Pekan Penatalayanen II, Senin 18 Januari 2021, Anak eme Pemere Dibata (Masmur 127 : 3- 5)

Invocatio      : Mindo aku man baNdu pasu-pasulah kesusurenku maka terus ia ermeriah ukur ibas kiniulinNdu. O Tuhan Kam enggo masu-masu ia emaka pasu-pasuNdu e tetap tading ibas ia rasa lalap (1 Kronika 17:27)

Ogen              : 1 Timotius 4 : 11 – 16

Renungan      : Masmur 127 : 3- 5

Tema              : Anak eme Pemere Dibata

---

Kata Perlebe

Ketubuhen anak ku doni enda pada umumna mabai keriahen ukur. Keluarga si ndauh ras si ndeher pe kerina ipebetehken kerna keriahen ibas ketubuhenna e. Gelar anak pe enggo isikapken alu dem pengertin ras pengarapen kerna kegeluhenna. Ibas pertumbuhen anak e pe melala erbahanca meriah ukur orang tuana ngidahsa, anem pe lit ka nge si erbahanca ndele ate umpamana adi ia sakit. Bage me ketubuhen anak itengah-tengah jabu tuhu-tuhu nambahi keriahen, seh maka lit kuan-kuan kalak karo “ jumpa tuah” ertina lenga iakap kuh jabu e adi lenga lit anak, ras “ anak eme buah bara” siertina si nai anak banci ikataken mbelin-mbelin ibas bara orang tuana. Nandena ngerawat anak e alu make perawah (perembah /kain panjang), janah bapa “nuak”(namaken anak ku barana). Bage me nuduhken ate keleng orang tua nandangi anakna. Termasuk pe pengangkan orang tua maka anak e eme pemere Tuhan si mehergana ku tengah-tengah jabu kalak si erkiniteken. Nandangi keluarga-keluarga si lenga ndatken pupus pe berusaha kuga gelah tuah e banci ialokenna, si teridah arah turi-turin geluh ntah kesaksin geluh: Abraham ras Sara, Elkana ras Hana, Sakaria ras Elisabet kuga tedehna atena ndatken kesusuren ras kuga Dibata masu-masu ras mereken anak kubas jabuna. Terdauhen pe tentu anak tengah jabu e la saja jadi generasi penerus tapi segedang geluhta banci min tambah temannta berbagi keriahen bage pe ras si man perdiateken kita. Enda me si jadi bahan pekannta sekalenda  ipersingeti kita kuga selaku orang tua banci lebih memahami tanggung jababta nandangi anakta sebage pemere Dibata e.

Uraian Teks

Renungenta erpalasken kitab Masmur 127 eme bagin ende-enden “peziarahen” Salomo (bahasa Ibrani: Shir Hama’aloth, ertina “nyanyian pendakian”. Kebiasaan ngendeken piga-piga masmur ilakoken piga-piga kalak ibas perdalanenna mendaki ku Jerusalem). Ayat 1-2 ngerana kerna rumah tangga ras rejeki eme pemere Dibata. Janah khusus ibas ayat 3-5 pemasmur enda ngerana kerna keberadaan anak i tengah-tengah keluarga/jabu. Hal enda banci sinen ibas ayat demi ayat ibas teksnta eme:

• Ayat 3 ; ikataken anak-anak eme sikerajangen Dibata kap, janah ipercayakenna man

banta selaku orang tua guna ngkelengi dingen mpebelin-belinsa seh ia

erpemeteh kerna si mehuli ras ndalankenca ibas geluhna.

• Ayat 4 ; Anak bali ras anak panah ibas tan si mbisa (bhs. Indonesia ditangan pahlawan)

ertina orang tua adalah sosok pahlawan (simbisa) si banci memanahken anak

panah e tepat sasaran. Ijenda me teridah tanggung jabab orang tua nandangi

anakna. Memang payo anak e milik pusaka ibas Dibata nari tapi adi la kin lit

perjuangen ras kerja keras bagepe keahlian orang tua guna memanahkenca

banci kari anakta e jadi “senjata makan tuan”. Adi la kin ateta tutus ndidik,

mpekena-kena anakta maka milik pusaka e ndai lanai erguna, teridah pe la

meherga anak e ilebe-lebe Dibata bage pe jelma sienterem.

Pemasmur pe nuratken kata “anak dilaki”, sabab ibas budaya patriarki khususna

Jahudi, ngidah  dilaki me si berkat ku peperangen. Genduari seri dilaki ras diberu

lanai erndobahen hak ras kewajipenna. Bage me orang tua berkarya guna

naruhken anak menggapai masa depan.

 

• Ayat 5; lit kebiasan kalak Jerusalem eme ibahan pengadilen guna ngadili perkara-

perkara ilebe-lebe  pintu gerbang. Janah penulis Masmur enda nggambarken

maka anak panah (anak ibas keluarga) e banci jadi gegeh seh maka la kemalun

ibas ngalaken pengadilen e. Ertina maka kehadiren anak-anak itengah-tengah

jabu banci jadi kedamen sebab ibabana pembelaan ras keberpihaken nandangi

orang tuana. Emaka malem kel ate kalak si enggo nikapken “masa depan” (labo

secara materi tapi kemampuan guna ngidah kebujuren, kekelengen ras keadilen)

anak-anakna dingen sangap kel kalak si melala anak panahna si bage.

Ibas ogenta pe, Rasul Paulus pe rusaha nikapken kegeluhen masa depan alu numpak-numpak dingen mpetetap ukur Timotius si nguda denga, gelah pang, la permela, amin nguda denga pe mbelin percaya dirina. Pendampingen Paulus man Timotius  perlu kal si usih, Timotius labo anak jasmani (hubungen darah) tapi anak rohanina. Bage pe man banta, anak si ibere Dibata la saja anak erkiteken kita orang tua (jasmani, mpetubuhkenca) tapi nterem anak-anak ibas gereja, anak si la er-orang tua, anak gelandangen si banci si kelengi, jadi anak asuh. Melala cara Dibata mere anak man banta guna si kelengi dingen si sikapken jadi generasi si tangguh ibas masa depan. Bagi pemindon Daud ibas Invocatiota, Dibata masu-masu kesusurenna, epe jadi totonta, pasu-pasu Dibata tading, ringan ibas anak-anakta, jadi asamna nggeluh.

Pengkenaina / Aplikasi

Alu nggejapken anak e pemere Dibata (sue ras temanta), emaka arah pekan penatalayanennta si peduaken enda iarapken man banta eme :

1. Arus sijaga, sididik, sindampingi anakta guna nerusken kegeluhen jabu, bangsa ras gereja. Desken tongkat estapet si enggo sialoken ibas orang tuanta nari, arus si perjuangken sanga ibas tanta dingen si endesken ku generasi selanjutna. Ula kal sempat ceda ras talu sanga ibas tanta.

 

2. Tahun 2021 enda perayaken program gerejanta eme nikapken anak si nguda jadi pasu-pasu. Tentuna enda la menukah. Ije orang tua arus pentar mabai ras ndampingisa, gelah la ia ndabuh, ceda, gagal jadi pasu-pasu erkiteken erbage tantangen ras pinakit sosial si nerkam ia.

 

3. Selaku orang tua sibereken kebebasen man anakta lako ngembangken pemeteh dingen sura-surana ibas geluhna. Kebebasen siibereken kita e erpalasken Kata Dibata.

 

4. Ula kal kita erpengakap maka dahin ndidik anak dahin ndehara ntah perbulangen saja, entah pe dahin si kurang penting. Siangkalah maka dahin ndidik anak eme tanggung jababta ibas ngaloken pemere pusaka ibas Dibata nari. Kita ndidik anakta eme sebage ungkapen pengataken bujurta man Dibata sebab enggo ibereNa man banta si maba keriahen man banta ras jabunta.

 

5. Marilah siciptaken hubungen si harmonis (menjadi teman karib) ras anakta subuk si dilaki bage pe si diberu, sebab kegeluhen anak-anakta eme gambaren kerna kesuksesenta, kemalemen ateta, bage pe masa depanta.

 

6. Kuan-kuanen 29 : 17

“Berekenlah ajar man anakndu, maka megah dingen malem atendu ibahanna”

Kuan-kuanen 22:6

“Ajarkenlah man anak uga kearusen nggeluh, maka ikutkenna asa umurna nggeluh”

---

Pdt. Christmas P. Gtg, M. Th, MH

(GBKP Rg. Griya Rumah Tengah)

___Klasis Medan Namorambe____