Minggu Septuagesima, 31 Januari 2021, Jesus Erdaulat Dingen Erkuasa (Lukas 4: 31-37)

Minggu Septuagesima, 31 Januari 2021, Jesus Erdaulat Dingen Erkuasa (Lukas 4: 31-37)

Invocatio       : “Kata e enggo jadi manusia, janah IA ringan i tengah-tengahta. Enggo idah kami kemulianNa si mbelin, eme kemulian si ibereken Dibata man baNa, erkiteken IA Anak Dibata si Tonggal. Anak e encidahken lias ate ras kai sibenar kerna Bapa e” (Yohanes 1: 14)

Ogen.            : Mazmur 111: 1-10

Khotbah       : Lukas 4: 31-37

Tema            : Jesus Erdaulat Dingen Erkuasa


  1. Pengantar

Selaku kalak si tek man Tuhan Dibata, janah si enggo nggejabken uga belinna kuasa Dibata ibas kegeluhenna, tentu berkewajiben ia mberitaken kemuliaan Dibata (berita Simeriah) man kalak sideban.  Janah berita si peseh kita e, tuhu-tuhu eme karna kemuliaan Dibata si banci erbahanca kalak takjub/kagum nandangi kuasa Dibata e. Bagepe ibas  kita nuriken kerna kuasa Dibata e, si enda kerina labo kerna kebeluhenta erberita (kagum man dirinta). Tentu saja guna sienda, maka kita sebagai perberita si meriah e harus lebe ngidah dingen enggejabken kuasa Dibata erdahin ibas kegeluhenta (la hanya sebagai perberita). Adi setiap si mpeseh berita simeriah e lalap mengandalken kuasa Dibata si erdahin ibas ia, maka kata Dibata si i pesehna e berkuasa janah e teridah ibas  kalak sibegi-begisa. Terlebih ibas masa-masa pandemi covid 19 si seh asa genduari lenga erkedungen, bahkan reh ganasna pe. Emaka arah kita nuriken kerna kedaulatan dingen kuasa Tuhan e, banci erbanca reh tetapna ukur simbegi-mbegi dingen tetap geluh erpengarapen man Tuhan, sebab kuasa Tuhan e tetap nge teridah ras igejabken kita katawari pe, mulai nai-nai nari seh asa genduari.

  1. Isi

Ibas bahan khotbahta banci siidah uga Yesus makeken kesempaten si lit  guna memberitaken berita si Meriah. Kenca Yesus ras ajar-ajarNa seh i kota Kapernaum asum wari Sabat kalak Jahudi minter lawes Jesus ku Rumah Pertoton jenari ibenakenNa ngajar (Lukas 4:31). Arah si enda teridah uga Yesus tetap setia melaksanaken tugasna ibas wari keagamaan kalak Jahudi (wari Sabat), la tertaren-taren tapi minter lawes. Janah ije IA ngajar (nuriken kerna  kata Dibata/Kemuliaan Dibata).

Yesus ngajar la bali ras guru-guru agama (Lukas 4:32)). Guru-guru agama paksa sie mungkin saja ibas ia mberitaken kata Dibata (Ngajar) enda teridah arah kebeluhenna saja ibas mpeseh pengajaren e, tapi langa ilakokenna ketaatenna man Dibata, la bagi si ilakoken Yesus (masih merupaken kewajiban labo keriahen perbahan enggo enggejabken kuasa dingen kemuliaan Dibata). Janah banci ka siidah pe paksa genduari enda melala pengkhotbah e mpeseh kata Dibata (pengajaren) eme gelah kalak simegi e meriah akapna, seh maka melala bumbu-bumbu si la relevan entah pe si la ibas Dibata nari i peseh (padahal ikataken mpeseh kata Dibata), emaka melala nge siidah ibas megiken kata Dibata e mbue pertawaan tapi piga-piga sisungkun perpulungen e kenca mulih kebaktian kai nge si idatndu nina jawabsa : “La kueteh pe,  tapi meriah”. Adi bage me pengajaren e i peseh, me labo  berkuasa pengajaren na e? Tapi Yesus mereken pengajaren tuhu-tuhu alu kuasa seh maka pengajarenNa erbahan kalak mamang (takjub) si menimbulkan rasa entah pe kemauan yang kuat guna merubah hidup si lapayo ibas geluhna perbahan idahna kemuliaan/kuasa Dibata e arah pengajarenNa.

Bagepe sangana Yesus mereke pengajaren e, teridah reaksi ibas kalak si setanen si reh ku rumah pertoton alu katana “Man kadendu kin kami o, Jesus Kalak Nasaret ? Reh Kam gelah meneken kami? Kueteh nge ise Kam. Kam me si Badia si reh ibas Dibata nari! (Lukas 4:34). Teridah ije setan pe akukenna kerna kuasa Tuhan si erdolat e. Adi kita uga, uga nge penandaita kerna kuasa Tuhan e? Tentu kita danci nandai Tuhan si erkuasa e arah kata Dibata. Bagi sanga Yesus nehken pengajaren alu kuasa Dibata, banci siidah kata siipesehNa e mengubahkan kalak si la payo (“kesetanen”) seh maka turah kejolak ibas ia. Setan e atena banci tetap bertahan ibas manusia ndai, tapi kinatana ia merasa terancam keberadaanna sebab manusia e mbegiken pengajaren Yesus.  Emaka lit nge penolaken/tantangen. Tapi Yesus encidahken kuasa si lit ibas IA alu nergangi setan ndai “Sinik! Ndaratlah ibas ia nari !”.  Emaka ndarat setan e janah sekalak manusia e pe malem. Teridah maka arah pengajaren si ilakoken Yesus e erbahan kalak malem ibas kesetanen (“berobah ibas perbahanen dosa nari”).  Enda me si erbahanca maka kalak takjub   : “Kata-kata si kuga nge enda ndia? Erdolat dingen erkuasa IA merentah setan-setan e pe ndarat (Lukas 4:36).

Alu kata sideban, kata Dibata siipeseh alu kemuliaan ras kuasa Dibata,  tentu banci pedas mbar ku belang-belang doni, sebab ertambah-tambah kalak/manusia sienggejapken kuasa Dibata ibas kegeluhenna.

Enda k nge (kuasa Dibata) si igejapken/ siidah Pemazmur ibas pengogenta. Emaka bage belinna perkara-perkara si ibahan Tuhan ibas geluhna, penemani rikut ras pasu-pasuNa, janah undang undang Tuhan tetap tahan rasa lalap seh maka kalak si erkemalangen man baNa iberekenNa pemeteh simehuli. Bagem pengejapen Pemazmur enda ibas ia ngidah dingen enggejapken kemuliaan Dibata e seh maka ikatakenna Pujilah Tuhan, Terpujilah Tuhan seh rasa lalap. Ras pe  ngajuk perpulungen segelah tetap muji Tuhan ibas kerina dampar kegeluhen, baik si bagi ukur bagepe paksa si la bagi ukur.

  1. Aplikasi
  • Ope kita nehken pengajaren (beritaken kata Dibata) e arusna enggo siidah dingen sigejapken lebe kuasa dingen kemuliaan Dibata e bas geluhta seh maka kita pe enggejapken maka kuasa Dibata e lit ibas kita. Tentu saja enda teridah ibas sikapta nandangi Dibata e (“erdibata”) ibas kegeluhenta. Emaka kai si iberitaken e tuhu tuhu kata Dibata si banci mengubahken entah pe mereken pengajaren sidem alu kuasa Dibata. Pengajaren si i peseh kita labo gelah simegi-megi ndai” meriah/tawa-tawa saja” tapi gelah banci ngidah kemuliaan Dibata.
  • Ibas mberitaken kata Dibata e lit nge tantangen tapi alu kuasa Kesah Sibadia si iberekenNa man banta banci kita membebasken kalak si tertaban ibas dosa (“setanen”), si mereken keriahen / kekagumen nandangi kata Dibata seh maka ia pe ndatken kemalemen ate ibas Tuhan, emaka turah ibas pusuhna nari ungkapen bagi pemazmur ndai “Pujilah tuhan”, “Terpujilah Dibata seh rasa lalap”.
  • Erkiniteken man Tuhan ertina tek kita nandangi kuasaNa. Tek kita bahwa lit kuasa ibas gelarNa. Kita pe danci mpelawes setan ibas gelar Tuhan, adi lit kebiarenta ibas mpelawes setan e, berarti lit keragunta nanti kedaulatan dingen kuasa Tuhan e. Labo terjeng setan sja, kerina si mpeturah kebiaren, kalatihen rukur, bahkan sura-sura si jahat ibas pusuhta pe banci pelawes kita ibas gelar Tuhan, sebab IA erdolat dingen erkuasa ibas doni bagepe i surga.
  • Pengagum vs Pengikut. Geluh ras Tuhan tentu rusur nggejabken kekagumen ras ketakjuben nandangu kuasaNa ibas geluhta (bdk. Pengogenta Mazmur 111). Penggejaben sibagenda ula min ngadi bas sada titik ngenca, tapi turikenlah jadi berita simeriah ras berita pengarapennman kalak sideban. Ula mela nuriken kerna Jesus si erdolat dingen erkuasa e, terlebih adi enggo gejabken kita jadi pengalamen geluhta seh maka banci jadi pengalaman rohanita. Ula kita hanya sebatas pengagum saja tapi pe jadilah kita jadi pengikut-pengikut Kristus. Amin

Pdt. Melda P. Surbakti, S.Th

___GBKP Rg. Simalingkar A____

___Klasis Menara____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba