MINGGU PASSION I/ ESTOMIHI, 14 PEBRUARI 2021, Terang Si Ersinalsal I bas Pusuh (2 Korinti 4:1-6)

MINGGU PASSION I/ ESTOMIHI, 14 PEBRUARI 2021, Terang Si Ersinalsal I bas Pusuh (2 Korinti 4:1-6)

Invocatio           : Dibata kap keselamatenku man baNa aku ernalem, emaka la aku mbiar. TUHAN kap simereken kuasa ras keriahen man bangku; Ia kap keselamatenku (Jes. 12:2).

Ogen               : 2 Raja-raja 2:1-12

Kotbah            : 2 Korinti 4:1-6

Tema               : Terang Si Ersinalsal I bas Pusuh


Surat si peduaken man perpulungen Korinti itulis asum hubungen Rasul Paulus ras perpulungen Korinti mengalami  keretaken. Piga-piga kalak angota perpulungen e nerang Rasul Paulus alu mesangat subuk ibas pengajaren bagepe kerna kerasulenna. Tapi Rasul Paulus tetap encidahken atena metedeh nandangi persadanna mulihken ras perpulungen e. Si jadi tujuan surat enda eme : Guna mereken semangat man perpulungen Korintus si tetap setia man Dibata, gelah tetap ibas kiniteken arah pengajaren siisehkenna dingen ulanai terpengaruh ibas pengajaren sideban siencedaken. Bahan kotbahta enda salah salah sada tulisen Rasul Paulus sinuriken kerna pendahinna ibas mbritaken Berita Si Meriah:

Ibas ayat 1  Paulus nuriken kerna pembarken berita si meriah maka banci ilakokenna erkiteken perkuah ate Dibata. Perkuah ate Dibata iertiken Paulus ibas kesempaten guna banci ngelai e erkiteken i percayaken Dibata guna pembarken Berita Si Meriah. Emaka i dahiken Paulus ras teman-temanna pembarken berita simeriah e alu la erleja-leja. Ibas bahasa indonesia tidak tawar hati = kecil hati, lelah, penat, putus asa. Jadi amin pe melala tantangen labo e erbanca surut ibas pembarken Berita Si Meriah tapi jadi sada kemegahen man bana. Tantangen siihadapi Paulus bagi ituriken ibas ayat dua. Ituduh Paulus ras teman-temanna maka lit kegeluhen siterbuni, ngeluh nipui, bagepe iputarbalikkenna kerna kata Dibata. Paulus pe nuriken maka kelompok-kelompok si mekeng si tetap ngelawan Berita Si Meriah, si tetap nulak pendahin rasul-rasul maka i katagoriken Paulus kalak si perlawesna kempak kebenen (ayat 3). Kalak e kalak si la tek, siukurna enggo ipepentang dibata palsu jaman enda (ind: ilah zaman ini menunjuk kepada iblis). Si la ipelepasna guna ngidah terang sinalsal erpagi-pagi si sangana mbincar man bana. Terang e me Brita Si Meriah si encidahken kemulian Kristus si segambar ras Dibata (Ayat 4). Paulus pe negasken maka labo kerna dirina siiturikenna tapi kerna Jesus Kristus selaku Tuhan si erkuasa, erdolat. Ras Kristus me pusat isi berita siipeseh Paulus. Janah erdandanken Kristus nggit jadi budak perpulungen. Adi si nen latar belakang Paulus sebelum bertobat ia me sekalak pemimpin si terhormat siihamati, tapi kenca ia bertobat janah jadi perBerita Si Meriah berubah jadi budak si kurang ihargai (Ayat 5). Bagepe iterangken Paulus kerna terang si ersinalsal ibas gelap nari. Terang enda me terang Dibata. terang si ersinalsal ibas pusuh manusia seh maka banci itandai manusia kemulian Dibata si teridah ibas diri Jesus Kristus. Ertina maka banci kalak tek man Jesus erkiteken iterangina pusuh manusia alu terang kemulianNa (ayat 6).

Ibas ogenta ituriken kerna Elia iangkat kusurga, sanga si e ia sangana ras ajar-ajarna Elisa. Ije teridah ulih kesetian ras tanggung jawab Elisa ialokenna kuasa ibas Dibata nari guna nerusken dahin si enggo ilakoken Elia (ayat 11-12). Elia iangkat ku surga bagi Henokh (bdk. Kej. 5:24) alu la ndalani kematen. Elia iangkat ku surga oleh Dibata alu gereta perang ras kuda si ernala-nala bagi api. Si e ilakoken Dibata erkiteken Elia e me sekalak nabi si setia ras taat man Dibata. Bage pe  Elisa  teridah  kesetianna, selama telu kali Elia atena nadingken Elisa eme i  betel, Jeriho ras lau Jordan (ayat 3, 4 ras 6). Tapi Elisa tetap alu setia ngikut-ngikut Elia. Kepeken tujun Dibata guna ngutus Elia ku telu ingan enda e me guna mereken semangat si terahir ras mpebetehken maka Elisa me bakal jadi pemimpin si mbaru guna nggantiken Elia. Sebab Elia  iangkat Dibata me ku surga.

Bagepe ibas invocatiota nuriken kerna ende-enden pengataken bujur bangsa Juda ibas pengkawali Dibata.  I kataken bangsa e maka Dibata kap keselamaten, ras man Dibata saja penalemenna. Emaka la mbiar bangsa e ngalaken kiniseran-kiniseran erkiteken ibereken Dibata kuasa ras keriahen.

Arah bahan kotbahta nuriken maka erkiteken iterangi Dibata pusuhta seh maka banci kita nandai Dibata alu payo. Terang e me Jesus Kristus. Kalak singaloken terang e ngenca ngasup ngidah perbahanen Dibata. Iterangina pusuh ras perukurenta. Alu bage terang e ersinalsal ibas pusuhta. Bagi pengakun Rasul Paulus maka pendilo Dibata guna ngelai e erkiteken perkuah ate Dibata emaka la ia erleja-leja. Aminna pe melala tantangen sinihadapina, la iakui kerasulenna,  i katakenna geluh Paulus nipui ras memutar balikken kata Dibata. Paulus tetap setia ras ngelakoken 3 prinsip e me : Ibas pelayanenna guna kemulian Dibata. siiturikenna kerna Yesus Kristus labo kerna dirina. Si peduaken ibas ia ngelai iakuina ia sebagai budak. Ras si terahir labo ia mengandalken kepentarenna tapi mengandalken kuasa Dibata (Adi si nen latar belakang Paulus ia sekalak si pentar). Bagepe ibas geluhta terang e ibereken Dibata ibas pusuhta, arah Jesus Kristus si enggo nebusi dosata. Enggo i selamatkenna kita. Ibas minggu passion si pemena enda tetaplah setia kita ras erpenalemen man Dibata gelah ngasup kita ndalani kegeluhenta aminna melala tantangen. Tetap kita ngasup ngidah perbahanen Tuhan si mbelin erkiteken terang Kristus e ersinalsal ibas pusuhta.


Pdt. Merry P. Br Sitepu, S.Th

(GBKP Rg. Rampah)

___Klasis Menara____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba