Minggu Passion/ Invokavit, 21 FEBRUARI 2021, Padan ras Kuasa Dibata (Kejadin 9:8-17)

Invocatio    : “Janah seperteluna si tading denga Kuuji dingen Kubersihken bali ras pirak ibersihken i bas api. Kuuji ia bali ras emas pe iuji. Kenca bage ertoto ia man bangKu, jenari Kualoi ia. Kukataken man bana maka ia kap bangsangKu, dingen iakuina maka Aku Dibatana.” (Sak. 13:9)

Ogen          :    1 Petrus 3:18-22 (Tunggal)

Kotbah       :    Kejadin 9:8-17 (Tunggal)

Tema          :    Padan ras Kuasana Dibata

• Bahan khotbahta enda nuriken peristiwa keluarga Nuah si mbaru ndarat ibas kapal kenca terjadi banjir simbelin. Nuah ras ndeharana bagepe anak-anakna ngaloken padan bas Tuhan nari (Kej. 9:11) maka Dibata tetap setia ibas kerina kecibal geluh manusia. Ia tetap erbahan cara gelah manusia banci jadi temanNa mpekena-kena doni enda (Kej. 9:1-2). Kenca kejahatan si lit ibas doni, ibas masa kegeluhen Nuah ope banjir simbelin, seh maka Dibata erkadiola njadiken manusia (Kej. 6:6). Tetap nge Dibata ngerancangken si mehuli guna masa depan tinepana (la ngenca manusia tapi kerina tinepana). Kelenglengen jadi sada cara ibahan Dibata guna mpelimbarui doni si nggo ceda alu kejahaten manusia. Nuah ras isi jabuna jadi sada keluarga si ipilih Tuhan guna nerusken kegeluhen manusia rikut ras tinepa sidebanna.
• Padan Dibata si nggo i banNa nandangi manusia bagepe isehken man kerina rubia-rubia, doni ras kerina isina jadi objek keleng ate Dibata. Dibata njamini kegeluhen kerinana (kelestarian semuanya). Perbahanan Dibata enda ngajarkan man Nuah bagepe ras anak-anakna guna ngelakoken bagi si ibahan Dibata. Manusia idilo guna nehi pendilo ngkuasai doni ras kerina isina (Kej. 9:1,7 ; bdk. Kej.1:26-28). Jadi labo guna encedai bagepe rate-ate nandangi tinepa Dibata.
• Ibas pasal 9:1-17 enda i turiken kerna padan si labo ngenca i sehken man manusia tapi man kerina tinepa (ay. 10). Engkai Dibata erbahan padan man kerina tinepana enda me sada keuniken siibahan Dibata. Benteha (pelangi) merupakan tanda perpadanan Dibata. Padan Dibata enda igelari unik erkiteken ibahan sepihak ngenca/unilateral tapi bersipat universal. Bagepe padan si ibahan Dibata enda e me perpadanen tanpa syarat artina Dibata la nimai manusia reh ulina ibas perbahanenna (Kej. 9:18-20). Ituriken maka manusia tetap nge erbahan si jahat pasca banjir si mbelin si erbanca doni kelenglengen termasuk Nuah. Nuah kenca ndarat bas kapal i suanna anggur, janah i turiken ia minem anggur seh mabuk. Tuhan pe erpadan secara permanen maka ndigan pe lanai encedaken kasa kai si nggeluh alu banjir si mbelin, digan pe doni enda lanai i cedaken alu banjir (ay.11).
• Ibas ogenta ituriken kuga keleng ate Tuhan arah anakNa Yesus Kristus si nggo reh ku doni mate gunanta, janah enda jadi puncak keleng ate Tuhan. Enda me bukti Dibata nehi padanNa alu mpeteruk baNa jadi seri ras manusia lako nebusi manusia perdosa gelah kita iperembakken rasSa. (1 Pet 3:18)
• Perpadanen eme kesepakaten dua pihak si njadi ingetenta si man gelemen dingen man sehenken, arah invocatio nta ituriken kerna nubuat si sehken Nabi Zakaria gelah kerina kalak erkemalangen man Dibata janah tetap megenggeng ibas kinitekenNa man Dibata. Jadi adi si perdiateken mulai invocation, ogen bagepe khotbah kerina ngingetken kesetiaan ras kepatuhen ibas dalanken perentah Dibata maka si aloken kemalemen ate ibas Dibata si nggo erpadan tetap engkelengi kita. Bali ras padan Tuhan kempak Nuah, Tuhan pe erpadan man banta tetap nemani kegeluhen anak-anakNa si tek man baNa. Tuhu kegeluhen kalak si tek la pulah ibas erbage-bage tantangen ras kesusahen i doni enda. Bagi Nuah si erjuang erbahan kapal bagepe ngikutken kerina perentah Tuhan.
• Ibas turin-turin kegeluhen Nuah ras keluargana banci kita erlajar guna ndalani kegeluhen alu setia ngikutken Tuhan. Keleng ate Tuhan si bage belinna me si jadi gegehta guna tetap tek nandangi kerina padan Dibata. Emaka tetaplah kita tek nandangi padan ras kuasa Dibata ibas Kristus Yesus sebab padan Dibata tetap itepatiNa janah la ndigan pe erbanca kita kecewa.

Pdt. Agustina Br Peranginangin, S.Th.M.Psi

(GBKP Rg. Kemenangan Tani)

___Klasis Menara____