Perpulungen Jabu-Jabu, Februari-6 Maret 2021, Tuhan Ngidah Kejahaten Manusia (Kejadin 6:5-8), Bencana Alam

Perpulungen Jabu-Jabu, Februari-6 Maret 2021, Tuhan Ngidah Kejahaten Manusia (Kejadin 6:5-8), Bencana Alam

Ibas konteks sekali enda iajuk kita uga ngidah bencana alam alu mata kiniteken. Memang bencana alam terkadang terjadi sebage peristiwa, gejala alam akibat ketidakseimbangan siterjadi. Banci saja bencana enda perbahan ulah eksploitasi berlebih arah manusia nari seh maka alam kehilangen keharmonisasianna. Misalna, sampah sierbahanca banjir ibu kota, banjir bandang perbahan perambahan hutan rsd. Banci saja bencana e perbahan gejala alami guna menyeimbangken alam mulihi, misalna deleng meletus, gempa bumi rsd. Kai gia penyebabna kerina enda arus min mabai kita tetap ernalem man Tuhan ibas kerina situasi terkini. Bencana alam arus mabai kita kubas perenungen maka Tuhan simada kerina sinasa lit. Tuhan la pernah nadingken kita. Tuhan la pernah gagal proyek gia dosa enggo engkenai tinepana, khususna manusia. Seolah-olah adi lanai terpakai maka banci ihancurken, ibuang ras iganti alu simbaru.

Arah cerita nuah enda, siidah uga Tuhan natap, menilai ras mengevaluasi kai sienggo ijadikenNa. Tuhan sinepa ndube kepe erkadiola perbah kai sienggo ibahanNa. Tapi lit siman germetenta arah cerita enda maka Tuhan tetap natap, menilai ras erbahan evaluasi bas kerina sienggo ibahanNa. Tuhan ngenehen maka kerina manusia enggo erdosa. Erdosa dingen melket menurut penilaian Dibata labo manusia. Tatapen manusia banci saja salah sebab tampilen saja. Tapi Tuhan natap secara total ras holistic. Bage pe Tuhan erngena ate man Nuah sebab ia erdalan ibas dalan Tuhan.

Bencana e memang tetap pasti terjadi ibas doni enda tapi kalak siernalem man Tuhan ibereken kesempaten guna mpersiapken diri segala kemungkinen segelah air bah enda la engkenai ia. Nuah ibas ngalo-ngalo bencana alam enda mpersiapken kapal ras keluargana gelah selamat. Persoalenna, dikune manusia kena korban bencana alam? Bencana alam e labo erbahanca kita bene. Mungkin kita tah keluarga kita korban bencana alam tapi sipasti erdalanlah ibas dalan Tuhan maka kengasupen ngidah sura-sura Tuhan, peka terhadap gejala-gajala alam, ras tetap waspada dingen mpersiapken segela kemungkinen arus tetap min lit ibas anak-anak Tuhan. Emaka ula pedas kita muat kesimpulen menghakimi soal dosa tah lang maka musibah/bencana e reh tapi seberapa besar tanggung jawab (Nuah) kita nelamatken isi jabunta, sekelewetta mentasi masa bencana enda gelah tetap ibas pemeliharaan Tuhan.

Inget mata Tuhan la pernah terligen natap kerina manusia. Baik dosa silakoken ibas gelap pe. Mungkin hukum doni la kita kena tapi hukum Tuhan ras akhirat pasti engkenai. Ersikaplah ope ukumen e reh man banta. Erdalanlah ibas dalan Tuhan. Jadilah singena ate Tuhan.


Pdt. Daud Sembiring

(GBKP Rg. Namorambe)

__Klasis Medan Namorambe___

Share this post

Comments (0)

  • Sumiati Perangin-angin Reply

    Mohon buat tertib acaranya ,lagu-lagunya Pendeta

    March 2, 2021 at 1:32 pm

Leave a Reply to Sumiati Perangin-angin Cancel reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba