Khotbah Minggu, 28 Pebruari 2021 Passion III (Reminescere), Iperkiraken Dibata Kiniteken Kalak Si Tek (Roma 4:18-25)

Invocatio             : “Erkiteken IA dem perkuah ate, ipasu-pasuNa kita kerina, iberekenNa man banta lias ate si la erkeri-kerin” (Jph 1:16)

Ogen                     : Masmur 22:23-27

Khotbah               : Roma 4:18-25

Tema                     : Iperkiraken Dibata Kiniteken Kalak Si Tek

1. Minggu reminescere ertina minggu kita ngginget perkuah ate Dibata. Ibabai kita guna nandai kebujuren ras perkuah ate Dibata ibas kekotenta si tentuna mabai kita netapken ukur guna ernalem man Dibata ibas tengah-tengah perbeben geluhta. Masa-masa Passion III enda pe kita ibabai maka kiniseran, perbeben, masa-masa tersulit, pengarapen si tempa-tempa lanai ngasup kita ndalanisa, ngalokenca tapi lit denga ije kiniteken sipaguh dingen pengarapen simegegeh, Tuhan pasti nehken keleng ateNa, mereken siterbaik man banta sierkiniteken man baNa. Reminescere, ningetken kita kerna keleng ate Tuhan tapi guna ngidah keleng ate Tuhan e butuh waktu ras cara Tuhan labo sebalikna. Irama derap langkahta selaras, seirama ras cara Tuhan.
2. Adi ngerana kerna perkuah ate, maka ngerana kerna pribadi si labo layak, la pantas, la sempurna dingen dem keterbatasen tapi ilayakken, iatanken ngaloken pemere e. Paulus ngerana ibas Efesus 2:8-9 “erkiteken lias ate Dibata nge maka kam enggo terkelin, erkiteken tek kam man Kristus. Labo bekas perbahanenndu tapi pemere Dibata kap e. Labo ulih pendahinndu e, emaka labo lit dalanna ise pe muji bana.” Pasu-pasu Tuhan e labo perban kelimpahen materi tapi tetap ngasup ngikut ras muji Tuhan ibas setiap musim kegeluhenta. Ibas setiap situasi iajuk me kita tetap berhikmat ras ernalem man Tuhan.
3. Ibas bahan khotbahta minggu enda, Paulus mabai kita kerna perkuah ate Tuhan arah kegeluhen Abraham. Engkai maka Abraham? Sebab ia me salah sada bapa leluhur kalak Israel, uga ia nggeluh ibas erkiniteken ras erpengarapen man Tuhan I tengah-tengah konteks kegeluhenna secara manusia tempa-tempa lanai mungkin e terjadi. Ia model erkiniteken man bangsa Israel bage pe kita kalak Kristen. Emaka ia me gambaren si tepat kerna erkiniteken man banta. Gambaren siicidahken Abraham cara erkiniteken eme kerna kinitekenna labo muncul, turah arah rumusen teologis tapi arah pengalamen nggeluhna er Dibata, melatih kepekaan panca indra rohanina lebih mengenal Tuhan sinisembahna. Ibas ia erkiniteken teridah ia la saja percaya tapi mempercayakan diri sepenuhna man Tuhan. Ibas kiniteken ia ngaloken pendilo Tuhan e, janah ibas kiniteken me ia erdalan nggeluh ibas persuruhen Tuhan e. Pemeliharaan Tuhan tuhu-tuhu iarapkenna. Tuhan pasti la pernah ingkar janji ras nadingken ia sisada.
4. Misalna saja ibas konteks oratenta sekali enda. Iuji me kemurnin kiniteken Abraham maka Tuhan njanjiken ia kesusuren ras jadi bapa nterem bangsa. Padahal kondisina ras ndeharana lanai memungkinken nari rikutken keterbatasen fisikna ras umurna sienggo ujur. Sanga lanai lit alasen guna berharap lebih kerna keterbatasen fisikna tapi ije me teridah ia tek kerna keleng ate Tuhan. Keleng ate Tuhan la ibatasi arah keterbatasen si ni alami manusia. Kiniteken Abraham teridah maka diluar batas kemampuanna Tuhan sedang merancang janjiNa isehkenNa man bana. La ia sangsi, janah kinitekenna erbahanca ia reh gegehna, seh maka tetap ia muji Tuhan. Sanga daging kulana reh lemahna, tapi kinitekenna reh megegehna erpengarapen man Tuhan. Cara ras waktu Tuhan e la ibatasi umur (Maria mupus sanga ia singuda-nguda denga, Sara mupus sanga ia enggo melus). Keterbatasen ras kekotenna bahken ibas titik terlemahna sierbahanca gegeh ras keleng ate Tuhan lebih tangkas ras erkuasa. Emaka Abraham labo ngenehen keterbatasenna tapi ketidakterbatasen Tuhan bas geluhna. Abraham labo ngenehen uga ia metunggungna ngaloken hal simbelin arah Tuhan nari tapi pelin-pelin perban perkuah ate Tuhan saja. Tuhan mperkiraken kiniteken Abraham sebab kinitekenna e aktif ras lenga i batasi aturen-aturen agama (misalna, sunat sierbahanca surat roma enda itulisken eme memutusken sekat-sekat antara kalak Yahudi ras lang). Kebenarenna iperkiraken Tuhan labo perban kengasupenna ndalanken aturen agama tapi kinitekenna man Tuhan secara total. Kiniteken ras keleng ate Tuhan la ibatasi sekat-sekat agama ras aturen kakuna. Keleng ate Tuhan la ersibar. Kiniteken Abraham eme hubungen pribadi si intim ras Tuhan. Janah e iperkiraken Tuhan man bana.
5. Daud ibas masmurna enda nuriken alasen ia tetap ngasup ngataken bujur ras mpermuliaken Tuhan ibas kerina dampar geluhna. Labo perban la pernah ia ngenanami kiniseran, kesesahen ibas geluhna tapi erkiteken Tuhan la pernah nadingken ia ibas kai sinialamina. Pengakunna ibas masmurna enda iturikenna maka Tuhan la pernah mpersilahang kalak sitertindih, dingen tetap mperdiateken kiniseran manusia. Tuhan labo pernah erpenundal tapi ngaloi kalak sierlebuh man baNa. Kalak musil man asa besurna. Sindarami Tuhan senang iakapna seh rasa lalap.
6. Konteks kiniseran e labo pernah ipersilahang Daud, tempa-tempa banci bene sie kerina adi enggo ernalem man Tuhan. Daud ngajak dingen ngajuk tetap ernalem man Tuhan dingen muji Tuhan sebab em me gegeh guna pajek cinder ngalakenca. Tuhan la menjanjiken angin tanpa badai, laut tanpa ombak, hidup tanpa masalah tapi sada hal sipasti, Tuhan la pernah nadingken kalak sini kelengiNa. Tuhan tetap mereken penampat dingen gegeh.

6. Tuhan e dem perkuah ate, janah perkuah ate e labo maun-maun, temporal saja tapi tetap tahan rasa lalap. Perkuah ate Tuhan la pernah mosar, berubah-ubah kai gia jadi terjadi. Situasi lalap berubah-ubah, jaman silih berganti tapi sipasti keleng ate Tuhan e la pernah berubah. Keleng ate Tuhan melewati segala musim bas doni enda. Ibas Tuhan nginget perkuah ateNa maka lanai lit alasen kita la tek man keleng ateNa e. Tetaplah erkiniteken ras ernalem man Tuhan melewati beragamna musim bas geluhta. ijem teridah pemeliharaan Tuhan e nyata man kalak si tek man bana. Selamata minggu passion. Amin

Pdt. Daud Sembiring

(GBKP Rg. Namorambe)

__Klasis Medan Namorambe___