Pekan Penatalayanen GBKP VI, 22 Januari 2021, Penataan Adat (Matius 15:1-9)

Pekan Penatalayanen GBKP VI, 22 Januari 2021, Penataan Adat (Matius 15:1-9)

Invocatio          : Jesus Kristus bali kap nderbih, sendah, seh rasa lalap (Heb. 13:8)

Ogen                : Jesaya 2:1-5

Khotbah           : Matius 15:1-9

Tema                : Penataan Adat


PENJELASEN TEKS

Adi ngerana kita kerna adat ntah tradisi tentuna selaku kalak karo kita la pernah ndauh arah si e kerina, erkiteken kegeluhennta la terpesirang ibas sie contohna saja bahasa si pake kita khususna gundari, e tentuna produk adat ta selaku kalak karo janah lit ka piga-piga tradisi si tetap si dalanken kita si tentuna la bertentangan ras kinitekennta ras kalak Kristen. Tapi la banci kita tutup mata ibas dirinta ntah pe keluargannta lit denga ka kita si dalanken budaya ntah adat si bertentangan ras kinitekennta man Dibata. Melala contoh si tentuna kita metehsa kerina. Adi sedekah enda si eteh adat eme produk manusia si tentuna ibahan guna mereken kiniulin man si dalankenca, janah erkiteken nggo ilakoken generasi ku generasi emakana adat enda nggo me jadi tradisi si ilakoken manusia. Tapi perlu siinget kegeluhen selalu berubah, emakana erkiteken ia nggo berubah perlu sipahami adat pe perlu ikontekstualisasikan ras kegeluhen si gundari khususna kegeluhennta selaku kalak si erkiniteken (Kristen), emakana ibas paksa enda, ateta min petangkas man kerina perpulungen gelah reh ngasupna ia guna mpekena-kena adat si nggo mungkin idalankenna sedekah enda alu terang Kristus, gelah arah si enda reh mehulina adat enda janah la bertentangan ras kinitekennta. Gambaran si e banci siidah ibas bahan khotbah ibas Matius 15:1-9 Bagin enda nuriken pandangan Tuhan Yesus erkiteken adat istiadat si lit ibas kegeluhennta, adi siperdiateken bahan enda, percakapan si terjadi ibas Yesus ras guru-guru agama Yahudi erkiteken :“Ajar-ajar Yesus la burihi tanna sope man ia” Ibas paksa si e lit tradisi si ngatakenca adi man kita la siburihi tannta emakana banci jadi si ipan kita e najis, tentuna adi sigargari pustakannta khususna padan sindekah memang lit si ngerana erkiteken mburihi (bnd.  Kel. 30:17-21), tapi enda labo alu konteks man tapi ibas konteks mereken persembahen, memang arah sisi kesehaten burihi tan sope man mehuli ka guna kebersihen kesehaten, terlebih ibas kinata konteks kegeluhenta gundari enda guna terhindar dari virus corona iharusken kita rajin cuci tangan. Eteh Tuhanta Yesus kel burihi tan sope man mehuli guna kesehaten, tapi adi makeken adat guna nidingi kalak ras patuh man adat tanpa kekelengen man manusia ras Tuhan Dibata e si seh kel ate Yesus la pas na.

Emakana erkiteken si e Tuhan Yesus muat sada contoh ajaran agama ras adat si biasa ilakoken guru-guru agama yahudi man perpulungenna.  (ayat 3-6) Hal si enda cidahken kepeken sedekah enda guru-guru agama Yahudi memposisikan adat ntah pe tradisi idatas ajaran agama. Hal si enda iakap Tuhan Yesus salah, emakana istilah si ibahan Tuhan Yesus eme Pekulah-kulah erkiteken bas biberna ngenca ipujina Dibata tapi ibas kegeluhenna ukurna ndauh sirang ras Dibata. Emaka alu nats si enda persingeti kita kerina erkiteken :

1). Selaku kalak si erkiniteken nggo kin geluhta enda palasna tuhu-tuhu kiniteken man Tuhan Yesus ntah kinitekennta enda formalitas saja ?

2) Ibas adat tradisi si idalanken kita selaku kalak karo, apai si akap si paling utama si ilakoken kita ibas gundari enda, tradisi idatas agama ntah agama idatas tradisi ?. Tentuna 2 penungkunen enda banci jadi persinget man banta ibas kita cidahken dirinta selaku kalak si erkiniteken si tetap nggeluh ibas adat karonta. Emakana adi siidah bahan pengogennta ibas Yesaya 2 : 1-5, Bagin enda nuriken nubuatan Tuhan arah nabi Jesaya. Ija adi siidah ibas bahannta enda, siidah uga ibas wari sipudi lit keriahen ukur nandangi kalak Israel erkiteken Rumah Dibata pajek mulihken janah iarapken gelah kerina kalak Israel lawes ku rumah pertoton ndai guna nembah man Dibata. Tapi si e banci jadi adi siperdiatekn ayat 5 adi kalak Israel nggit erdalan arah terang si nggo ibereken Dibata man banta. Tentuna kita la banci lepas arah Yesaya 1:21-31, ija bangsa Israel ibas paksa si e nggo nadingken Dibata, nggo ia ngelakoken si la mehuli iadep-adepen Dibata, emakana erkiteken si e ate Tuhan ngukum gelah arah enda kalak Israel banci sadar mulihken erkiteken tugas ras tanggung jawabna selaku bangsa pilihan Dibata.

APLIKASI

Adat tentuna nggo jadi sada bagin ibas kegeluhennta tapi perlu siinget tradisi enda harus me iterangi alu terang Kristus, adi temanta sendah ngatakenca “Penataan Adat” ertiana adat enda harus banci cidahken terang Kristus ibas pendalankenna janah adat pe la banci ganjangen asangken kinitekennta erkiteken kiniteken enda me si nerangi adat gelah adat ntah pe budaya enda reh mehulina ibas kegeluhennta. Sebab si idah kalak karo ijapa pe ia tading maka budayana tetap lalap idalankenna , bagi keong kuja pe ia lawes ibabana rumahna, maka kita pe bage mulai kitik nari seh mate budaya karo tetap idalanken. Zending pe nai masuk ia ku kalak Karo imulaina arah budaya , emaka Gerejanta berkembang itengah-tengah budaya. Salah sada arah mbue denga adat enda harus si tata ulang sue bagi konsep orang tuata ndube simehuli misalana :Erbenting kibul anak beru, gundari mbue anak beru lanai erbenting kibul lanai maba kampuh, lit maba kampuh tapi kadang saja. Padahal ibas ia erbenting kibul enda jadi sada tanda-tanda ia anak beru, si peduaken ncidahken ketutusenna ndahiken dahin anak beruna e gengkenna erdahin latih, tahan lihe e alu kampuh siiketken bas awak gelah sikap kerja kalimbubu e. konsep kekelengen ras pengorbanen sicukup mehuli siitanamken orangtuata ndube, adi gundari uga? Tentu arah Adat enda ate Dibata lebe guna ermulia gelarNa ras turah kekelengen sapih-sapih kita kalak karo emaka gundari ibahan kalak singakaten “ADAT’ enda eme ; Ajar Dibata Man Tua-tua. Emaka marilah arah adat enda sipeturah kehamaten man Tuhan ras keluargata bagepe man orangtua ta.


Pdt. Jerri Karlo Tarigan, S.Th

(GBKP Tangkahen)

____Klasis Medan Namorambe____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba