Minggu, 07 Maret 2021 (Minggu Okuli), Keleng Ate Man Dibata (Keluaren 20 : 1 – 11)

Minggu, 07 Maret 2021 (Minggu Okuli), Keleng Ate Man Dibata (Keluaren 20 : 1 – 11)

Invocatio :    “Kutatap ku deleng-deleng, i ja nari kin reh penampatku ? Penampat man bangku reh i bas TUHAN nari, si enggo njadiken langit ras doni” (Masmur 121 : 1 – 2)

Ogen        :    Matius 22 : 37 – 40

Khotbah   :    Keluaren 20 : 1 – 11

Tema        :    Keleng Ate Man Dibata


Minggu enda igelari Minggu Okuli ertina mataku tetap nare ku Jahwe si ngingetken ras mabai kita gelahna sebage kalak si erkiniteken man Tuhan Dibata, ibas kerina kecibal geluhta tetap kita nare, natap ku IA sebage sada-sadana inganta ngarapken penmapat. Alu bage sekali kai gia jadi ibas kegeluhenta, tetap kita ngasup erpengarapen ras erpengendes ku Dibata saja. Maka enda banci silakoken, palasna eme penandainta kerna ise kin Tuhan Dibata e. Ise kin Dibata e maka matanta tetap nare, natap ku IA ?

Invocatio Masmur 121 : 1 – 2 alu tangkas nuriken maka Tuhan Dibata eme penampatta (Ibrani “Ezer”) sabab IA kap si enggo njadiken langit ras doni. IA kap sinjadiken (Ibrani “Bara” eme njadiken ibas si la lit nari jadi lit ncidahken uga erkuasana IA seh maka doni, langit rikut kerina isina si ndube lenga lit, ibahanNa jadi lit ras mehuli). Janah IA la terjeng ngelitken sinasana, tapi pe IA erkuasa nangdangi kerina si enggo ijadikenNa e. Emaka erpalasken Keluaren 20 : 2, IA erkuasa mbebasken kita ibas kerina si ngiket, sindehken ras sinuhsahi kita.

Janah ibas konteks Keluaren 20 : 1 – 11 pembebasen eme si enggo ilakoken ras sehken Dibata man bangsa Israel alu mbebasken bangsa e ibas perbudaken Mesir nari jenari mabasa nuju taneh Kanaan si enggo ipadankenNa iberekenNa man sinursur Abraham enda. Adi karya pembebasen Dibata e ihubungken ku kita paksa enda, eme si enggo ilakoken Jesus Kristus arah kiniseran ras kematenNa siingetken man banta ibas Minggu-minggu Passion enda lako mbebasken kita ibas kuasa dosa nari gelahna iperembakkenNa ras Dibata jenari gundari sidalani kegeluhenta nuju negeri sienggo isikapkenNa man banta eme Kinirajan Surga. Janah seh paksa enda pe, bagi itaruhkenNa perdalanen bangsa Israel nuju taneh Kanaan e alu ngkawali ras ncukupken kerina keperlun geluhna bagi konteks Keluaren 20 : 1 – 11, bageme pe geluhta paksa enda tetap ikawali ras ipasu-pasuNa alu nemani, ngkawali ras ncukupken keperlun geluhta. Erkiteken sie me maka bagi isenaken ibas ogenta Matius 22 : 37 – 40 bagepe Keluaren 20 : 1 – 11 enda, arus keleng ateta man Dibata.

Bagi isenaken ibas ogen bagepe bahan kotbah, keleng ate man Dibata e isehken ras icidahken alu :

  1. La mpedua-duaken (tidak menduakan) Tuhan (Keluaren 20 : 3 – 6).

Bagi kalak Israel iingetken gelahna tetap setia nembah man Dibata saja, ula kal mpeduaken Tuhan siisembahna alu erbahan dibata-dibata sideban subuk gana-gana ntah gambaren-gambaren kerna kai pe si lit i datas langit, i doni ntah pe si ibas lau iteruh doni sabab IA percimberu, singukum kalak si erbahan kiduaNa. Kita pe paksa enda iingetken gelahna setia nembah man baNa saja alu la erbahan ingan condong, ingan erpengarapen sideban subuk ku erta, jabaten, rsd.

  1. Bijak makeken gelar Tuhan Dibata (Keluaren 20 : 7).

Gelar Tuhan e banci nge igelari tapi labo asal-asal igelari mahanca sia-sia. Terlebih gelar Tuhan e imanipulasi sebage alat guna membenarken hal-hal si ibelasken ntah ilakoken, umpama guna meyakinken kalak kerna kai siibelasken, ersumpah ibas gelar Tuhan. Gundari enda gampang kal kalak melasken OMG = Oh My God tempa-tempa gelar Tuhan e enggo main-mainen. Bagepe hati-hati kal make simbol-simbol keagamaan, segelah ula erkiteken ipake simbol-simbol keagamaan e, tercurna Tuhan ibahan. Contoh, ibas njadiken salib sebage kalung. Hakekatna makeken salib e sebage kalung guna kai ? Lako ncidahken identitas sebage kalak Kristen ntah gelah lit mainen kalung siipake e ?  Adi lako nuduhken identitas sebage kalak Kristen, me enggo me terjaga kita tuhu-tuhu identitas, jatidirinta e ibas perukuren, pengerana ras perbahanen sebage kalak Kristen e ? Ija Kristen ertina orang yang hidupnya seperti Kristus.

Sedangken adi salib e terjeng gelah lit mainen kalung siipake, berarti sepele kal man kalak e erti salib e. Padahal salib e simbol kekristenen. Contoh : Ieteh kalak sada rumah e gereja ingan kalak Kristen pulung erkebaktin, nembah Tuhan Dibatana hanya erkiteken lit ije salib.

3.  Nikapken waktu si khusus lako erbahan persekutuan ras Tuhan Dibata (Keluaren 20 : 8 – 11). Sebage kalak si tek – erkiniteken man Tuhan Dibata, maka arus tetap si jalin relasi, persadanta si mehuli ras IA arah penembahen, ibadahta. Guna sie la banci la arus si sikapken, siaturken waktu si khusus guna sie gelahna tuhu-tuhu banci fokus ras tutus ateta nembah man baNa. Nikapken waktu si khusus guna ersembah, er-ibadah e berarti pe tek kita maka IA erkuasa ras ngasup ncukupken kerina keperlun geluhta. Emaka gia lit waktu ntah wari-warinta e la sipakeken guna erdahin encariken keperlun geluhta, cukup nge ibahan Dibata kai siiperluken kita. Emaka bas konteksta gundari, ersembah bas kebaktin Minggu tupung wari Minggu e, PJJ, PA ras ndahiken kegiaten-kegiaten gereja sidebanna situhuna termasuk nge ujian kinitekenta man Dibata : Tek nge kita gia lit sada bagin waktu siibereken Dibata e sipakeken guna IA, tapi labo kita kekurangen bas geluhta sabab IA kap si enggo njadiken langit ras doni emaka cukup nge dalanNa ncukupken kerina keperlun geluhta ?

4. Engkelengi temanta manusia bagi kita jine engkelengi dirinta (Matius 22 : 39).

Keleng ate man Tuhan Dibata (vertikal – ku datas) la banci lang arus teridah, icidahken pe ibas keleng ate man teman manusia (horizontal – ku kawes kemuhenta) sabab bagi isenaken ibas 1 Johanes 4 : 20, “ Adi lit kalak si ngataken maka keleng atena Dibata, tapi nembeh atena man seninana, kalak sibage perguak. Sabap kalak si la engkelengi seninana si idahna, labo tuhu ia engkelengi Dibata si la idahna”.  Emaka gelah tuhu-tuhu teridah kita engkelengi Dibata, arus pe sikelengi temanta manusia, janah keleng ateta e bagi kita jine engkelengi dirinta jine.

Bagem dagena arah kata Dibata paksa enda, kita ipengasup guna tetap nare, natap ku Tuhan Dibata saja sebage inganta erpengarapen kerna kerina dampar geluhta. Em bukti kiniteken ras keleng ateta man baNa. Raduken sie pe, sikelengi temanta manusia bagi kita engkelengi dirinta.


Pdt. Eben Eser Depari, M.Th

(GBKP Rg. Sp. Selayang)

__Klasis Menara___

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba