PJJ 14-20 Februari 2012, TUHAN MEREKEN KEPENTAREN MAN MANUSIA (Kuan-Kuanen 2:1-8)

Kitab kuan-kuanen nuriken kerna pengajaren. Pengajaren e ituriken ibas pedah, perumpamaan dingen ajar. Isina mbue nuriken kerna cara nggeluh ibas kegeluhen si tep-tep wari dingen ibenaken alu kata persinget nina, jadi kalak si erpemeteh arus lit ibas ia kehamaten dingen kemalangen nandangi Tuhan.

Kuan-Kuanen 2:1-8 nuriken kerna guna kepentaren.  Kata pentar ibas bahasa indonesia hikmat. Menurut KBBI Hikmat e me kebijakan, kearifan. Kata kepentaren atau pe hikmat ibas kiab Kuan-kuanen lit piga-piga kali ikataken. Menurut kitab Kuan-Kuanen kepentaren eme nggeluh ras rukur sesuai ras kebenaran ras cara Dibata. Ndatken kepentaren lebih meherga asangken pirak ras emas (bdk. 3:13,14). Janah guna ndatken kepentaren si la banci lang eme mehamat dngen erkemalangen man Tuhan (bdk. 1:7).

Ibas ayat enda me sada persinget guna tetap erlajar ras megermet nandangi kepentaren ras ngantusisa pe.  Guna ndatken kepentaren daramilah e desken darami emas, desken ngayaki erta si terbuni. Ertina guna ndatken kepentaren harus lit usaha, tanpa mengnal lelah, lit ketutusen ras ketekunen. Labo banci kita langsung pentar, pasti lit proses.  Tapi ibas si e kepentaren e reh ibas Dibata nari kap. Jadi kalak si ngerembakken diri man Dibata nge si banci ngaloken kepentaren ibas geluhna. alu mehamat dingen erkemalangan man Dibata kita banci pentar. Janah ibas kita makeken pemeteh ras pengertin banci si pakeken alu payo ras ngena iakap Dibata. sebab pemetehta e siakui labo erkiteken kinibeluhenta semata tapi erkiteken pemeteh siibereken Dibata. Pemetehna i pakeken guna kiniulin kalak si deban, la egois ras i pakeken kepentaren e guna jadi pasu-pasu man kalak si deban. Janah arah kepentarenna gelar Dibata terpuji. Janah man kalak si makeken kepentaren alu payo Tuhan tetap mereken penampat ras ampang-ampang ibas erbagai-bage tantangen guna ndatken kepentaren bagepe naksikenca man doni enda.

Pdt. Merry P. Br Sitepu, S.Th

(GBKP Rg. Rampah)

___Klasis Menara____