PJJ 21 – 27 FEBUARI 2021 JADI USIHEN 1 TIM 4 : 12-16 (Tema Tahun Pelayanan)

• Umur sekalak jelma em salah sada faktor penentu guna ihamati. Biasana kita lebih ngergaken kalak si umurna lebih metua. Erkiteken kalak si lebih tua umurna ianggap lebih dewasa arah segi umur. Tapi situhuna enda labo min ukuren si mutlak sebab tupung sekalak jelma reh tambahna umurna tapi ia la ncindahken biak simehuli ras ekemalangan man Tuhan maka lanai bo kalak mehamat man bana.
• Timotius termasuk kalak si muda denga arah umur. Lit simperkiraken umurna paksa sie berkisar 20an tahun. Perban Paulus pe ikataken kalak nguda paksa ia naksiken Stefanus ibenteri salu batu (Perb. 7:58). Erkiteken umur Paulus paksa si e sekitar 30 tahun, tentuna Timotius simerupakan anak rohani Paulus lebih muda asangkan Paulus. Selaku pemimpin perpulungen si nguda dengan singelai i perpulungen Efesus, situhuna murah kal perpulungen Efesus terlebih si umurna nggo metua mapas ntah pe anggap enteng man Timotius erkiteken ia nguda denga.
• Umur singuda denga enda, jadi salah sada faktor Timotius la percaya diri. Tapi Paulus ibas suratna ngajarken man Timotius gelah ia banci meneken pengangkan kalak si mapas man bana erkiteken umurna si nguda denga, e alu mereken usihen si mehuli eme :
• Kerina pengerana, artina kerina kata-kata/pengerana arus mehuli janah dem pertimbangen termasuk ibas kerina pengajaren-pengajaren si ipeseh Timotius sebab enda banci menentuken ia iergai kalak ntah lang.
• Lagu langkah, enda menyangkut uga carana ncidahken perbahanen, kesopanen, kebujuren, bagepe kerina aspek simenentukan integritas diri sekalak jelma.
• Keleng ate, enda me jadi sada si arus lit gelah banci encidahken ukur situhu-tuhu erkeleng ate nandangi kalak si deban, nggit erdiate sebab keleng ate me si jadi palas hubungen sekalak jelma ras Tuhan bagepe teman manusia.
• Kiniteken/kesetiaan, kesetiaan ijenda nuduhken kiniteken man Tuhan si tetap setia man baNa. Setia e me sikap/perbahanen si tetap erbanca sekalak jelma ngasup bertahan, ras langgit mobah. Tetap setia melayani Tuhan ras setia ngelai perpulungen si ilayanina.
• Ukurndu bujur/kesucian, ukur sibujur (kesucian/kemurnian) mbelin kel hubungenna ras nggit nirangi dosa subuk ibas perukuren bagepe perbahanen.Selaku kalak singuda denga, Timotius harus mpedauh dirina arah sura-sura daging si erbanca ia dabuh kubas erbage-bage dosa. Bagi siisuratken i bas 2 Tim 4:5, “tetapi kuasailah dirimu dalam segala hal, sabarlah menderita, lakukanlah pekerjaan pemberita injil dan tunaikanlah tugas pelayananmu!”
• Emaka tep-tep kita la perlu kitik siakap banta, adi kita nguda denga tapi adi kita banci mereken usihen si mehuli ibas kerina dampar geluhta. Emaka labo banci kalak mapas ntah anggap enteng man banta. Arah tema tahun pelayanen enda, i ja kalak si nguda jadi pasu-pasu, emaka tugasta selaku generasi tua si jadi bapa nande subuk secara biologis bagepe bapa ras nande rohani harus mempersiapken anak-anak ras kempunta gelah ia banci jadi pasu-pasu man banta arah dalanken si mehuli bagepe ibas kerina kegeluhenna siteridah maka ia sekalak sierkemalangen man Dibata.
• Umur labo faktor penentu si mutlak guna ngukur kualitas geluh ntah pe nilai diri seseorang. Sebalikna ntah kita si nggo berumur ntah nggo metua, adi la si cidahken biak si jadi usihen si mehuli maka tentu kalak mapas man banta.

Pdt. Agustina Perangin-angin S.Th, M.Psi

(GBKP Rg. Kemenangen Tani)

___Klasis Menara___