Pekan Penatalayanen I, 17 Januari 2021, Kam Kap Teman-Temanku (Johanes 15:13-17)

Invocatio             : “Alu bage tuhu me sitersurat i bas Pustaka Si Badia, Abraham tek man Dibata, janah erkiteken kinitekenna ialoken Dibata ia rembak ras diriNa. Erkiteken sie igelari me ia teman Dibata” (Jak. 2:23)

Ogen                     : I Samuel 20:11-17

Khotbah               : Johanes 15:13-17

Tema                     : Kam Kap Teman-Temanku

Ibas bahan invocationta ngerana maka la lit gunana ngaku kita erkiniteken adi la isertai perbahanen sebage bentuk siteridah kerna kinitekenna e. Abraham ibenarken labo perban kiniteken sikosong tapi ngerana kerna perbahanen si selaras, berbanding lurus ras kinitekenna seh maka Dibata erngena ate man bana. Juluken siibereken man Abraham eme “bapa kalak sierkiniteken” ras “teman Dibata” memang tepat kal ibabana sebage teladan kita kalak sierkiniteken. Penulis surat Jakub enda situhuna labo ngerana tempa-tempa ipertentangkenna kiniteken ras perbahanen e lit siganjang teruken. Siitolakna ibas suratna enda eme kiniteken sihanya sebatas pemeteh (tataran dogmatis) saja tanpa ungkapen nyata ibas perbahanen (tataran etisna).

Ibas kisah Jonatan ras Daud (bahan ogenta) ngerana kerna dua anak muda terikat ibas pertemanen si setia, tulus ras iklas. Pertemanen enda la saja menyangkut perasaan ras dorongen saja tapi pe ngerana kerna kewajiben simbages ras berlangsung secara terus menerus melewati beragam masalah ras kepentingen politik. Duana anak muda enda situhuna iarapken jadi raja ibas waktuna kari, tapi sengget kita maka kalak enda duana labo musuh simematiken, saling menyingkirken sada ras sidebanna. Ibas tingkaten enda situhuna gampang kal Jonatan menyingkirken Daud sebage saingen, sementara Daud ibas waktu si pagin banci saja bertindak menghancurken keluarga Jonatan. Tapi sebalikna, duana ia iiket alu janji-janjina.

Pertemanen la biasa isahken ibas kantor pengacara tapi pertemanen sejati lalap berhadapen alu kewajiben, kesetiaan terus menerus ras adi iperluken lit ije pengorbanen diri. Pertemanen e hancur sanga melewati masa-masa sulit labo banci ikataken pertemanen. Adi bas sintabehna makai dah teman e maka labo e teman situhu-tuhu. Amsal 17:17, “Seorang sahabat menaruh kasih setiap waktu dan menjadi saudara dalam kesukaran.” Ibas sie Jonatan enggo mbuktikenca. Pertemanen eme salah sada pengalamen nggeluh simpebayak kita ibas erbage hal ibas geluhta. Liah kala di jelma la lit temanna. Teman mpebayak kegeluhen perban teman e mere, memberi tanpa mperhitungken sekai ia enggo keri ibas pertemanen e. Jonatan sekalak teman simere man Daud lebih arah kai sibanci ialokenna ras alu erbahan sibage icidahkenna maka ia berbeda ras raja umumna kerina bagi siigambarken ibas 1 Samuel 8:11-17 sifungsi sekalak raja eme muat, mengambil. Ibas kegeluhen e melala jelma mere ras muat. Jonatan eme sekalak si merhat mere, ras Daud bicara enggo pe inubuatken Samuel jadi sekalak raja, ia terus menerus nulak guna muat kai pe sijadi sekerajangen Saul. Alu sabar itimaina Dibata mereken mahkota Israel man bana.

Perkatan Jesus siitulisken Johanes sekalenda ncidahken uga Jesus tuhu-tuhu sekalak teman situhu-tuhu man ajar-ajar bage pe man kerina jelma. Mungkin perkatan Jesus enda lenga iangka ajar-ajarNa padahal kentisik nari Tuhan Jesus jadi sekalak teman simereken kesahNa, geluhna guna teman-temanNa. Labo lit keleng ate sibelinen asangken keleng ate kalak singgit ngasamken kesahna man teman-temanna. Jesus pang ngasamken kesahNa guna teman-temanNa ban mbelinna keleng ateNa e. Ibas 1 Yohanes 3:16, “Arah enda me sieteh kekelengen e: Kristus enggo ngendesken geluhNa man gunanta. E maka kita pe arus ngendesken geluhta guna seninanta.” Pinakit situhu-tuhu ihindari kerina jelma e me merasa la ikelengi. Jesus mbuktiken maka dirina dem keleng ate. Keleng ateNa Bapa ras patuh man pedah-pedahNa (ay. 9) ras keleng ateNa man ajar-ajar bahken nggit mate guna keselamatenna (ay. 13). Genduari Jesus menantang ajar-ajar guna mbuktiken keleng atena man Jesus alu patuh man pedah-pedah Jesus guna saling sikeleng-kelengen.

Jesus ncidahken kerna erti ras ndalanken keleng ate e. keleng ate imulai alu keleng ate Bapa man Kristus (ay 9). Keleng ate e bergerak arah Jesus man teman-temanNa (ay. 9, 12-13). Keleng ate Jesus itanggapi, irespon alu kepatuhen keleng ate ajar-ajar man Jesus (ay 10, 14) ras enda teridah kali bas keleng atena sada ras sidebanna (ay. 12, 17). Keleng ate jadi ulu keriahen atena kerina (ay 11) ras syarat mutlak pertemanenna ras Dibata (14-15). Teladan keleng ate enda me jadi pemuriden situhu-tuhu sisifatna total ras tanpa batas. Adi bage maka kai pe idalankenna maka terus menerus menghasilken buah sierguna, totona pe banci ibegiken Tuhan sejauh ia kerinana sikeleng-kelengen (ay 16-17).

Arah renungen enda pemahamen kiniteken (tataren dogmatis teologis) ise kin Jesus e ras kai isi pengajarenNa harus seh kubas tingkat perbahanen (tataren etis teologis) kai siarus kulakoken sebage kalak sienggo tek man baNa, kalak sienggo jadi teman Jesus. Dogmatis-etis harus berbanding lurus sada ras didebanna. Pemahamen sibenar njemba kita ndalanken kai sibenar. Adi pemahamenta pe enggo salah pasti pengelakonta pe lepak. Keleng ate Tuhan e arus teridah ibas keleng ate sapih-sapih kita. Ibas keleng ate e maka teridah keleng ate Tuhan reh kuhna dingen kiniteken e pe reh paguhna.

Tema umum pekan penatalayanenta tahun 2021 enda e me “Kam Teman-Temanku” (Joh 15:13-17) janah enda enggo ijelasken ibas bahan berngi sipertama enda. Jiwa tema umum enda atena menghadirken sada hubungen kekelengen erpalasken pertemanen (kasih filia). Suasana pertemanen enda iarapken banci teridah arah erbage hubungen ibas jabu bage pe i bas gereja ras masyarakat. Alu bage suasana persadanta lanai erbelat-belat, lanai erbaleng tapi bagi kalak sierteman. Lit suasana keriahen, akrab, cair seh maka kerina anak-anak pe meriah akapna ersada ras orang tua bage pe ras pengurus gereja. Antar kategorial pe banci lit suasana pertemanan i bas erbage dampar pelayanen. Selama sada minggu enda mari sitata layanken maka kita enda teman-teman Dibata ibas dahin i doni enda, ibas dahin persadanta anak-anak Tuhan i tengah-tengah GBKP enda. Sialokenlah pendilo enda dingen sidalankenlah pedah-pedah Tuhan man banta.

Tema umum enda sendalanen bahken turunen arah Visi GBKP e me : “GBKP menjadi kawan sekerja Allah untuk menyatakan rahmat Allah kepada dunia” (GBKP jadi aron Dibata jadi pasu-pasu man isi doni enda). Janah penekanen program ibas tahun 2021 enda eme “Generasi Muda Menjadi Berkat.” Enda mabai kita gelah i bas kerina dampar kegeluhen gerejanta banci teridah peran anak singuda. Kam kap temanKu nina Tuhan labo saja man orang tua tapi man kerina jelma lintas usia. Kam kap temanku labo saja man Pendeta, Pertua Diaken tapi man Permata ras KA/KR guna ambil bagin ibas kegiaten gerejani. Genaerasi muda jadi aron Dibata guna mengembangken potensi gereja GBKP enda. Generasi muda arus iberdayaken tandana keleng atena gereja enda baik ibas kebaktin, kepanitiaan, ras aktifitas si la bertentangen ras konfesi, tata gereja GBKP.  Keleng ate gereja salah sada tanda keleng ate man Tuhan.  Arah tema gerejanta enda ateta maka anak singuda pe nggejabken maka dirina e me subjek (pelaku) kata Dibata bas geluhna. Nggit terlibat, ndukung dahin-dahin bas gereja. Ibas umur singuda denga pe anak singuda arus min erbuah meramis dingen ntebu ras ernanam. Anak-anak singuda la terjeng jadi generasi penerus kelak tapi generasi penentu masa genduari ras pagin baik bas jabu, gereja ras masyarakat. Selamat berpeken penatalayenen ibas minggu enda. Amin.

Pdt. Daud Sembiring, S.Th

(GBKP Rg. Namorambe)

___Klasis Medan Namorambe____