).

Ogen               : Bilangen 21 : 4 – 9

Khotbah          : Epesus 2 : 1 – 10

Thema             : Icidahken Dibata Lias AteNa


Minggu Passion sipelimaken enda igelari Minggu Letare, ertina teridahlah ija arah Minggu enda kita ibabai tole guna nginget ras ngidah uga Tuhanta Jesus Kristus enggo ngenanami kiniseran gia erbahan si mehuli erkiteken ngelawan si jahat lako mbela manusia gelah tuhu-tuhu geluhna meherga sekaligus ngajari ras mabai manusia kubas geluh si mehuli sentudu ras peraten Dibata. Puncana kiniseran Tuhan Jesus e eme ibas IA ipakuken i kayu persilang. Tapi e kepe dalan Dibata gelahna ise saja si alu kinitekenna natap ku kayu persilang Kristus e janah tek maka kematen Tuhan Jesus e erkuasa nebusi ia ibas dosa-dosana nari, ibebasken-iselamatken ibas kuasa kematen nari.

Enda bali ras sijadi man bangsa Israel ibas ogenta Bilangen 21:4-9 ija paksa e kalak enda sangana ibas perdalanen nuju Teluk Akaba (letakna i laut Merah. Arah timurna eme Semenanjung Sinai janah sebelah baratna eme Semenanjung Arab. Bangsa Mesir, Israel, Yordania ras Arab Saudi memiliki pantai i teluk enda. Igelari Teluk Akaba erkiteken isandarken ku pantai utara kota Aqabah. Sedangken ibas cakap Ibrani igelari Teluk Eliat erkiteken isandarken i kota Eliat si ersebelahen ras kota Aqabah i Yordania). Tapi erkiteken ibas perdalanenna e lanai ia sabar subuk erkiteken enggo ndekahsa iakapna maka seh ku taneh siipadanken Dibata e bagepe erkiteken enggo latih iakapna ngalur-ngalur gurun pasir rikut suasana si la bagi ukurna itambah kurangna lalap iakapna pangan inemenna, mahanca bas ia lanai sabar e piah jungut-jungut bangsa enda rikut pengeranana pe enggo nimbak Dibata ras Musa (ay. 4-5). Biasa pe jelma adi enggo bene kesabarenna, turah me jungut-jungutna, luam rikut cengamen-ngeranai me ia rikut pandangen iakapna kai pe. Emaka kalak sibage biasana lanai bo erpepah pengeranana. Erkiteken sikap ras pengerana bangsa Israel e si la payo e, isuruh Tuhan nipe tedung si erbisa ras mengeriken sindemi ingan-ingan si mbelang i gurun pasir reh ku tengah-tengah bangsa enda naguti bangsa e mahanca enterem si mate (ay. 6) si alu enda mpebetehken pe maka Tuhan e erkuasa nangdangi sinasana sabab e bekas tinepaNa janah kai pe banci ipakeNa jadi alatNa ncidahken kuasaNa. Ukumen siisehken Dibata enda ngingetken kita pe gelahna ntah la kal gia bagi ukurta kerna sada-sada hal ntah kejadin, sijagalah sikap ras pengerananta sabab lampas lawenna nge la ieteh, tapi bas sikap ras pengerananta si la mehuli e ugapa pe lit nge ulihna si la mehuli.

Kenca isadari bangsa enda maka kerina sijadi man bana e erkiteken ia enggo erdosa man Tuhan, emaka iakukenna dosana ibas enggo nimbak Tuhan e jenari mindo man Musa gelahna Musa ertoto man Tuhan gelahna ipedauhNa nipe e ibas ia nari. Jawaben Tuhan nangdangi pertoton Musa eme Tuhan nuruh Musa erbahan nipe (Ibrani “nehash”) ibas tembaga (Ibrani “nehoshet”) nari jenari namakenca i das sada galah gelah posisina ganjangen asa sidebanna gelah ise si enggo itagut nipe e banci ipernehenna nipe tembaga e maka malem ia. Kata “nehash” ras “nehoshet” bas cakap Ibrani memiliki hubungen si erat emaka nipe e labo ibahan ibas jenis benda sidebanna umpama besi, kawat, rsd. Janah payo me maka ise saja si ngenen ku nipe tembaga e malem me ia (ay. 8-9). Labo nipe tembaga siipeganjang alu namakenca i das galah e sierbahanca ia malem tapi ketetapen ukur ras kinitekenna ngikutken perentah Tuhan siisehkenNa arah Musa lako natap kempak nipe tembaga e. Malem ia ibas bisa nipe simaba kematen e labo erkiteken kai siibahanna tapi erkiteken kai siibahan Dibata man bana. Em igelari lias ate Dibata siicidahken ras isehkenNa man kalak si tek man baNa. Tuhan mereken serpang pulah man kalak si reh mindo penampat man baNa ras ngikutken kai si isuruhNa.

Bagem pe ibas nats khotbah Epesus 2:1-10 ipetangkas kerna lias ate Dibata siisehkenNa man tep-tep kalak si erkiniteken man baNa. Rasul Paulus nuriken maka ibas paksa si lewat, perpulungen e (Kristen si la Jahudi termasuk si Jahudi pe) ngikutken kebiasaan doni si jahat eme ngikutken pemimpin penguasa-penguasa si lit i awang-awang (ija paksa e kosmos eme doni secara keseluruhen ruang hidup, ipahami lit ibas piga-piga lapisen. Lapisen udara ntah angkasa iiani ras ikuasai roh-roh jahat si mempunyai pengaruh buruk man manusia). Roh-roh jahat e la erngadi-ngadi nuanken pengaruh ras kuasana man manusia si lit i lapisen iteruhna gelah manusia e ngikutken ia. Salah sada bentukna eme alu nembah man dewa-dewa Yunani, umpama dewi Artemis siipahami sebage Dewi Kesuburen. Bagepe ngelakoken penembahen ras tunduk man Kaisar siianggap sebage jelmaan ntah sinursur dewa. Erkiteken sie, patut kal kalak e ngenanami pernembeh ate Dibata alu alasen, Pemena : Erkiteken kalak enda ngikuti kebiasaan doni si jahat eme nggeluh bagi sura-sura ukur ras kulana/dagingna (Yunani “thelema tes sarkos” eme sura-sura tanpa norma, dorongen nafsu siilakokenna alu sadar menurut ukurna si jahat) saja mahanca cara geluhna petembil ras sura-sura Dibata; Peduaken : Erkiteken matuhi-ngikutken penguasa si lit i awang-awang eme kuasa roh-roh jahat, eme kesah si gundari erdahin ibas kalak si la nggit erkemalangen man Dibata. Alu bage kalak enda enggo jadi imbang Dibata.

Tapi perkuah ate Dibata si la ersibar bagepe erkiteken mbelin kal keleng ateNa man banta (ibas bahasa aslina nina, “Kasih yang dengannya IA mengasihi kita” (Yunani “agapen hen egapesan hemas”) mahanca IA bertindak nelamatken kita ibas kematen nari sabab la ateNa manusia e bene (binasa) ibas dosana eme arah kematen ras kekeken Kristus. Ibas persadanta ras Kristus, ija alu kematenNa Kristus enggo mengketi kematenta erkiteken dosanta e, kita ipekeke Dibata ibas si mate nari radu ras Kristus jenari bagi Kristus kundul ibas ingan si meganjang, kita pe atan ibas sie. Enda kerina labo erkiteken ulih kai siibahan kita ntah erkiteken pendahinta tapi pemere (Yunani “kharis” = kasih karunia, anugerah) Dibata segelah arah sie kita kerina ijadikenNa lako ndahiken dahin-dahin si mehuli sabab geluhta gundari ngikuti sura-sura Dibata janah kepatuhenta gundari eme kepatuhen ngikutken Dibata.

Pendahin Dibata guna nelamatken e bagepe ibas ijadikenNa kita ndahiken dahin-dahin si mehuli si enggo leben irencanakenNa e gelahna kai sienggo ipadankenNa bagi isenaken ibas invocatio Jesaya 45:23 eme gelahna kerina manusia pepagi erjimpuh i lebe-lebeNa dingen rasa lalap tutus atena nembah man baNa tersehi. Emaka kita sienggo ngaloken lias ate Dibata e rutang nuriken ras nehken lias ate Dibata e man kalak si deban.


Pdt. Eben Eser Depari, M.Th

(GBKP Rg. Sp. Selayang)

___Klasis Menara____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba