Pekan Penatalayanen GBKP Ke III, 19 Januari 2021, Turiken Man Kesusurenta (Masmur 78:1-8)

Invocatio         : Kelengilah TUHAN Dibatandu asa ukurndu, asa tendindu, asa gegehndu lit. Ola  ndigan pe lupaken kerina perentah-perentah si kubereken sendah man bandu. Ajarkenlah e man anak-anakndu” (Ulangen 6:5-7a)

Ogen               : 1 Korinti 4:14-21.

Khotbah          : Masmur 78:1-8.

Tema               : “Turiken Man Kesusurenta”

Pengantar

Kerina kita selaku manusia pasti nge lit pengalamen-pengalamen kegeluhenna, janah sie banci jadi bekal man banta guna banci nuri-nuri man kalak si deban kerna pengalamen kegeluhenta e, terutama nandangi anak ntah pe kesusurenta. Arah kita nuriken pengalamen kegeluhenta e banci ka e jadi bahan pelajaren ibas kegeluhen nandangi kalak simegi megi. Nina sekalak nini bulang nuri-nuri man kempuna; Kami nai kempu asum berkat kenca ate kami ku gereja, erdalan nahe nge kami ras ninindu ku kuta kepar deleng ah, lit dauhna  5 batu kami erdalan nahe, amin bage pe labo iakap kami latih, tapi meriah kang iakap kami. Bage ka pe tupung perpulungen jabu-jabu erdalan nahe kami tengah berngi e, emaka janah rende-rende kami ibas perdalenen gelah ola gejap latih. Bage me semangatna kami erkiniteken  e kempu. Emaka igejapken kami kel uga pengarak-ngarak TUHAN e kubas jabu kami, maka seh kel belinna Pasu-pasu ras keleng ate TUHAN ialoken kami seh ibas paksa enda pe. Tapi ngidah sigenduari enda enggo mamang kel ateku kempu, lanai bo muat dauhna reh ku gereja ntah ke perpulungen tapi mekisat kel. Situhuna lanai bo latih reh ku gereja nggo rata-rata erkereta ntah nangkih motor, tapi eipe mekisat nari nge kuidah reh ku gereja ras perpulungen jabu-jabu e. Reh nina kempuna ngaloi: Bageme bulang, semangaten kap tuhu erkiniteken man TUHAN si nai asangen sigenduari me… (Ena me nai bulang, gundari beda lah, zaman nggo ndauh berubah bulang, lanai si gel-gel e). Bage me sada contoh nuriken kegeluhen erkiniteken man TUHAN, janah kuga pengarak-ngarak TUHAN e. Kita pe selaku orangtua, maka arus ka siterusken pelajaran kegeluhen man anak-anakta. Adi lang ia pe pagin latih nge iakapna erlajar si sada. Emaka kisah-kisah si nai arus nge ipeseh alu bentuk si banci teraloken generasi simbaru.

Penjelasen Nats

Arah bahan Kotbahta pe iajuk bangsa TUHAN lako nuriken man kesusurenna kerna perbahanen TUHAN e.  Ibas Mazmur 78, pemazmur nggejapken maka lit kemungkinen bangsa TUHAN enggo ngelupaken kerna perbahanen TUHAN janah generasi si mbaru jadi bene. Erdandanken sie pemasmur ngajuk gelah bangsa enda ola erleja-leja guna nuriken perkara-perkara si enggo ialokenna kerna kuasa TUHAN  ras perbahanenNa si mejin, bagepe tanda-tanda kuasa si ilakokenNa. (ay.4). Tujun ibas nuriken kisah sejarahna e alu terus-menerus, labo gelah menghafal data historis, tapi pe guna mpekeke semangat kinitekenna, ibas erpengarapen man TUHAN. Alu bage, ia pe kerina Dibata ka nge penalemenna, la ilupakenna perbahanen Dibata, tapi lalap ia patuh man perentah-perentahNa (ay.7) ras guna njagai gelah generasi si reh la papak ibas kinitekenna. Gelah ola seri ras nini-ninina, bangsa pemberontak dingen la patuh, si la tetap kinitekenna man Dibata, si la erkemelangen man baNa (ay.8). Erkiteken gegeh ras kengasupen bagepe pasu-pasu ras pemere Dibata ibas kegeluhenta, maka metedeh kel min ateta guna nuriken pengalamen kinitekenta e man anak-anakta segelah ia pe banci mpeturah kinitekenna ras kepatuhenna/ketutusenna ibas generasi si reh.

Saling berbagi cerita eme sada bentuk komunikasi manusia si paling mendasar, si membedaken manusia ras makhuk sideban. Kai kin turi-turin e? Turi-turin eme cerita, laporan, peristiwa yang sesungguhnya. Ije me situriken secara mendetail, peristiwa si uga kin tuhu-tuhu enggo siterjadi. Alu la lit munikenca sada pe kejadin e. Emaka situhuna berbagi cerita eme merupaken sada kebutuhen ibas kegeluhen manusia, engkai? Erkiteken kita enda eme makhluk sosial, si membutuhken hubungen sada ras sidebanna. Janah labo terpendam kita kel kerina tep-tep peristiwa si ni idalani, emaka perlu nge si turiken kempak kalak si deban, ntah pe mungkin kempak  si terdekat ras kita. Perlu pe si eteh maka turi-turin e lit gegehna, apai ka adi beluh kita nurikenca maka turi-turinta e mpeturah emosi, si banci menarik minat simegi-megi. Simegi-megi iajuk kubas cerita e seh maka turah rasa empatina. Turi-turin simehuli pe ncidahken nilai-nilai budaya, sini ituriken janah simegi megi la ia merasa iajari ntah pe iceramahi.

 Aplikasi

Ibas Kebaktin Pekan Penatalayanenta menaken tahun 2021 enda iajuk kita selaku kalak si enggo tek man TUHAN, lako nuriken kerna perbahanen Dibata si enggo si gejapken ibas kegeluhenta. Bagi si isingetken pe ibas invocatio:  Kelengilah TUHAN Dibatandu asa ukurndu, asa tendindu, asa gegehndu lit. Ola  ndigan pe lupaken kerina perentah-perentah si kubereken sendah man bandu. Ajarkenlah e man anak-anakndu” (Ulangen 6:5-7a). Jadi sitik pe la banci ilupaken sie, sebab ije teridah tuhu uga belinna perbahanen TUHAN e ibas kegeluhenta. Emaka turikenlah man kesusurenta. Bagi sitersinget ibas Tema: Turikenlah man kesusurenta. Bagepe ibas pengogenta isingetken 1 Korinti 4:14-21; ija Rasul Paulus nggejapken maka rutang kal iakapna guna mpersingeti perpulungen Korinti si lanai setia, ndalanken si la ngena ate TUHAN. Erdandanken sie me maka isuruhna pe Timotius selaku anak rohanina guna ndahi perpulungen e, gelah perpulungen e tetaplah ibas kinitekenna man TUHAN, nggeluh ndalanken kegeluhenna ibas Kristus Yesus bagepe la meganjang ukur. Erkiteken mbelin kal iakap Rasul Paulus tanggung jawabna  guna ngajarken perpulungen e seh maka iorati Paulus kalak e. Uga dage atendu? Reh atendu aku alu maba perpalu, ntah alu keleng ate dingen mesayang?

Bage me pentingna nuriken kerna perbahanen TUHAN e. Kai dage si enggo sibahan? Enggo nge lit situriken kerna perbahanen TUHAN e itengah-tengah jabuta? Ntah kin perbahan enggo lanai lit si mediate nuriken perbahanen TUHAN e man sekelewetna seh maka nggo reh Covid 19 enda, entah labo gia min bage.  Tapi banci ka nge enda sada persinget man banta gelah reh peduli/mediate kita nuriken kerna perbahanen TUHAN e kempak kesusurenta, terlebih man anak-anak jabuta. Sebab la sitik kalak Kristen enggo, nggeluh alu rate-ate. Nggo bali saja iakapna la ku Gereja ras la er-PA. Ola kari erkiteken kesibukenta ngukurken kiniliten doni enda lupa kita nuriken perbahanen TUHAN e, seh maka anak-anakta, kesusurenta sitik pe la igejapkenna kuga belinna perbahanen TUHAN e ibas  kegeluhenna.    Emaka mari, jadilah kita sinuriken turi-turin simehuli singena ate TUHAN. Janah jadi keriahen min siakap ibas kita nuriken perbahanen TUHAN e. KEE No.295 “Meriah Kal Ukurku M’ritaken GelarNa”.

Pdt. Antonius Tarigan, S.Th

(GBKP Lau Cih)

___Klasis Medan Namorambe____