Pekan Penatalayanen IV, 20 Januari 2021, Paksa Si Payo (Pengerana 3:11-15)

Invocatio   :Ngaloi Jesus, “O nande, labo man aturenkenndu kai si man bahanenKu. PaksangKu lenga seh (Joh. 2:4)

Ogen         : 2 Petrus 3:8-9

Khotbah    : Pengerana 3:11-15

Tema         : Paksa Si Payo

Bas masa Pandemi enda, enterem kalak si paksana ngembangken hobby bercocok tanaman bunga. Lit sada bunga si tergelar bunga Krokot si cukup unik ras pe mejile erkiteken melala curakna. Si unikna eme, bunga Krokot terlak teptep erpagi-pagi janah karaben enggo melus, jenari pepagina bungana sideban ka si terlak, tapi tetap kenca ben wari minter ka melus, la gedang umurna terjeng sada wari saja tapi tetap rusur waktuna terlak, la pernah terlambat. Bunga enda merupaken salah sada contoh bekas tinepa Dibata si membuktiken maka kerina si itepaNa e ratur dingen mehuli, lit paksa terlak, lit paksa melus tapi kinijilenna la masap bas ingeten. Palas khotbahta pe sekalienda nuriken kerna sinasa lit bas doni enda erpaksa-paksa kap.

Bas kitab Pengerana enda ituriken kerna biak geluh selaku tinepa Dibata, si labo lit kuasana ibandingken Dibata, ras pe labo ngasup ngelawan nandangi kai si nggo iaturken Dibata. Khususna bas bindu 3 enda itekanken maka sinasa lit bas doni enda lit paksana, lit paksa tubuh, lit paksa mate, lit paksa meriah, lit paksa ceda ate, lit paksa kebenen, lit kang paksa ndatkenca, pas bagi bunga ndai lit paksa terlak lit paksa melus. Janah kerina si jadi enda sue ras paksa si payo rikutken pengakap Dibata kap (ay.11). Adi bas terjemahen bahasa Indonesia ikataken “IA membuat segala sesuatu indah pada waktunya,..” kata ‘indah’ (KJV: beautiful) ijenda mengarah ku makna terbaik, cocok, pas, ras menyenangkan. Si e kerina ilengkapi alu kalimat: pada waktunya (KJV : in His time) ntah pe “bas paksa si payo.” Enda nuriken maka rikutken pengalamen geluh penulis kitab Pengerana enda, bas paksa-paksa si jadi bas pertibi enda gia lit paksa si la bagi ukur tapi Tuhan njadiken e guna si mehulina/terbaik ibas paksaNa, labo lit hak manusia guna ngatur-ngatursa, bagi si teridah arah makna kalimat Tuhan Jesus man nandeNa, Maria (invocatio). Emaka erkiteken e, arusna manusia nggejapken maka kesempaten si lit denga emekap pemere Dibata, contohna bagi man, minem ras menikmati geluh/kesempaten si lit. Lit kata-kata bijak ngataken maka “kesempatan tidak datang dua kali” em tanda maka kesempaten emekap pemere Dibata, si arusna si isi alu ngelakoken perbahanen si mehuli sebab banci jadi kesempaten e lanai lit pepagi. Ogennta ndai ningetken maka waktu Tuhan la bali ras waktu manusia (2 Petrus 3:8). Sada wari ibas Tuhan, bali ras seribu wari tahun bas manusia, enda ikaitken Petrus kubas wari kerehen Tuhan si peduakaliken. Ija dekahna kita ertima labo bali ras dekahna waktu Tuhan bertindak, janah bas nehken padanNa Tuhan tetap saber nimai kerina kita manusia jera ibas dosa-dosanta nari gelahna la sekalak pe ikernepken. Em tanda maka Tuhan e dem alu keleng ate. Emaka kuga responnta?

Menaken tahun simbaru enda, kita lit denga bas masa Pandemi Covid-19, tentu secara manusiawi perukurennta idemmi alu kearun ate, apai ka adi lit keluarga ntah pe temannta si terpapar Covid-19.? Arah Pekan Penatalayanen tahun enda kita isingetken maka kerina lit paksana, janah nggom iaturken Tuhan si mehulina man banta. Emaka amin gia paksa si gundari enda labo kel bagi ukurta, idemmi alu kearun ate ras kesedihen tapi ola sempat lupa kita nandangi kiniulin Tuhan, bagi terlak bunga Krokot ndai, gia nggo seh paksana ia melus tapi kinijilenna jadi ingeten, bageme pe arusna pengingetta nandangi rencana Tuhan si mehuli si nggo isehkenNa kubas geluhta. Teklah maka labo lit paksa si la payo sabab kerina paksa-paksa rehna i bas Tuhan nari. Dage, arusna kesempaten guna ndalani wari-wari, ndahiken dahin rikut pe pelayanen, ras kesempaten guna mpekena-kena jabu jadi dalannta guna ngataken bujur man Tuhan sebab e kerina pemereNa nge! Entah kai gia sura-suranta ntah pe program pelayanen gerejanta bas tahun si lewat si langa tersehi, jadikenlah e jadi  dalannta guna nginget maka paksa si payo nggo iaturken Tuhan, jenari tetap semangat guna nerusken ras notoken kai si jadi sura-suranta kubas wari-wari si nandangi reh bas tahun 2021 enda. Perubahen demi perubahen tentu terus terjadi, tapi Dibata tetap kap rasa lalap seh rasa lalap, em sabapna man baNa saja lah kita ernalem. Amin

Pdt. Elisabeth R Ginting, M.Th

(GBKP Gd. Johor)

___Klasis Medan Namorambe____