Minggu 7 Februari 2021 , Sexagesima, Dibata Mpelimbarui Gegeh Kalak si Tek (Jesaya 40:27-31)

Invocatio    :Ngaloi Jesus, “Aku kap roti si mereken kegeluhen. Ise sireh ndahi Aku, lanai ia melehe, ise tek man bangKu lanai ia muas” (Joh.6:35)

Ogen            : 1 Korinti 9:16-23 (T)

Kotbah        : Jesaya 40:27-31 (A)

Tema           : Dibata Mpelimbarui gegeh Kalak si Tek

Adi Handphone (HP) ntah laptopta nggo keri baterena, si arus ilakoken eme alu men charge ntah pe mengisi baterena alu mencassa gelah HP ntah laptop banci ipake tole. Apaika usur sipake HP e guna Zoom, Tiktok, You Tube, FB ntah pe membrowsing data ateta, HP pedas keri batrena. Ibas sie perlu i pelimbarui gegeh batre HP e alu I charge. Enda salah sada contoh maka, kai pe perlu ipelimbarui. Kepeken la ngenca HP ntah Laptop si perlu ipelimbarui kalak si tek man Dibata pe perlu ipelimbarui gegehna. Arah bahan nta sekale enda, mari si nen uga Dibata mpelimbarui gegeh kalak si tek man bana.

Kitab Jesaya 40:27-31 merupaken bagin Deutro Jesaya ibas paksa pembuangen Babil. Ibas paksa Deutro enda bangsa Israael enggo terbuang ku Babil, perban dosa-dosa Israel, la ibegikenna Kata Dibata si ipeseh Nabi Jesaya. Ibas paksa pembuangen Babil, jaminen si ibereken Dibata man Israel selaku bangsa pilihen Dibata tempa-tempa enggo bene. Rumah pertoton enggo runtuh, istana Raja (mulai Raja Daud) pe runtuh, padahal Dibata erjanji maka IA tetap njamini geluh bangsa enda rasa lalap (bnd. 1 Samuel 7:12-16). Reh dekahna kiniseran nderpa bangsa enda i Babil, reh lalana turah penungkunen ibas bangsa enda, eme: lanai nge setia Dibata nandangi janjiNa man Israel? La kin Dibata ngasup mbebasken bangsaNa ibas kuasa Dewa Babil nari?

Guna mpetetap pusuh bangsa Israel si erbera-bera, Dibata nuriken arah nabi Jesaya si peduaken i Babil kerna Kemuliaan Dibata (Dibata Israel lalit tandingna), gelah teneng ukur bangsa Israel i Taneh Pembuangen Babil. Dibata Israel kap si ngerajai langit ras doni. Dibata kap si njadiken doni enda (ay.22). Dibata erkuasa, IA si ngkimbangken langit desken kire-kire si mbelang, emaka Dibata patut ipuji. Ibas sie Nabi Jesaya mpersingeti bangsa Israel maka ngkai ia jungut-jungut, tempa-tempa la idah Tuhan kesusahenna?(ay.27).  engkai maka tupung kalak mahan la bujur bandu iakapndu si e la diate Dibatandu? Ipetegas nabi Jesaya tole maka Tuhan e Ia me kap Dibata si rasa lalap. IA me sinjadiken doni enda kerina. La pernah IA latih tah kote, la ise pe metehsa kai si lit ibas ukurNa. Ertina Nabi Jesaya negasken uga Dibata e erkuasa ras erkeleng ate man bangsa si enggo ipilihNa. Emaka man kalak si latih iberekenNa gegeh, janah itambahina gegeh man kalak si ngelabuh. Nats enda merupaken pengapul man bangsa Israel si paksa kote ibas pembuangen. Sada ngenca dalanna maka terapul ras megegeh eme aku ernalem kempak Dibata, tetap ipelimbaruiNa gegehna. Desken rajawali kabang, lalap ia reh ganjangna. Kiam ia tapi la ia ngelabuh, erdalan ia tapi la akapna latih.

Tapi labo kerina ndatken gegeh e “tapi kalak si ernalem kempak Dibata”. Adi Terjemahan Baru nina “tetapi orang-orang yang menanti-nantikan Tuhan”. Jelas maka kalak si ernalem man Tuhan ras tek nandangi IA si ndatken gegeh.  Menanti-nantikan, berarti lit ije pengharapen, ketekunen ras kesetiaan ibas nimai ntah menanti-nantikan Tuhan. Penyerahen diri secara totalitas ibas Dibata ngelakoken si terbaik menurut Dibata. Adi invocatio ngatkensa maka ise si reh ndahi Tuhan, maka lanai ia melihe ras lanai muas. Ertina lit tindaken aktif arah bangsaNa guna reh ndahi Tuhan. Pembuangen labo ngatakensa maka Dibata kote dingen latih (ay. 29). Dibata la berubah ras kekelengenNa melampaui perukuren manusia. Bangsa Israel la perlu putus asa, alu mulihi ernalem man Dibata ras siakui kuasa Dibata, maka Israel ipelimbarui ras ipegegehi janah la pernah kecewa. Nabi Jesaya, gegeh kalak si ernalem man Dibata desken rajawali kabang. Rajawali lit kebiasaanna maka ia kabang idatas badai labo i teruh badai, ertina berani menghadapi badai masalah.

Dibata mpelimbarui gegeh kalak si tek, teridah arah kegeluhen Paulus ibas pembarken Berita Si Meriah. Melala perbeben sininanami Paulus tapi ibas gegeh si ipelimbarui Dibata erbahansa semangat ia beritaken Berita si Meriah “cilaka kal aku adi la kin Kuberitaken Berita si Meriah e”. sebab menurut Paulus, kerina manusia membutuhken keselematen, sebab Berita si Meriah e guna menyelamatken kalak si tek (Roma 1:16-17). Menurut Hudson Taylor, “satu-satunya motivasi yang membuat kita mampu bertahan hingga akhit dalam pelayanan misi adalah kasih Kristus yang menggerakkan hati untuk memberitakan Injil.” Motivasi enda erbahansa ngasup Paulus ibas segala situasi, kondisi ras ujian Zaman. Enda ilakoken Paulus gelah idatkenna pasu-pasu Berita si Meriah e (ay.23).

Ibas ndalani kegeluhen enda mekatep kita enggo “ipenjaraken” situasi geluh enda, kegeluhennta si enggo tertaban bagi pengalamenta gundari erkiteken pandemic Covid 19 enda. Perlu kita gegeh gelah banci pulah ibas kiniseran si derpa kegeluhennta, minimal ngasup ngalaken kiniseran. Ise pe labo merhat mesera, tapi adi reh, adi la ka cukup gegeh, tentu idarami si nampati. Adi bage kuja erpenalem? Ernalem man si banci nampati kita. Rehlah man roti kegeluhen e si ibahanna lanai melihe ras muas eme Jesus Kristus. Pengalamen bangsa Israel i pembuangen Babel banci jadi pe jadi pengalamenta. Baban si mberat banci erbahan bene pengarapennta. Dibata ngerana arah kitab Jesaya enda gelah tetap ukurta, nggo ijaminNa kita maka arah Tuhan Yesus kita nggo terbebas. Ula raguken janji Dibata man banta, tek nandangi kuasa Dibata si meganjangna. Ernalemlah kempak Dibata. Reh tuana, reh urakna gegehta. Reh belinna anakta, reh Buena kebutuhennta, tapi lit kap penampatta, IA penalemenya eme Dibata. Dibata tetap mpelimbarui gegehta, emaka tetaplah turiken kerna keleng ate Tuhan alu mberitaken Berita Si Meriah. Tuhan masu-masu.

Pdt. Rita A. Br Ginting, S.Th

(GBKP Rg. Nabrita)

___Klasis Menara____